Nabe Samuel 3 - Quiché Bible

Ri Ajawaxel cusiq'uij ri Samuel

¹ Ri ala Samuel u takem u patanixic ri Ajawaxel chuxe' ri u takanic ri Eli. Pa tak ri k'ijol ri' c'ä chuc'lawi' cätzijon ri Ajawaxel ruc' jachin jun che u ya'ic jun takquil che; man xak ta amak'el chi c'o jachin caril jun c'utwächinic.

² C'o c'u jun k'ij aretak ri Eli, xuchaplej moyiric man kas ta c'u cäca'y chic, cätajin cäwar pa ri u warabal.

³ Ri Samuel k'oyol pa ri rachoch ri Ajawaxel, ri c'o wi ri u caxa ri Dios. Ri yabal k'ak' ri c'o chupam ri k'ijilabal u takem nicowem.

⁴ Xsiq'uix c'ut rumal ri Ajawaxel: “¡Samuel!” “¡In c'o waral!,” xcha' ri are'.

⁵ Aninak c'ut xbec jawije' c'o wi ri Eli, xubij c'u che: “In c'olic ri'; ¿jas ri xinsiq'uij wi la?” “In man at nu siq'uim taj,” xcha' ri Eli che. “Jatek'oyolok chic.” Xtzelej c'ut ri Samuel xek'oyolok.

⁶ Xsiq'uin chi c'u jumul ri Ajawaxel: “¡Samuel!” Xwalij c'u ri Samuel xbec jawije' c'o wi ri Eli, xubij c'u che: “Xinpetic; ¿jas quinajwataj wi che la?” “Man cätajin ta catinsiq'uij nu c'ojol,” xcha' ri Eli che. “Jatek'oyolok chic.”

⁷ Ri Samuel c'ä maja' reta'm jachin ri Ajawaxel, ri are' man c'o ta jas c'utum chuwäch.

⁸ Churoxmul chi c'ut ri Ajawaxel xusiq'uij ri Samuel, xwalijic xbe che u bixic che ri Eli: “Xinpetic tat; ¿jas quinajwataj wi che la?” Xuch'ob c'ut ri Eli chi are ri Ajawaxel cäsiq'uin ri ala,

⁹ xubij che: “Jät jatek'oyolok; we c'u catusiq'uij ri Ajawaxel, chatzelej u bixic che: ‘Ch'aw la, cätatabex c'u la rumal we pataninel ech la.’ ” Xbe c'u ri Samuel xek'oyol pa ri u c'olbal.

¹⁰ Xopan c'ut ri Ajawaxel, xcanaj chi' xusiq'uij chic junam jas ri nabe: “¡Samuel!, ¡Samuel!” “Ch'aw la, cätatabex c'u la rumal we pataninel ech la ri',” xcha' ri Samuel.

¹¹ Ri Ajawaxel xubij che: “Quenbana' jun jasach pa Israel, quek'oxow c'u na ri u xiquin ronojel apachin ta ne ri cätatabenic.

¹² Ri k'ijol ri', kas copan na, quintz'akatisaj na che ri Eli ronojel ri nu bim che chi cäquic'ulmaj na ri rachalaxic.

¹³ Nu yo'm u bixic che chi quinc'äjisaj qui wäch ri e rech, xa' jumul chbe k'ij sak rumal rech ri etzelal ri reta'm chic; ri e u c'ojol in quic'okom, man xebuk'il ta c'ut.

¹⁴ Rumal ri' quinban ri chi'nic ri kas cäban na, in chokinak chi ri etzelal ri qui banom ri rachalaxic ri Eli mawi jubik' cäsach u tza'm, mawi cumal tabal tak tok'ob, mawi cumal tak sipanic.”

¹⁵ Aretak xbitaj wa' che ri Samuel xk'oyic c'äte xwalij chucab k'ij, xebujak c'ut ri u chi' ri rachoch ri Ajawaxel. Ri Samuel cuxe'j rib che u tzijoxic che ri Eli ri c'utwächinic ri rilom,

¹⁶ xsiq'uix c'ut rumal ri Eli, xubij c'u che: “¡Samuel, nu c'ojol!” “In c'o waral,” xcha' ri Samuel.

¹⁷ Ri Eli xuc'ot u chi' xubij che: “¿Jas ri u bim ri Ajawaxel chawe? Catinbochi'j chi chabij ronojel chwe. ¡Chnimalaj c'u chc'äjisax a wäch rumal ri Dios we c'o jas cac'u' can che ri xubij chawe!”

¹⁸ Ri Samuel xuk'alajisaj c'u ronojel ri xbix che man c'o ta xuc'u' canok ri ma ta xuk'alajisaj che. Xubij c'u ri Eli: “¡Ri are' are' ri Ajawaxel! Chbanok jachique ri utz cärilo.”

¹⁹ Ri Samuel xnimaric, xto' rumal ri Ajawaxel man c'o ta ne jun chque tak ri e u chi'nic ri ma ta xebutz'akatisaj.

²⁰ Ronojel c'u ri Israel cächapletaj pa Dan queq'uis c'a pa Beerseb, xretamaj chi ri Samuel kas are jun k'axal u tzij ri Ajawaxel.

²¹ Xuc'ut chi c'u rib ri Ajawaxel jumul pa Sil, chila' c'u cuya' wi u k'alajisaxic che ri Samuel ri cäraj chi quetamaxic; cuya' c'u na u bixic ri Samuel che ronojel ri Israel.