Nabe Samuel 17 - Quiché Bible

Ri David xux nim u k'ij pa Israel

¹ Ri aj pilisteyib xequimulij ri cajch'ojab che ch'o'j, xquimulij c'u quib pa Soc, jun tinimit wa' re Juda, xquicholajij quib pa Epes-damim, ri c'o chuxo'l ri Soc ruc' ri Azec.

² Ri Saul xukuje' ri aj israelib xquimulij quib xquicholajij quib pa ri beya' ri c'o pa Ela, cäquisuc'umaj quib che u banic ri ch'o'j cuc' ri aj pilisteyib.

³ We winak ri' qui yo'm quib puwi' ri jun juyub, xukuje' ri aj israelib qui yo'm quib puwi' jun juyub chic, c'o c'u ri beya' chquixo'l.

⁴ Xel c'u ulok chquixo'l ri aj pilisteyib jun ajch'o'j ri craj ne c'o oxib bara' ruc' oxib k'abaj u taq'ui'c. Goliat u bi', are u tinimit ri Gat.

⁵ U cojom jun to'bal jolomaj re k'an ch'ich' che ri u jolom, u cojom jun to'bal uwo c'uxaj, xukuje' re k'an ch'ich', ri cäpajan job arob.

⁶ Ri ch'ich' ri to'bal tak u ch'ec xukuje' re k'an ch'ich' xukuje' ri e u c'abal u ch'ab ri u jequem puwi' ri u teleb.

⁷ Ri u taq'ui'c ri u tz'imaj ch'ich' xak junam ruc' jun tz'imaj ch'ich' re quemebal, ri u tz'imajil ri u wi' re räx ch'ich' cäpajan oxlajuj (13) libra. Benak c'u ri to'l rech chuwäch.

⁸ Ri Goliat xutac'aba' rib xubij chque ri ajch'ojab aj israelib: “¿Jasche ix elinak ulok che u banic ch'o'j? Ri in in jun aj pilistey, are c'u ri ix ix c'o chuxe' ri u takanic ri Saul, chicha' ba' jun chixo'l rech cäkaj ulok che ch'ojinic wuc'.

⁹ We cäticar che nu ch'äquic, ri uj cujux na jacha' lok'om tak pataninelab iwech; we c'u in quinch'äcowic, ri ix quixux na jacha' lok'om tak ka pataninelab.

¹⁰ Pa we k'ij ri', quebentzur ri ajch'ojab ri e c'o pa Israel: ¡Chiya' jun achi chwe ri cäch'ojin wuc'!”

¹¹ Aretak xuta' ri Saul xukuje' conojel ri aj israelib ri e u tzij ri aj pilistey, xpe canima' xenoj c'u che xe'n ib.

¹² C'o jun achi pa Belen Isayi u bi', ri sibalaj nim winak chic pa tak ri u k'ij ri Saul. We achi ri' e c'o wajxakib u c'ojol, jun chque wa' are ri David.

^13-14 Ri e oxib u c'ojol ri e nabeal, ri Eliab, ri Abinadab xukuje' ri Sam, e benak pa ri ch'o'j ruc' ri Saul. Are' c'u ri David ri ch'i'p,

¹⁵ cäbe pa ri kajebal jawije' e c'o wi ri rajch'ojab ri Saul, catzelej c'u pa Belen che qui chajixic ri e u chij ri u tat.

¹⁶ Are' c'u ri aj pilistey ri' quel ulok che qui tzuric ri aj israelib ak'ab xukuje' benak k'ij, je xutakej u banic wa' cawinak (40) k'ij.

¹⁷ C'o c'u jun k'ij ri Isayi xubij che ri David ri u c'ojol: “Chac'ama' juwinak wajxaklajuj (38) libra che we q'uilim trico ri', xukuje' lajuj caxlanwa chebac'ama' bic chanim pa ri ch'o'j chque ri awatz.

¹⁸ Chebac'ama' bic we lajuj (10) quexu ri' caya' che ri qui nimal ri ajch'ojab. Chawila' jas ri qui banom ri awatz chac'ama' ulok jun jasach chwe ri cac'utuwic chi utz qui wäch.”

¹⁹ Are c'u ri Saul xukuje' ri e ratz ri David xukuje' conojel ri aj israelib e c'o pa ri beya' aj Ela cätajin cäquitij qui chuk'ab cuc' ri aj pilisteyib.

²⁰ Ak'ab xwalij ri David che ri ucab k'ij, xebuya' can ri chij pu k'ab jun chic, xutakej ri u be xebuc'am bic ri jastak ri xejach pu k'ab rumal ri Isayi. Aretak xopan pa ri kajebal jawije' ri cätajin wi ri ch'o'j, ri ajch'ojab elem cäquiban bic che u banic ch'o'j, cäquirak c'u qui chi' che u banic ri ch'o'j.

²¹ Ri aj israelib xukuje' ri aj pilisteyib xquicholajij quib xuc'ulaj tak rib qui wäch.

²² Ri David xebujach can ri jastak ri e ruc'am ulok pu k'ab ri chajil que ri jastak quech ri ajch'ojab, caxiq'uinic xbec xunima' rib chquixo'l ri ajch'ojab che u ta'ic chque ri ratz jacha' e c'olic.

²³ Aretak cätajin cätzijon cuc', ri ajch'o'j aj pilistey xebutzur chi jumul ri aj israelib jacha' ri u takem ulok u banic pa tak ri k'ij ri'. Xuta' c'u ri David.

²⁴ Ri aj israelib, xuwi xquilbej u wäch we achi ri', sibalaj xquixe'j quib, xebanimaj chuwäch,

²⁵ je xquibij wa': “¿La xiwil ri achi ri elinak ulok? ¡Petinak che qui tzuric ri aj israelib! Jachin ta ne ri cäticar che u ch'äquic, ri ajawinel cuya' q'ui u k'inomal, cuya' na ri u mia'l che rixokil xukuje' man c'o ta chi tojbal cäquitoj chi na ri e rachalaxic.”

²⁶ Ri David xuc'ot qui chi' ri e c'o pa u xcut, xubij chque: “¿Jas lo ri caya' na che ri achi ri cäcämisan we aj pilistey ri' cuyub c'ut ri u yok'ic ri Israel? ¿Jachin ta c'u ne wa' we pilistey ri' ri k'ijilal diosib rech quebutzur ri rajch'ojab ri c'aslic Dios?”

²⁷ Ri e are' xquitzelej u bixic jas ri qui bim nabe, ri cäya' na che ri cäcämisan ri Goliat.

²⁸ Are c'u ri Eliab, ri ratz ri David, ri xuto jas ri xutzijoj cuc' we achijab ri', xyactaj royowal chrij xubij che: “¿Jas ri xalabana' waral? ¿Jachin ruc' xebaya' wi can conojel tak ri chij ri e c'o pa ri chaki'j uwo sak? In weta'm chi sibalaj at nimol awib xukuje' ri e itzel tak a chomanic, at petinak xak xuwi che rilic ri ch'o'j.”

²⁹ “¿Jas puch ri xbantaj wumal,” xcha' ri David, “xak alicha' in ch'awinak?”

³⁰ Xutas c'u rib chquij ri ratz, aretak xuta' chi che jun, je xbix chi che.

³¹ E c'o c'u jujun ri xquitatabej ri c'otoj chi'aj ri xuban ri David xebe c'u che u bixic che ri Saul, xtak c'u u siq'uixic rumal.

³² Xubij ri David che ri Saul: “C'o ba' matuktub ri ranima' u mac rech we pilistey ri'; ri in c'ut ri in pataninel ech la, quinbe na che ch'ojinic ruc'.”

³³ “Man catcuin taj catbe ta xak a tuquiel che u tijic a chuk'ab ruc' we pilistey ri',” xcha' ri Saul che, “rumal rech chi sibalaj c'ä at ac'al na; are c'u ri are', are' jun ajch'o'j kas pa ri u c'ojolal.”

³⁴ Ri David xutzelej u bixic: “Aretak ri in, ri pataninel ech la, quebenchajij tak ri u chij ri nu tat, we jun coj o jun os capetic cuc'am bic jun chij chquixo'l ri chij,

³⁵ quinterenej quinwesaj c'u pa u chi'; we c'u cäpe chwij quinchap che ri u cacate' quinchap c'u u ch'ayic c'ä quincämisaj na.

³⁶ Pune' ta c'u ne jun coj pune' ta c'u ne os, we pataninel ech la ri' cucämisaj. Are' c'ut we pilistey ri' ri k'ijilal tak diosib je cuc'ulmaj na, u mac rech chi e u tzurum ri e rajch'ojab ri c'aslic Dios.

³⁷ Ri Ajawaxel in u to'tajisam man e cuininak ta ri rixq'uiak ri coj xukuje' ri e rech ri os chwe, xukuje' qui nu to'tajisaj na pu k'ab we pilistey ri'.” Xubij c'u ri Saul che: “Jät, are ba' ri Ajawaxel chatachilanok.”

³⁸ Xtakan c'u ri Saul chi cacoj ri atz'iak chrij ri David cuc' ri atz'iak ri cucoj ri are', xcoj c'u jun to'bal jolomaj re k'an ch'ich' chujolom, xcoj jun to'bal uwo u c'u'x.

³⁹ Chuq'uisbal, ri David xuxequeba' ri ch'ich' re ch'o'j xe' u pam, chrij ri ratz'iak, je u banic wa' xuchaplej binem, man nak'atal ta c'u che qui cojic wa'. Xubij c'u che ri Saul: “Man quincuin taj quinbin ruc' ronojel wa' chwij, rumal rech chi man in nak'atal ta che qui cojic wa'.” Xebujolij conojel wa' chrij,

⁴⁰ xuc'am ri u che', xebucha' job pilim tak abaj pa ri nima', xebuya' chupam ri u ya'l ri ruc'am ulok, c'o c'u ri riquiak' pa u k'ab, xutac'aba' c'u rib chuwäch ri pilistey.

⁴¹ Ri pilistey, nojimal, cätajin cänakajin che ri David. Nabe c'u ri to'l rech chuwäch.

⁴² Aretak ri pilistey xca'y che ri David, xrilo chi xa jun ala, ri quiäk u k'o'tz' ri sibalaj utz cäca'yic, man xoc ta il chuwäch,

⁴³ xane' xubij che: “¿La xa pa u in jun tz'i', chi catpe che nu ch'ayic cuc' che'?” Xuc'okoj c'u ri David pa u bi' ri u dios.

⁴⁴ Xubij chi c'u che: “Tasaj waral, quinya' c'u na ri a ti'jal che qui ti' ri c'uch xukuje' che qui ti' ri juyubal tak awaj.”

⁴⁵ Ri David xutzelej u bixic che: “Ri at at petinak che u banic c'ax chwe ruc' ch'ich' re ch'o'j xukuje' tz'imaj ch'ich' xukuje' u c'abal ch'ab are c'u ri in quinbe che u banic c'ax chawe pa ri u bi' ri Ajawaxel ri c'o ronojel u cuinem, ri qui Dios ri ajch'ojab aj israelib, ri e a tzurum.

⁴⁶ Camic catujach na ri Ajawaxel pa nu k'ab, kas c'u camic catincämisaj na, quinwesaj c'u na ri a jolom, e are' c'u ri cäminak tak ajch'ojab aj pilisteyib quebenya' na chque tak ri c'uch xukuje' chque tak ri juyubal tak awaj, je c'u ri' ronojel ri uwächulew cäretamaj na chi are' kas Dios ri c'o pa Israel;

⁴⁷ conojel ri quimulin quib waral cäquetamaj na chi ri Ajawaxel man cato'tajisan taj ruc' ch'ich' re ch'o'j mawi ruc' tz'imaj ch'ich'. We ch'o'j ri' rech ri Ajawaxel, are c'u quixjachow na ri ix pa ka k'ab.”

⁴⁸ Ri pilistey xwalijic xpe che u c'ulaxic ri David. Ri David xutac'aba' rib chuwäch ri pilistey che u banic ch'o'j ruc':

⁴⁹ xunim ri u k'ab chupam ri u chi'm, xresaj c'u jun abaj, xuq'uiak c'u ruc' ri riquiak' che ri pilistey, xusoc che ri u metz'al ri u palaj. Ruc' ri abaj ri xe' ch'apal che ri u metz'al ri u palaj, ri pilistey jupulic xkaj cho ri ulew.

⁵⁰ Je c'u wa' ri u ch'äquic ri pilistey xuban ri David. Ruc' xa' jun iquiak' xukuje' xa jun abaj, xusoc c'ut ri pilistey xucämisaj c'ut. Man c'o ta c'u ne kok'ebal pu k'ab,

⁵¹ c'ä xiq'uinic xuya' rib pa u xcut ri pilistey, xumajij ri u ch'ich' re ch'o'j, xujusij pa ri rij, ruc' c'u wa' xuq'uis u cämisaxic. Aretak xbantaj wa' xresaj ri u jolom. Aretak xquil ri aj pilisteyib chi xcäm ri cajch'o'j ri sibalaj nim u k'ij, xebanimaj conojel.

⁵² Are c'u ri achijab aj Israel xukuje' ri e aj Juda xequiya' rakoj tak chi'aj re ch'o'j, xebe che cokataxic c'ä xebopan na chuchi' ri tinimit Gat xukuje' c'a chuchi' ri tinimit Ecron. Pa ronojel ri be ri quel pa Saaraim copan c'ä pa Gat xukuje' Ecron xepopoxin can tak ri ajch'ojab aj pilisteyib.

⁵³ Aretak e okatatajinak chic ri aj pilisteyib, ri aj israelib xetzelejic xequijoc bic conojel ri jastak quech ri ajch'ojab aj pilisteyib.

⁵⁴ Xuc'am c'u ri David ri u jolom ri pilistey, xuc'am bic pa Jerusalen, are c'u ri e u chacubal re ch'o'j xebuya' can pa ri u cäbal ri lic'om.

⁵⁵ Ri Saul u c'otom chi c'u u chi' ri Abner, ri quinimal ajch'ojab, aretak xrilo chi benak ri David che u c'ulaxic ri pilistey xubij che: “Abner, ¿jachin ri u tat wa' we ala ri'?”

⁵⁶ “Ruc' chi'nic ri kas cäban na, quincha' che la chi man weta'm taj,” xcha' ri Abner. “Chatatabela' ba',” xcha' ri ajawinel.

⁵⁷ Rumal c'u ri', aretak ri David xtzelej ulok che u cämisaxic ri pilistey, c'ä ruc'am c'u ulok ri u jolom pu k'ab, xc'am rumal ri Abner xuc'am c'u bic chuwäch ri Saul,

⁵⁸ ri xc'ot u chi' rumal, xubij che: “Ala, chabij chwe, ¿Jachin ri a tat?” Ri David xutzelej u bixic che: “Are' nu tat ri Isayi, ri aj Belen, pataninel ech la.”