Nabe Samuel 22 - Quiché Bible

¹ Ri David xel bic chila' xanimajic xuc'u' rib chupam ri jul ri c'o pa Adulam. Aretak xquetamaj ri ratz xukuje' conojel ri rachalaxic, xekaj bic ruc' chila'.

² Xukuje' xequimulij quib ruc' conojel ri e c'o pa tak c'axc'olil, conojel ri c'o qui c'as xukuje' conojel ri man cäquirik taj jas caquibano, ri David are xux c'amal qui be. Ri quebin ruc' craj e c'o quiejeb sient (400) achijab.

³ Xel c'u bic ri David chila' xbe pa Mizpa, ri c'o pa Moab xubij che ri ajawinel pa Moab: “Quintz'onoj jun tok'ob che la chi ri nu tat xukuje' ri nu nan quecanaj can uc' alak c'ä quinwetamaj na ri cuban ri Dios chwe.”

⁴ Xebuc'am c'u bic ri David ri u tat u nan chuwäch ri ajawinel pa Moab, xec'oji' c'u can ruc' ronojel ri k'ijol ri xc'oji' ri David chupam ri to'bal ib.

⁵ Are c'u ri Gad, ri k'axal tzij, xuya' u no'j ri David xubij che: “Matcanaj chupam ri to'bal ib. Chatakej a be, jät pa ulew re Juda.” Xuban c'ut ri David ri xbix che, xbec, xopan c'u pa ri c'ache'laj ri c'o pa Haret.

Ri qui cämisaxic ri e cojol tak tabal tok'ob pa Nob

⁶ Are c'u ri Saul, c'o pa Gabaa, t'uyul chuxe' ri che' tamarisc ri c'o chunakaj ri k'ijilabal, c'o ri u tz'imaj ch'ich' pu k'ab sutim c'u rij cumal ri rach k'atal tak tzij. Aretak c'u xretamaj chi ri David xukuje' ri rachijab xetamatajic jawije' ri e c'o wi,

⁷ xubij chque ri rach k'atal tak tzij ri qui sutim rij: “Achijab aj Benjamin, chinitatabej: ¿La are pa i c'u'x chi ri u c'ojol ri Isayi quebuya' tak iwulew iwonojel xukuje' tak uva ri e tiquitoj, xukuje' chi iwonojel quebuya' tak iwekle'n, quixucoj che qui nimal tak rajch'ojab?

⁸ Iwonojel ix jun chwij, man c'o ta c'u jun binenak chwe chi ri nu c'ojol u c'ulajim u wäch ruc' ri u c'ojol ri Isayi; man c'o ta c'u jun oquinak ta il chwe; man c'o ta c'u jun bininak ta chwe chi ri nu c'ojol u cojom ri to'l wech che nu c'ulel rech quebutak ri rajch'ojab chwij rech quinkaj pa qui k'ab jas ri u banom camic.”

⁹ Are c'u ri Doeg, ri aj edom, ri c'o apan chquixo'l ri rach k'atal tak tzij ri Saul, xutzelej u bixic cuc' tak we tzij ri', xubij: “Ri in xinwil ri u c'ojol ri Isayi xopan pa Nob che u tzijobexic ri Ahimelec, ri u c'ojol ri Ahitob.

¹⁰ Ri Ahimelec xutz'onoj che ri Ajawaxel ri cuban na ri David, xebuya' bic che ri quebutijo xukuje' xuya' bic ri u ch'ich' re ch'o'j ri Goliat che, ri aj pilistey.”

¹¹ Are c'u ri ajawinel xutak u siq'uixic ri cojol tabal tok'ob ri Ahimelec xukuje' conojel ri cojol tak tabal tok'ob ri e c'o pa Nob, ri e rachalaxic. Aretak c'u xebopan conojel chuwäch ri ajawinel,

¹² ri Saul xubij che ri Ahimelec: “Kas utz nu tatabexic chabana', u c'ojol ri Ahitob.” “In c'o chuxe' ri takanic la, wajawinel,” xcha' ri Ahimelec.

¹³ Ri Saul xuc'ot u chi', xubij che: “¿Jasche ri at xukuje' ri u c'ojol ri Isayi iwalijisam iwib chwij? Ri at a yo'm u caxlanwa xukuje' xaya' jun ch'ich' re ch'o'j che, atz'onom c'u che ri Dios ri cuban na ri David, rech quinuc'ulelaj quinkaj ta c'u na pa u k'ab jas ri u banom camic.”

¹⁴ Ri Ahimelec xutzelej u bixic che ri ajawinel: “¿Jachin ta c'u jun chquixo'l conojel ri quetoban uc' la ri sibalaj ta jic jacha' ri David, ji' c'u la xukuje' are qui nimal ri ajch'ojab ri e c'o pa k'ab la, ri xukuje' sibalaj ya'tal u ya'ic u k'ij pa ri nimalaj achoch la?

¹⁵ ¿La are pa u nabe mul wa' quintz'onoj che ri Dios jas ri rajawaxic cubano? ¡Man je ta wa' ri xc'ulmatajic! Rumal c'u ri', ri lal c'o mak'abaj la chrij we pataninel ech la ri' mawi chquij ri rachalaxic, rumal rech chi ri pataninel ech la mawi jubik' c'o jas reta'm che wa' we xc'ulmatajic ri'.”

¹⁶ Are c'u ri ajawinel xutakej u bixic xubij: “Kas ba chawetamaj, Ahimelec, chi ri at xukuje' conojel ri awachalaxic quixcäm na.”

¹⁷ Xuya' c'u takanic ri ajawinel chque ri e chajil rech, xubij chque: “Chebicämisaj ri e u cojol tabal tok'ob ri Ajawaxel. Xukuje' ri e are' junam qui wäch ruc' ri David, queta'm c'ut chi cätajin canimaj ri David chnuwäch.” E are' c'u ri e chajil rech ri ajawinel man xquichajij ta anima' xquiwalijisaj ta ri qui k'ab che qui cämisaxic ri e u cojol tabal tok'ob ri Ajawaxel.

¹⁸ Rumal c'u ri', ri ajawinel xutak ri Doeg, ri aj edom, xubij che: “Chebacämisaj at.” Xuchap c'u qui cämisaxic ri e cojol tabal tak tok'ob, pa ri k'ij ri' xecämisax jumuch' job (85) achijab ri qui cojom ri atz'iak nim u k'ij re lino chquij.

¹⁹ Xoc c'u pa Nob, qui tinimit ri e cojol tabal tok'ob, ruc' ch'ich' re ch'o'j xebucämisaj achijab, ixokib, ac'alab xukuje' ne'ab ri c'äte xil qui wäch. Xukuje' xebucämisaj wacax, bur xukuje' tak chij.

²⁰ Jun c'ut chque ri u c'ojol ri Ahimelec, ri Abiatar u bi' xcuinic xel chuwäch ri cämisanic, xanimaj bic, xopan c'a ruc' ri David.

²¹ Xubij c'u che chi ri Saul xebucämisaj conojel ri e u cojol tabal tok'ob ri Ajawaxel.

²² Ri David xutzelej u bixic, xubij che: “Ri in xinchomaj pa ri k'ij ri' chi c'o ri Doeg chila', kas cubij na ri' che ri Saul. In ri c'o nu mac chi xecämisax conojel ri awachalaxic.

²³ Chatcanaj can wuc', maxe'j awib, jachin ri cäraj catcämisanic xukuje' craj quinucämisaj in. Man c'o ta c'u cac'ulmaj na wic'.”