Nabe Samuel 7 - Quiché Bible

¹ Xepe c'u ri aj Quiriat-jearim xquic'am c'u bic ri u caxa ri Ajawaxel, xquicoj pa ri rachoch ri Abinadab, ri c'o tza'm jun juyub; xquitas ri Eleazar ri u c'ojol che u chajixic.

Ri Samuel c'amal u be ri Israel

² Juwinak (20) junab chic c'o ri caxa pa Quiriat-jearim, ronojel c'u Israel cutzucuj ri Ajawaxel ruc' ronojel ranima'.

³ Rumal c'u rech wa', ri Samuel xubij chque conojel ri aj israelib: “We ri ix quixtzelej ruc' ronojel ri iwanima' ruc' ri Ajawaxel, rajawaxic quebiwesaj bic tak ri qui diosib ri e jule' tak winak chic ri e c'o iwuc' xukuje' ri e qui wächbal tak ri Astarte, quijach c'u ri i c'aslemal pu k'ab ri Ajawaxel, xuwi c'u che ri Are' quixk'ijilan wi cuya' c'u na i chuk'ab ri' rech quixch'äcan paquiwi' ri aj pilisteyib.”

⁴ Ri aj israelib xequesaj bic ri jalan tak qui wächbal ri Baal xukuje' ri Astarte, xuwi che ri Ajawaxel xek'ijilan wi.

⁵ Xuya' c'u takanic ri Samuel, xubij: “Chebimulij conojel ri aj israelib pa Mizpa, quinbochi'j c'u na ri Ajawaxel paquiwi'.”

⁶ Ri aj israelib xquimulij quib pa Mizpa, xquesaj c'u ja' chi' xquijamij c'ut jacha' sipanic chuwäch ri Ajawaxel. Chila', pa Mizpa ri Samuel xux wi c'amal qui be ri aj israelib.

⁷ Aretak c'u xquetamaj ri aj pilisteyib chi ri aj israelib qui mulin quib pa Mizpa, ri e qui nimal ri aj pilisteyib xewalij ulok xepe chquij. Ri aj israelib aretak xquetamaj, xquixe'j quib

⁸ xquibij c'u che ri Samuel: “Mätanaba' la u bochi'xic ri Ajawaxel ri ka Dios pakawi' rech man cujkaj ta pu k'ab ri qui cuinem ri aj pilisteyib.”

⁹ Ri Samuel xuc'am jun alaj ama' chij ri c'ä cätunic, man c'o ta xresaj che, xuchi'j che tabal tok'ob ri cächajirisaxic chuwäch ri Ajawaxel; xubochi'j c'u ri Ajawaxel paquiwi' ri aj israelib, ri Ajawaxel xuya' che ri Samuel ri xutz'onoj.

¹⁰ Aretak ri Samuel cätajin cuchi'j ri tabal tok'ob ri cächajirisaxic, ri aj pilisteyib xepe chquij ri aj israelib che qui cämisaxic; ri Ajawaxel xutak ulok jun nimalaj cakulja paquiwi' xquixe'j c'u quib, rumal c'u wa' xech'äc cumal ri aj israelib.

¹¹ Chanim c'ut xebel bic ri aj israelib pa Mizpa che cokataxic ri aj pilisteyib, xequicämisaj c'ä iquim che ri Bet-car.

¹² Xuc'am c'u na jun abaj ri Samuel xucoj chuxo'l ri Mizpa ruc' ri Sen, xucoj c'u Eben-ezer che u bi' xubij c'ut: “C'ä camic c'ä uj u to'm ri Ajawaxel.”

¹³ Ri aj pilisteyib xech'äctajic man xeboc ta chi c'u pa ri culew ri aj israelib; aretak c'asal ri Samuel, ri Ajawaxel xuk'atij qui wäch ri aj pilisteyib.

¹⁴ Ri e tinimit tak ri qui majom ri aj pilisteyib chque ri aj israelib, cächaptaj c'ä pa Ecron queq'uis c'ä pa Gat, xetzelej chi jumul pa qui k'ab ri aj israelib. Jewa' ri xquiban ri aj israelib che u to'tajisaxic ri culew pa qui k'ab ri aj pilisteyib, xc'oji' c'u jamaril chquixo'l ri aj israelib cuc' ri aj amoreyib.

¹⁵ Ri Samuel xux c'amal u be ri Israel pa ronojel ri u c'aslemal,

¹⁶ conojel c'u ri junab cäbe pa Betel, pa Jilgal xukuje' pa Mizpa che qui to'ic ri aj israelib pa conojel tak we c'olbal ri'.

¹⁷ Cätzelej chi c'u ulok pa Rama, jawije' ri jekel wi, kas chila' c'u c'o wi che u k'atic tzij puwi' ri Israel. Xukuje' xuyac jun porobal chila' che ri Ajawaxel.