Nabe Samuel 12 - Quiché Bible

Ri Samuel xujach ri k'atan tzij pu k'ab ri Saul

¹ Xubij c'u ri Samuel chque conojel ri aj israelib: “Ri ix iwilom chi ri in in oquinak il che ronojel ri i tz'onon chwe, xukuje' chi nu cojom c'ut jun iwajawinel.

² Are ajawinel wa' ri cäc'amow na i be. Ri in in ri'jobinak chic xukuje' nojinak chic ri sak pa nu jolom ri e nu c'ojol e c'o chixo'l. C'ä in ac'al aretak xinmajij u c'amic i be, nu c'amom c'u i be c'a pa tak ri k'ij camic,

³ in c'o c'u chiwäch camic: we nu c'amom ri u wacax o ri u bur jachin jun chiwe, o nu banom c'ax o nu yok'om jachin jun chiwe, o we xak ja'e chwe banom u pa nu k'ab iwumal, quixcuinic quinitzujuj chuwäch ri Ajawaxel xukuje' chuwäch ri ajawinel ri cha'om rumal ri Dios, quintoj c'u na ri nu c'as ri c'olic.”

⁴ “Mawi jumul banom la c'ax chke mawi uj yok'om la, mawi c'amom la u pa k'abaj chke,” xecha' ri e are'.

⁵ “Ri Ajawaxel xukuje' ri ajawinel ri cha'om rumal e k'alajisanel chi man in i rikom ta chi in uxinak ta ajchak'mac che jun jasach,” xcha' ri Samuel. “Je wa',” xecha' ri aj israelib.

⁶ Xubij chi c'u ri Samuel che ri tinimit: “Ri Ajawaxel are' ri xbanowic chi rumal ri Moises xukuje' ri Aaron, chi xeresaj ulok ri e i mam pa Ejipt.

⁷ Rumal c'u ri' chi suc'umaj iwib, chuwäch ri Ajawaxel quinya' na qui bixic conojel ri utzil ri e u banom chiwe xukuje' chque ri e i mam.

⁸ Aretak ri Jacob xukuje' ri e rija'lil xekaj bic pa Ejipt, ri e i mam xetzujun chuwäch ri Ajawaxel, ri are c'u ri are' xutak ri Moises xukuje' ri Aaron, ri xebesan ulok ri e i mam xixquijekeba' c'ut pa we c'olbal ri'.

⁹ Xsach c'u ri Ajawaxel pa qui jolom, xebujach c'ut pu k'ab ri Sisara, qui nimal ri e rajch'ojab ri Jabin, ajawinel pa Hazor, xukuje' pa qui k'ab ri aj pilisteyib xukuje' pu k'ab ri rajawinel ri Moab, ri xech'ojin cuc'.

¹⁰ Xquicoj c'u quib chupam chi e macuninak chuwäch ri Ajawaxel aretak xquixutuj canok che qui k'ijilaxic ri e jalan tak u wächbal ri Baal xukuje' ri Astarte, xquitz'onoj c'u tok'ob che chi chebuto', cheresaj pa qui k'ab tak ri qui c'ulel, xquiya' c'u qui tzij chi xuwi cäquik'ijilaj ri are'.

¹¹ Rumal c'u ri' ri Ajawaxel xutak ri Jerobaal, ri Barac, ri Jepte xukuje' ri Samuel che i to'ic pa qui k'ab ri e i c'ulel, je c'u ri' ri ix xixc'oji' pa utzil.

¹² Ri ix aretak c'u xiwilo chi ri Nahas ri cajawinel ri aj amonib are' cäraj cach'ojin iwuc', ri ix xitz'onoj jun ajawinel chwe ri cäk'atow ta na tzij piwi', are c'u ne iwajawinel ri Ajawaxel ri i Dios.

¹³ C'o c'ut ri ajawinel chiwäch ri i rayim. Ri Ajawaxel u yo'm ri ajawinel ri xitz'onoj che.

¹⁴ Ri takal u banic iwumal camic are ri u ya'ic u k'ij ri Ajawaxel xukuje' u ya'ic k'ijilanic che, chixoc il che ri cubij chiwe ma ta c'u ne chinimaj ri e u takomal, we c'u ri ix, xukuje' ri iwajawinel ri cuk'ata' tzij piwi' quixbin chupam ri u rayibal ri Ajawaxel ri i Dios. We c'u je quiban wa', utz quixel na.

¹⁵ We c'u man quixniman che, xane' quebixutuj tak ri e u takomal, cuc'äjisaj na i wäch ix xukuje' ri iwajawinel.

¹⁶ Je c'u ri' chixcanaj pa ri i c'olbal jawije' ri ix c'o wi, quiwil c'u na ri mayibalalaj etal ri cuban na ri Ajawaxel chiwäch.

¹⁷ Camic ri' are k'ijol ri cäk'at ri trico, man c'o ta c'u jäb, ¿la pa kastzij? Are c'u ri in quinta' na tok'ob che ri Ajawaxel chi quebutak c'u na ulok cakulja xukuje' jäb, rech ri ix quiwetamaj xukuje' qui ch'ob c'ut, je jacha' ri caril ri Ajawaxel, ri ix sibalaj itzel ri i banom chi xitz'onoj jun ajawinel.”

¹⁸ Xutz'onoj c'u tok'ob ri Samuel che ri Ajawaxel, chanim c'ut xebutak ulok cakulja xukuje' jäb; ronojel c'u ri tinimit sibalaj xuxe'j rib chuwäch ri Ajawaxel xukuje' chuwäch ri Samuel.

¹⁹ Rumal ri' conojel xquibij che ri Samuel: “Bochi'j ba' la ri Ajawaxel ri Dios la paquiwi' we pataninel tak ech la ri', rech man cujcäm taj; chque c'ut conojel ri ka mac ka tikom ri u tz'onoxic jun ajawinel.”

²⁰ Ri Samuel xutzelej u bixic chque: “Mixe'j iwib. Kastzij chi ri ix sibalaj itzel ri i banom; are c'u ri camic mitas iwib chrij ri Ajawaxel, xane' chik'ijilaj ruc' ronojel iwanima'.

²¹ Mebiterenej tak diosib e subunelab c'ut, ri man quecuin taj quetobanic mawi queto'tajisanic.

²² Are c'u ri Ajawaxel, cuya' na u k'ij ri u bi' nim, man quixuwonoba' ta na; are c'u craj are' quixux u tinimit.

²³ Are c'u ri in minutzokopij ri Ajawaxel chi quinmacun ta chrij are' chi chintanaba' ta tz'ononic piwi' xukuje' ri u c'utic ri utzalaj be chiwäch ri suc'.

²⁴ Ri ix xak xuwi rajawaxic nim quiwil wi na ri Ajawaxel xukuje' ri u ya'ic kas k'ijilanic che ruc' ronojel iwanima', kas c'u chenataj chiwe conojel ri nimak tak jastak ri e u banom chiwe.

²⁵ We c'u are quitakej u banic ri etzelal, ri ix xukuje' ri iwajawinel cäsachisax na i wäch.”