Nabe Samuel 29 - Quiché Bible

Ri aj pilisteyib xqueblan qui c'u'x chrij ri David

¹ Ri pilisteyib xequimulij conojel ri cajch'ojab pa Apec, are c'u ri aj israelib xquimulij quib chuchi' ri q'uiyibal ja' ri c'o pa Jezreel.

² Aretak c'u ri e qui nimal ri aj pilisteyib xukuje' tak ri e cajch'ojab quek'atat pa tak mil cätajin quebec, ri David xukuje' tak ri rachijab e teren chrij ri Aquix.

³ Ri e quinimakil ri aj pilisteyib xquic'ot u chi' ri Aquix, xquibij che: “¿Jas caquiban we aj hebrey ri' waral?” Ri Aquix xutzelej u bixic chque: “Are ya' wa' ri David ri qui nimal ri e rajch'ojab ri Saul, ri ajawinel pa Israel. Quieb oxib junab chi c'ut c'olinak wuc', kas pa ri k'ij ri c'olinak wuc' c'a camic man c'o ta jas jun etzelal nu rikom ta pa ri u c'aslemal.”

⁴ Are c'u ri e qui nimakil ri aj pilisteyib xpe coyowal chrij ri Aquix, xquibij c'u che: “Chabij ba' che chi chtzelej pa ri tinimit ri a yo'm che, muj rachilaj c'ut pa ri ch'o'j; mawalij c'u ne chkij aretak nimatajinak ri ch'o'j. ¡Ri utzalaj banoj ri takal u banic rumal rech quel ri royowal ri rajaw, are u c'amic bic ri qui jolom we ajch'ojab ri' chuwäch ri rajaw!

⁵ Kas are' David wa' ri cabixox pa tak ri xojowem: ‘Jun mil (1,000) achijab xecämisax rumal ri Saul, lajuj mil (10,000) xebucämisaj ri David.’ ”

⁶ Xsiq'uix c'u ri David rumal ri Aquix, xubij che: “Sibalaj kastzij jacha' c'asal ri Ajawaxel, chi ri at, at jun suc'alaj achi. Sibalaj c'u kajinak chnuwäch ri caban che u c'amic qui be ri ajch'ojab. Man nu rikom ta jun etzelal pa ri a c'aslemal pa ri k'ij ri at ulinak wuc' man c'u catkaj ta chquiwäch ri e qui nimakil ri aj pilisteyib,

⁷ chattzelej ba', jät c'ut pa jamaril rech man queyojtaj taj ri e qui nimakil ri aj pilisteyib.”

⁸ Ri David xutzelej u bixic che: “¿Jas puch ri nu banom in? ¿Jas ri rikom la pa conojel we k'ijol ri', chi man caj ta la quinch'ojin cuc' ri c'ulel la?”

⁹ Ri Aquix xutzelej u bixic: “Ri in sibalaj jic chnuwäch chi sibalaj at utz jacha' jun aj cajalaj u tako'n ri Dios, are c'u ri e qui nimakil ri aj pilisteyib qui chomam chi man catoc ta kuc' pa ri ch'o'j.

¹⁰ Rumal c'u ri', ri at xukuje' ri e pataninel tak rech ri Ajawaxel ri a Dios ri e petinak awuc' quewalij na chwek, xuwi casakaric, caquitakej ri tzelejem.”

¹¹ Je c'u ri', ri David xukuje' ri rachijab xewalij ak'ab chucab k'ij xetzelej c'u pa ri culew ri aj pilisteyib, xquitakej c'u quelic bic ri aj pilisteyib che u suq'uil ri Jezreel.