Nabe Ajawinelab 5 - Quiché Bible

Ri c'ulwächinic ri xuban ri Salomon ruc' ri ajawinel re Tir

¹ Aretak ri Hiram ajawinel re Tir, xretamaj chi tastajinak chic ri Salomon che ajawinel, chi are' xcanaj che u q'uexwäch ri David, ri u tat, xebutak bic ri e u q'uexwäch ruc', ri Hiram amak'el nim xril wi ri David.

² Xutak c'u u bixic ri Salomon che ri Hiram:

³ “Ri at aweta'm chic chi ri David, ri nu tat, man xcuintaj xuyac ta jun rachoch ri Ajawaxel ri u Dios, cumal tak ri ch'o'j ri xepe puwi', xuban na ri Ajawaxel chi xch'äcan paquiwi' ri e u c'ulel.

⁴ Are c'u ri camic ri Ajawaxel ri nu Dios u yo'm jamaril chke pa conojel tak ri c'olbal, man e c'o ta ka c'ulel mawi tak c'axc'olil.

⁵ Rumal ri' nu chomam u yaquic jun rachoch ri Ajawaxel ri nu Dios, jacha' ri chi'nic ri xuban che ri David, ri nu tat, aretak xubij che chi ri u c'ojol, ri cuban na che chi cajawin pa ri u c'olbal, are' ri' ri cäyacow na ri rachoch che u ya'ic u k'ij.

⁶ Chaya' ba', takanic, chi chekasax tak chacalte' chwe pa ri Libano. Ri e wajchaquib quetoban na cuc' tak ri awajchaquib ri in quintoj na ri catok'ij chwe che ri tojbal tak quech ri e awajchaquib, ri at kas aweta'm chi man c'o ta jun chke reta'm ta quebuk'at tak ri che' jacha' ri aj sidonib.”

⁷ Ri Hiram aretak xtatabetaj ri xutak u bixic ri Salomon, sibalaj xquicotic xubij c'ut: “¡Tewichital ri Ajawaxel camic rumal rech chi u yo'm che ri David jun u c'ojol ri sibalaj c'o u no'j rech cätakan puwi' we nimalaj tinimit ri'!”

⁸ Xutak c'u u bixic ri Hiram che ri Salomon: “Nu c'amom ri takquil ri a takom ulok chwe, quinya' c'u na ri chacalte' xukuje' ri tz'inchäj ri e a tz'onon.

⁹ Ri wajchaquib quequikasaj ulok pa ri Libano caquiya' c'u chuchi' ri plo, quebentak na bic puwi' ri plo, quebeyok c'u pa ri c'olbal ri cabij chi quebeyok wi. Chila' quequir wi, chila' c'u quebac'am chi wi bic tak ri che'. Ri takal u banic awumal, chi chaya' ri cajwataj chwe, at cattzukunaj na pa ri wachoch.”

¹⁰ Ri Hiram xuya' che ri Salomon ronojel ri che' re chacalte' xukuje' re tz'inchäj ri xraj,

¹¹ ri xuya' ri Salomon che ri Hiram che ri tzukunijic pa ri rachoch: jumuch' quieb mil job sient quintal (82,500) trico xukuje' quieb sient oxc'al olajuj (275) k'ebal ch'ajch'ojalaj aseit re aseitun. Ri Salomon cujach wa' che ri Hiram chujunab.

¹² Je c'u ri', ri Ajawaxel xuya' no'j che ri Salomon, jacha' ri u chi'm che. Ri Hiram xukuje' ri Salomon xquiban jun c'ulwächinic, xc'oji' c'u jamaril chquixo'l.

¹³ Ri Salomon xucoj jun takanic puwi' ronojel Israel chi quemol winak che u banic chac pune' man cacaj, ri quemolic e juwinak lajuj mil (30,000) achijab,

¹⁴ ri quetak bic pa Libano pa jutak k'at, chi jutak ic' quetak bic lajuj mil (10,000) achijab. Je c'u ri' we achijab ri' quec'oji' jun ic' pa ri Libano quieb ic' c'ut quec'oji' cho tak cachoch. Ri cojom paquiwi' che u banic ri chac ri pune' man cacaj are ri Adoniram.

¹⁵ Ri Salomon xebucoj oxc'al lajuj mil (70,000) ekanelab xukuje' jumuch' mil (80,000) tzoc'ol tak abaj pa ri juyub,

¹⁶ man quebajilax ta c'ut ri oxib mil ruc' oxib sient (3,300) ri e cojom paquiwi' tak ri chac, ri quetakan paquiwi' tak ri ajchaquib.

¹⁷ Ri ajawinel xtakan che quesaxic nimak tak abaj ri pakal tak cajil ri quecoj che ri u tiq'uilibal ri rachoch Dios, xukuje' tzoc'om tak abaj.

¹⁸ Ri rajchaquib ri Salomon xukuje' ri e rech ri Hiram, xukuje' tak ri e c'ulja aj Jebal, xequisuc'umaj tak ri che' xukuje' xequitzoc' tak ri abaj ri quebajwataj che u yaquic ri rachoch Dios.