Nabe Samuel 6 - Quiché Bible

Ri aj pilisteyib cäquitzelej ri caxa

¹ Ri u caxa ri Ajawaxel xbeytaj wukub ic' pa tak ri qui tinimit ri aj pilisteyib.

² Ri aj pilisteyib xequimulij ri e qui cojol tabal tak tok'ob xukuje' tak ri e qui ch'obonelab rech caquita' chque: “¿Jas cäkaban che ri u caxa ri Ajawaxel? Chibij chke jas cäkaban che u tzelexic pa ri u c'olbal.”

³ Ri e are' xquibij chque: “We quitzelej ri u caxa ri qui Dios ri aj israelib, man xak ta tolonic quitak bic, ma ta c'u quitoj bic ri i mac ri i banom chuwäch ri Ajawaxel. C'äte c'u ri' quixutzir che ri yabil ri c'o chiwij quich'ob c'u na jasche man u tanabam ta u banic c'ax chiwe.”

⁴ “¿Jas ri cakaya' bic che, che u tojic ri ka mac ri ka banom chuwäch?” xecha' ri aj pilisteyib. “Job u wächbal sipoj re k'an puak,” xecha' ri e qui cojol tabal tok'ob, “jujun che qui q'uexwäch jujun qui nimakil ri aj pilisteyib; xukuje' job ch'o re k'an puak, rumal chi ri ix xukuje' ri e c'amal tak i be e qui kajbem xukuje' tak we yabil ri'.

⁵ Chebibana c'ut ri e qui wächbal ri sipoj xukuje' ri qui wächbal tak ri ch'o ri cätajin cäquiban c'ax che ri ulew, chi ya' c'u u k'ij ri u Dios ri Israel; craj ne cutanaba' u c'äjisaxic i wäch, ri ix, xukuje' tak ri e i diosib xukuje' tak ri e iwulew.

⁶ ¿Jasche i cowirisam ri iwanima' jas ri xquiban ri aj ejiptib xukuje' ri cajawinel, xak xuwi c'u aretak xuban c'ax ri Dios re Israel chque, xequitzokopij ulok ri aj israelib?

⁷ Chitaka' u banic jun c'ac' caret; chebic'ama' c'u quieb ati'tab tak wacax ri cätajin queq'uiyisanic ri mawi jumul cojom eka'bal chrij qui wi', chebixima' c'u che ri caret; chebiwesaj c'u can ri cal mebitereba' bic chquij, chebiya' can pa ri qui cäbal.

⁸ Chic'ama' c'ut ri u caxa ri Ajawaxel chiya' chupam ri caret, chiya' c'u bic jun coxon pa uxcut ri quebiya' wi bic ri jastak re k'an puak ri quiya' bic che tojbal rech ri i mac ri xibano. Chitzokopij bic ri caret rech cäbe u tuquiel.

⁹ Kas c'u are chiwila' wa': we ri caret cabe che u suq'uil ri Bet-sems ri kas rulew, are' ba' ri u Dios ri Israel yowinak ri nimalaj c'ax chke ri ka rikom; we c'u man je cubano, keta'm ba' ri' chi man are' taj xbanow ri c'ax chke ri ka rikom, xak ba' xkataklebej wa'.”

¹⁰ Je c'u xquiban we achijab ri'. Xequic'am quieb ati'tab tak wacax ri queq'uiyisanic, aretak xetz'apitaj ri cal chupam ri qui cäbal, xequixim che ri caret;

¹¹ xquiya' c'ut ri u caxa ri Ajawaxel chupam ri caret, xrachilaj ri coxon ri e c'o wi tak ri ch'o re k'an puak xukuje' ri qui wächbal ri sipoj.

¹² Ri wacax xquichaplej c'u binem pa ri be ri cäbe pa Bet-sems, quewu'nic xquitakej u suq'uil ri be, man xquijalc'atij taj ri qui be. Ri aj pilisteyib xeteri bic chquij c'ä xebopan na pa ri u c'ulbatil ri Bet-sems.

¹³ Ri aj Bet-sems, ri e c'o pa ri beya' ri cätajin cäquik'at trico, aretak xeca'y apanok, xquil ri caxa, xenoj che quicotemal.

¹⁴ Aretak xopan ri caret chupam ri rulew ri Josue, ri c'o pa Bet-sems, xtaq'ui' c'u chila'. C'o jun nimalaj abaj chila'. Ri aj Bet-sems xquiban si' che ri u tz'alamil ri caret, xequichi'j c'u ri ati'tab tak wacax che tabal tok'ob ri cächajirisaxic chuwäch ri Ajawaxel.

¹⁵ Ri aj levitib qui kasan chic ri caxa xukuje' ri coxon ri e c'o wi ri jastak re k'an puak, xequiya' c'u puwi' ri nimalaj abaj; pa ri k'ij ri' ri aj Bet-sems xequichi'j tabal tok'ob ri quechajirisaxic xukuje' niq'uiaj chi tabal tak tok'ob chuwäch ri Ajawaxel.

¹⁶ Aretak xiltaj wa' cumal ri e job qui nimal ri aj pilisteyib xetzelej pa ri k'ij ri' pa Ecron.

¹⁷ Ri job sipoj re k'an puak ri xequiya' ri aj pilisteyib che tojbal re ri qui mac ri xquiban chuwäch ri Ajawaxel, che tojbal ri qui mac ri aj Asdod, ri Gaz, ri Ascalon, ri Gat xukuje' ri Ecron;

¹⁸ ri cajilabal tak ri ch'o re k'an puak xak e junam cuc' ri cajilabal ri qui tinimit ri job qui nimakil ri aj pilisteyib, quecoj ri tinimit tak pa ajilabal ri kasan pa nimak tak tapia xukuje' ri alaj tak tinimit ri man kasan ta pa nimak tak tapia. Ri nimalaj abaj ri xya' ri u caxa ri Ajawaxel puwi', c'ä cuya' quil u wäch pa ri rulew ri Josue, ri c'o pa Bet-sems.

¹⁹ Ri Ajawaxel xebucämisaj jujun aj Bet-sems rumal rech chi xeca'y chupam ri caxa. Xebucämisaj oxc'al lajuj (70) achijab, ri aj tinimit sibalaj xcok'ej qui wäch ri xecäm rumal ri Ajawaxel.

²⁰ Xquibij c'u ri aj Bet-sems: “¿Jachin ta lo cäcuinic cutac'aba' rib chuwäch ri Ajawaxel, chuwäch we tastalicalaj Dios ri' ri man cuban ta etzelal? ¿Jachin lo che cubana' wi c'ax aretak chel chakaxo'l?”

²¹ Xquitak c'u u bixic we takquil ri' chque ri aj Quiriat-jearim: “Ri aj pilisteyib qui tzelem ulok ri u caxa ri Ajawaxel; chixpet ba' che u c'amic bic.”