Nabe Ajawinelab 6 - Quiché Bible

Ri Salomon cuyac ri rachoch Dios

¹ Ri Salomon xuchaplej u yaquic ri rachoch ri Ajawaxel pa ri ucaj junab re ri rajawinic pa Israel, pa ri ic' re Zib, are c'u ucab ic' wa' re ri junab, aretak tz'akatinak chic quiejeb sient (400) junab ruc' jumuch' e elinak ulok ri aj israelib pa Ejipt.

² Ri rachoch Dios ri xuyac ri ajawinel Salomon che ri Ajawaxel juwinak oxlajuj (33) bara' u rabic, julajuj (11) bara' u wäch, waklajuj (16) bara' ruc' niq'uiaj xak'anic.

³ Ri rakan ja ri c'o chuwäch ri rachoch Dios julajuj bara' u rabic, junam ruc' ri u wäch, junam ruc' ri u wäch chuwäch ri rachoch Dios, xukuje' job (5) bara' c'ut ruc' niq'uiaj u pam ri rakan ja.

⁴ Ri Salomon xebuban tak wenta'n che ri rachoch Dios cuc' k'atibal,

⁵ xukuje' xuban jun ja ri u tikem rib ruc' ri nim tapia ri sutininak rij ri ja, chrij ri nim tapia ri u sutim rij ri rachoch Dios, jeri' chrij ri nim ja xukuje' ri rech ri jun ja chic ri c'o chuwäch, xebuyac alaj tak ja chquij.

⁶ Ri ja ri u tikem rib ruc' ri nim tapia quetan quieb bara' ruc' oxib k'abaj u wäch; ri c'o pa u niq'uiajil, oxib bara' ruc' quieb k'abaj; ri c'o c'ä chicaj, oxib bara' ruc' oxib k'abaj; ri chrij u jic'om ri retabalil ri rachoch Dios rech man quejut ta ri u tza'm tak ri tem pa tak ri tapia che ri rachoch Dios.

⁷ Pa ri u yaquic ri rachoch Dios xecoj abaj ri tz'akat qui tzoq'uic, jeri' chi aretak xchap u yaquic man xetataj ta pa ri rachoch Dios mawi bajibal mawi tak tzoq'uibal mawi jun chacubal chic re ch'ich'.

⁸ Ri oquibal pa ri ja ri c'o iquim ri c'o pa ri u wiquiak'ab ri rachoch Dios; che ri pakalem pa ri u cawik ja xukuje' ri urox wik ja, c'o jun k'am ri cucotila' rib capakic.

⁹ Aretak ri Salomon xuq'uis u yaquic ri rachoch Dios, xebucoj tak ri che' re chacalte' puwi'.

¹⁰ Xukuje' xuyac ri ja ri c'o chrij ri nim tapia ri c'o chrij ronojel ri rachoch Dios, ri quieb bara' ruc' oxib k'abaj rak'anibem, xebuch'ap che ri nim tapia cuc' tak tem re chacalte'.

¹¹ Ri Ajawaxel xuch'abej ri Salomon xubij che:

^12-13 “Chupam c'ut we rachoch Dios ri' ri cätajin cayaco, quinwaj quinbij chawe chi ri in quintz'akatisaj na ri xinchi'j che ri David, ri a tat, ri xinbij chawij, quinjeki' c'u na chquixo'l ri aj israelib, man quintzak ta canok ri Israel ri nu tinimit, we canimaj tak ri nu pixab xukuje' tak ri e nu takanic, quebatz'akatisaj c'u conojel tak ri e nu takomal je c'u cabano jas tak ri caquibij.”

¹⁴ Ri Salomon xuq'uis u yaquic ri rachoch Dios.

¹⁵ Xuchaplej c'u qui ch'ukic tak ri tapia chupam ri ja cuc' tak tz'alam re chacalte'. Xebuch'uk che tz'alam ajsic c'ä iquim, ronojel ri u pam ri cabinibexic xuch'uk che tz'alam re tz'inchäj.

¹⁶ Xuban chi c'ut jun ja re julajuj (11) bara' chuq'uisbalil ri rachoch Dios, ri xuch'uk ronojel ri u pam ruc' chacalte' iquim c'ä ajsic, xusuc'umaj rech are' wa' ri Sibalaj Tastalicalaj C'olbal.

¹⁷ Ri alaj tak ja ri c'o chuwäch ri rachoch Dios, ri c'o chuwäch ri Sibalaj Tastalicalaj C'olbal juwinak quieb (22) bara' u rabic.

¹⁸ Ronojel ri u pam ri rachoch Dios xch'uk che tz'alam re chacalte' ri banom tak cotz'i'j xukuje' qui wäch tak che chquiwäch tak ri tz'alam. Ronojel re chacalte'. Mawi ta ne jun abaj quilitajic.

¹⁹ Ri Salomon xusuc'umaj ri Sibalaj Tastalicalaj C'olbal chupam ri rachoch Dios, rech chila' cäya' wi ri u caxa ri Ajawaxel.

²⁰ Ri u pam ri Tastalicalaj C'olbal quetan julajuj bara' ri u rabic, julajuj bara' u wäch xukuje' julajuj bara' rak'anibem. Chuwäch ri Tastalicalaj C'olbal, ri Salomon xuban jun porobal re chacalte' xuch'uk c'u rij ruc' k'an puak.

²¹ Xuch'uk c'ut ri u pam ri rachoch Dios ruc' utzalaj k'an puak xukuje' ri Sibalaj Tastalicalaj C'olbal, xebucoj c'u tikom tak k'an puak chuwäch wa'.

²² Jewa' xubano xuch'uk ronojel ri Rachoch Dios ruc' k'an puak, xukuje' je xuban che ri porobal ri c'o chuwäch ri Sibalaj Tastalicalaj C'olbal.

²³ Xebuban c'u quieb qui wächbal ri aj cajalaj tak to'banelab ri e c'o qui xic' re u che'al aseitun che ri Sibalaj Tastalicalaj C'olbal. Chquijujunal quebetan job bara' ruc' niq'uiaj qui taq'ui'c,

²⁴ chquijujunal tak ri qui xic' quebetan quieb bara' ruc' oxib k'abaj. Jeri' chi che ri jun u tza'm, c'ä che ri jun u tza'm chic che ri xic'aj, chquijujunal quebetan jotak bara' ruc' niq'uiaj.

²⁵ Ri quieb wächbal ri aj cajalaj tak to'banelab ri e c'o qui xic' xak junam quetabalil; job bara' ruc' niq'uiaj quebetanic, xukuje' xak junam qui bantajic.

²⁶ Ri qui taq'ui'c xukuje' job bara' ruc' niq'uiaj quebetanic.

²⁷ Ri Salomon xebuya' chupam ri Sibalaj Tastalicalaj C'olbal. We e wächbal ri aj cajalaj tak to'banelab ri' ri e c'o qui xic' qui lic'om ri qui xic', jeri' chi ri u xic' ri jun curik ri jun tapia ri u xic' ri jun chic curik ri jun chi tapia are chi c'u ri quieb xic'aj cäquirik quib pa u niq'uiajil ri Sibalaj Tastalicalaj C'olbal.

²⁸ Ri Salomon xuch'uk quij ri wächbal ri quieb aj cajalaj to'banelab ri e c'o qui xic' ruc' k'an puak.

²⁹ Chquiwäch c'u conojel ri tapia ri e c'o chupam ri Rachoch Dios xukuje' ri e c'o chrij xebuban qui wächbal ri aj cajalaj tak to'banelab ri c'o qui xic', xuban jutak wi' tut xukuje' tak cotz'i'j.

³⁰ Xukuje' ri cäbinibex chupam ri rachoch Dios xuch'uk ruc' k'an puak ri u pam xukuje' ri rij.

³¹ Che ri oquibal chupam ri Tastalicalaj C'olbal xebuban tak oquibal re u che'al aseitun, are c'u ri apal xukuje' ri rakan job tzalaj.

³² Ri quieb oquibal u che'al aseitun, xebuban qui wächbal ri e aj cajalaj to'banelab ri e c'o qui xic' chquiwäch, xebuban jutak wi' tak tut xukuje' tak cotz'i'j, xebuch'uk quij tak we wächbal ri' ruc' k'an puak.

³³ Che ri oquibal chupam ri nimalaj ja ri rech ri rachoch Dios, xebucoj tak rakan ja re u che'al aseitun ri xebux cajtzalaj.

³⁴ Ri quieb u xak ri oquibal e re tz'inchäj, qui cabichal quejak chupam xukuje' chrij.

³⁵ Xebuban qui wächbal ri aj cajalaj tak to'banelab ri e c'o qui xic' chquiwäch, xebuban jutak wi' tut xukuje' tak cotz'i'j, xebuch'uk c'u quij tak ri wächbal ruc' k'an puak.

³⁶ Xusuc'umaj ri u catas uwo ja xucoj oxcholaj tzoc'om tak abaj xukuje' jocholaj tem re chacalte'.

³⁷ Pa ri ucaj junab ri rajawinic ri Salomon, chupam ri ic' re Zib, xecoj ri e u tac'alibal ri rachoch ri Ajawaxel;

³⁸ chupam c'ut ri julajuj junab ri rajawinic Salomon, chupam ri ic' re Bul, are c'u wa' ri uwajxak ic' ri junab, xq'uis u yaquic ri rachoch Dios ruc' ronojel ri u cholajil, jas ronojel ri u banic ri xchomaxic. Wukub junab c'ut xbeytaj u yaquic.