Nabe Ajawinelab 15 - Quiché Bible

Ri rajawinic ri Abiam pa Juda

¹ Ri Abiam xuchaplej ajawinic pa Juda pa ri wajxaklajuj (18) junab rech ri rajawinic ri Jeroboam (ri u tat ri Jeroboam are' ri Nabat).

² Oxib junab xajawin pa Jerusalen. Maac u bi' ri u nan, u mia'l ri Absalon.

³ Ri Abiam xebuban ri junam tak macaj ri xebuban ri u tat nabe, man xux ta c'u jic ri ranima' che u nimaxic ri Ajawaxel ri u Dios, jacha' ri xuban ri David ri e u mam.

⁴ Xa' c'u, che u tok'obisaxic u wäch ri David, ri Ajawaxel xuya' c'olbal chi cutakej nicowem ri u chäj pa Jerusalen, aretak xucoj ri u c'ojol puwi' ri tem re ajawibal che can u q'uexwäch xukuje' che co u tac'abaxic ri Jerusalen;

⁵ ri David utz xbinic xya' c'u u k'ij rumal ri Ajawaxel, mawi jubik' xutas ta rib che u nimaxic u banic ri xtakan wi ri Ajawaxel, xuwi ri etzelal ri xuban che ri Uriy ri aj hitit.

⁶ Amak'el xc'oji' ch'o'j chquixo'l ri Roboam ruc' ri Jeroboam joropa' k'ij xc'asi' ri Roboam.

⁷ Xukuje' xc'oji' ch'o'j chquixo'l ri Abiam ruc' ri Jeroboam. Ri q'uisbal u tzijobelil ri Abiam xukuje' ronojel ri xubano, e tz'ibatal chupam ri wuj rech ri qui tzijobelil tak ri ajawinelab aj Juda.

⁸ Aretak c'u xcäm ri Abiam, xmuk chupam ri u Tinimit ri David. Are' chi c'u xajawin ri As ri u c'ojol pa ri u c'olbal.

Ri rajawinic ri As pa Juda

⁹ Ri As xuchaplej ri ajawinic pa Juda pa ri juwinak (20) junab rech ri rajawinic ri Jeroboam pa Israel,

¹⁰ cawinak jun (41) junab c'ut xajawin pa Jerusalen. Ri rati't Maac u bi' u mia'l c'ut ri Absalon.

¹¹ Ri e u banoj tak ri As e utz xeril ri Ajawaxel, je xubano jas ri xebuban ri David ri e u mam.

¹² Xerokataj bic ri achijab chrij ri ulew ri cuc'axic quib cuc' achijab ixokib che qui banic macunic jacha' ta ne jun k'ijilanic, xeresaj c'u conojel ri e diosib ri xequiban ri e qui mam.

¹³ Xukuje' xeresaj ri u nimarisaxic u k'ij ri nanaxel ajawinel che ri Maac, ri rati't, rumal chi u takom u banic jun u wächbal ri Asera. Ri As xusachisaj u wäch we wächbal ri', xuporoj c'u pa ri nima' Sedron.

¹⁴ Pune' c'u man xebesax taj tak ri k'ijilabal ri quek'ijilax wi tak ri diosib, ri As amak'el xux jic chuwäch ri Ajawaxel,

¹⁵ xuya' c'u chupam ri rachoch ri Ajawaxel ri k'an puak ri sak puak ri u bim are' xukuje' ri u tat chi e rech ri Ajawaxel.

Ri As xujunamaj u tzij ruc' ri Ben-adad

¹⁶ Amak'el xc'oji' ch'o'j chquixo'l ri As ruc' ri Baas, ajawinel re Israel.

¹⁷ Aretak ri Baas xbe che u banic ch'o'j ruc' ri Juda, utzalaj u tz'apixic rij ri Rama xubano rech man c'o ta jachin catzijoben ri ajawinel re Juda.

¹⁸ Xpe c'u ri As xuc'am ronojel ri k'an puak xukuje' ri sak puak ri c'ä e c'o chupam ri u k'inomal ri rachoch ri Ajawaxel xukuje' ri rachoch ri ajawinel, xubij c'u chque ri e rach k'atal tak tzij chi chquic'ama' bic che ri Ben-adad, ajawinel re Siriy, u c'ojol c'ut ri Tabrimon ri' u mam ri Hezion, c'o c'ut ri u jekelibal pa Damasc. Xutak c'u u bixic we takquil ri' che:

¹⁹ “Kabana' jun c'ulwächinic awuc', jacha' ri xequiban ri e ka tat. Nu takom bic k'an puak xukuje' sak puak chawe jacha' sipanic. Chatuquij ri c'ulwächinic ri a banom ruc' ri Baas, ajawinel re Israel, quinuya' c'u na can ri' pa jamaril.”

²⁰ Ri Ben-adad xuc'am ri xutak u bixic ri ajawinel As che xebutak c'u bic ri e qui nimakil tak ri e rajch'ojab che qui ch'äquic tak ri tinimit re Israel. Xuch'äc c'ut ri Ijon, ri Dan, ri Abel-bet-Maac, ronojel ri Sineret xukuje' ronojel ri ulew re Neptali.

²¹ Aretak xretamaj ri Baas, xutanaba' u yaquic ri Rama xtzelej c'u pa Tirs.

²² Are c'u ri ajawinel As xutak u siq'uixic ronojel ri Juda, man c'o ta jun ri ma ta xopanic, xequic'am bic ri abaj ri che' ri cätajin cucoj ri Baas che u tz'apixic ri Rama, ri ajawinel As xebucoj wa' che u tz'apixic ri Jeb re Benjamin xukuje' ri Mizpa.

Ri u cämical ri As

²³ Ri u q'uisbalil ri tz'akatalaj u tzijobelil ri As xukuje' tak ri e u cuinem, ri jastak ri xubano, xukuje' tak tinimit ri xebuyaco, e tz'ibatal chupam ri wuj ri c'o wi ri qui tzijobelil tak ri ajawinelab re Juda. Pa ri u ri'jobic, xeburik yabil ri e rakan ri As;

²⁴ aretak c'u xcämic xmuk cuc' ri e u mam chupam ri u Tinimit ri David. Are chi xajawin ri u c'ojol che u q'uexwäch, ri Josapat u bi'.

Rajawinic ri Nadab pa Israel

²⁵ Pa ri ucab junab ri rajawinic ri As pa Juda, ri Nadab, u c'ojol ri Jeroboam, xuchaplej ajawinic pa Israel, quieb junab c'ut xbeytaj ri rajawinic.

²⁶ Man utz ta c'ut xril ri Ajawaxel ri e u banoj; xebuban ri junam tak macaj ri xuban ri u tat, ri xbanowic chi xemacun tak ri aj israelib.

²⁷ Are c'u ri Baas, u c'ojol ri Ahiy, ri aj ramak' ri Isacar, xuban jun walijisam ib chrij xucämisaj c'ut pa Jibeton, tinimit aj pilistey ri sutim rij rumal ri Nadab e rachil conojel ri ajch'ojab aj israelib.

²⁸ Ri Baas xucämisaj ri Nadab pa ri urox u junab rech ri rajawinic ri As pa Juda, are' c'u xajawin pa ri u c'olbal.

²⁹ Xuchaplej ajawinic, xebucämisaj conojel ri e rachalaxic ri Jeroboam. Jas ri xuya' u bixic ri Ajawaxel rumal ri Ahiy pa Sil, ri Baas xuq'uis qui cämisaxic conojel ri e rachalaxic ri Jeroboam. Man c'o ta jun xuc'asba' canok.

³⁰ Je c'u xc'ulmataj wa' qui mac quech tak ri macaj ri xuban ri Jeroboam, ri xbanowic chi xemacun tak ri aj israelib, are c'u wa' ri xquiyacbej royowal ri Ajawaxel, ri u Dios ri Israel.

³¹ Ri u q'uisbalil ri u tzijobelil ri Nadab che ronojel ri xubano, e tz'ibatal chupam ri wuj rech ri qui tzijobelil tak ri ajawinelab pa Israel.

³² Amak'el xc'oji' ch'o'j chuxo'l ri As ruc' ri Baas ajawinel pa Israel.

Rajawinic ri Baas pa Israel

³³ Pa ri urox junab rech ri rajawinic ri As pa Juda, ri Baas u c'ojol ri Ahiy, xuchaplej ajawinic pa Tirs puwi' ronojel Israel, juwinak quiejeb (24) junab c'ut xajawinic.

³⁴ Ri e u banoj tak ri Baas man e utz ta xeril ri Ajawaxel, xebuban c'ut ri junam tak macaj ri xebuban ri Jeroboam, ri xbanowic chi xemacun ri aj israelib.