Nabe Samuel 8 - Quiché Bible

Ri Israel craj cac'oji' rajawinel

¹ Aretak ri'j chic ri Samuel, xebucoj ri u c'ojol che c'amal tak qui be ri aj israelib.

² Ri nabe u c'ojol Joel u bi' xukuje' ri Abiy ri ucab u c'ojol, e k'atal tak tzij pa Beerseb.

³ Man je ta' c'u xquibano jacha' ri xuban ri qui tat, man xebux ta jic, are xkaj chquiwäch chi cäban u pa qui k'ab, man xquiban ta c'u ri suq'uilal.

⁴ Xquimulij c'u quib ri e qui nimak tak tatayib ri aj israelib, xebe che u tzijobexic ri Samuel ri c'o pa Rama,

⁵ che u bixic che: “Ri lal, lal jun nim winak chic, ri e c'ojol la man je ta cäquibano jacha' ri caban la; rumal c'u ri', cojo' la jun ajawinel rech cajawin pakawi' jacha' ri nak'atisabal chquixo'l conojel ri nimak tak tinimit.”

⁶ Ri Samuel c'ax xuna' chi xquibij che chi chucojo' jun ajawinel rech cajawin paquiwi', xuban c'u ch'awem ruc' ri Ajawaxel;

⁷ xubij c'u ri Ajawaxel che: “Apachique jasach ri cutz'onoj ri tinimit chawe chanimaj u banic, man at ta c'ut ri catquixutuj, xane' in, rech man quinajawin ta paquiwi'.

⁸ C'ä pa ri k'ij ulok aretak xebenwesaj ulok pa Ejipt, c'ä camic, je qui banom chwe junam ruc' ri qui banom chawe camic, in c'u quixutum che u ya'ic k'ijilanic chque ri e qui diosib ri winak.

⁹ Chanimaj ba u banic ri cäquibij chawe; chaya' c'u utzalaj u bixic chque nabe ri patanijic ri quebucoj wi na ri ajawinel ri cajawin na paquiwi'.”

¹⁰ Xuya' c'u u bixic ri Samuel ri xutzelej u bixic ri Ajawaxel che ri tinimit ri xutz'onoj jun ajawinel che.

¹¹ Xubij c'u chque: “Are patanijic wa' ri quixreyej ruc' ri ajawinel ri cajawin na piwi': Quebucoj na ri e i c'ojol che ajch'ojab, jujun quebucoj chquij carwaj che u banic ch'o'j chquij quiej, niq'uiaj chic quebucoj na che chajil rech.

¹² Jujun quebucoj na che qui nimal jun mil (1000) ajch'ojab, jujun chic che c'amal qui be cawinak lajuj (50) ajch'ojab. Jujun chiwe quixucoj na che qui tajixic ri rulew xukuje' quiyac na ri qui wächinic tak ri rulew, o quixucoj na che qui banic tak ch'ojibal xukuje' ri jastak ri quebajwataj chque tak ri carwaj re ch'o'j.

¹³ Xukuje' quebucoj na ri e i mia'l che qui banic c'oc'al, che qui banic tak riquil xukuje' che qui banic tak caxlanwa.

¹⁴ Quebumaj na ri utzalaj tak iwulew, ri utzalaj ticbal ri u che'al u wa'l uva, xukuje' ri utzalaj ticbal tak u che'al aseitun, quebujach na pa qui k'ab ri e rach k'atal tak tzij.

¹⁵ Cutokij na ri qui lajujil tak ri qui wächinic tak ri iwulew, cujach c'u na pa qui k'ab ri e rach k'atal tak tzij xukuje' chque ri quetakan pa tak ri k'atbal tzij.

¹⁶ Xukuje' quebutokij na ri e pataninel tak iwech chi achijab chi ixokib, xukuje' ri utzalaj tak i wacax xukuje' ri utzalaj tak i bur, quebucoj c'u na che qui banic tak ri u chac.

¹⁷ Cärechbej c'u na ri u lajujil ri e iwawaj, xukuje' c'u ne ri ix quixucoj na che u patanixic.

¹⁸ Aretak c'u cäpe ri k'ij aretak qui chaplej ch'ach'atem chrij ri ajawinel ri i cha'om, ri Ajawaxel man coc ta na il chiwe.”

¹⁹ Man xoc ta c'u il ri tinimit che ri xubij ri Samuel, xquitzelej c'ut u bixic: “Pune' jewa'. Cakaj cäc'oji' kajawinel,

²⁰ rech cujux junam cuc' ri niq'uiaj nimak tak tinimit chic, rech xukuje' cajawin pakawi' cujutak c'ut cuc'am ka be pa ri ch'o'j.”

²¹ Aretak ri Samuel xuq'uis u ta'ic ri xubij ri tinimit, xuya' c'u u bixic che ri Ajawaxel,

²² xutzelej c'u u bixic ri Ajawaxel che: “Chanimaj u banic ri caquibij chawe, chacojo c'u jun cajawinel.” Xuya' c'u takanic ri Samuel chque ri aj israelib chi chetzelejok chquijujunal pa tak ri qui tinimit ri e elinak wi ulok.