Marcos 6 - Quiché Bible

Ri Jesus pa Nazaret

¹ Ri Jesus xel bic chila', xopan pa ri rulew. Ri e u tijoxelab xquiterenej.

² Pa ri k'ij re uxlanem, xuchaplej tijonic pa ri ja ri cäquitijoj wi quib ri aj judeyib che ri pixab. E q'ui winak xquita' ri u tzij. Xquimayo, xquibij: “¿Jawije' xretamaj wi ri are' we jastak ri'? ¿Jas ri no'j ri yo'm che, chi cuban nimak tak mayibal?

³ ¿La ma ta are wa' ri ajanel, ri ral ri Mariy, cachalal ri Santiag, ri Jose, ri Juds xukuje' ri Simon? ¿La ma ta e c'o xukuje' ri e rana'b kuc', waral? Cuban c'u quieb qui c'u'x chrij.”

⁴ Ri Jesus c'ut xubij chque: “Xuwi pa ri u tinimit, chquixo'l ri rachalaxic, cho rachoch, man nim ta quil wi jun k'axal tzij.”

⁵ Man xcuin ta c'u che u banic jun nimalaj mayibal chila'. Xuwi xebuya' ri u k'ab paquiwi' quieb oxib yawabib, xebucunaj c'ut.

⁶ Xumayo rumal rech chi man c'o ta qui cojonic. Xebusolij ri alaj tak tinimit catijon c'ut.

Ri Jesus xebutak bic ri u tijoxelab che u tzijoxic ri rajawibal ri Dios

⁷ Ri Jesus xebusiq'uij ri cablajuj, xebutak bic pa cacabil. Xuya' takanic pa qui k'ab paquiwi' ri itzel tak uxlabal.

⁸ Xebutako chi c'o jas mäquic'am bic che ri qui binem, mawi qui wa, mawi qui chi'm, mawi qui rajil pa ri c'olbal re, xane' xuwi ri qui ch'amiy.

⁹ Xtakan chque chi chquicojo' bic qui xajäb, mäquicoj c'u bic quieb catz'iak.

¹⁰ Xubij chque: “Apawije' ri quixoc wi pa jun ja, chixcanaj can chila' c'ä quixel na bic pa ri tinimit ri'.

¹¹ Apachique c'olbal ri man quixc'ulax ta wi, ri man cäquitatabej ta wi ri i tzij, aretak quixel bic chila', chitota' can ri puc'uc' ulew ri c'o pa iwakan. Jeri' quik'alajisaj chquiwäch chi man utz taj qui banom.”

¹² Xebel c'u bic ri tijoxelab che u bixic chque ri winak, chi chetzelej ruc' ri Dios.

¹³ Xequesaj q'ui itzel tak uxlabal chque ri winak. Xequibil q'ui yawabib ruc' aseit, xequicunaj c'ut.

Xcämisax ri Xuan Bautist

¹⁴ Ri ajawinel Herod xuta' u tzijol ri Jesus, ri elinak u tzijol pa conojel c'olbal. E c'o jujun caquibij: “Are ri Xuan Bautist xc'astaj chquixo'l ri cäminakib. Rumal ri' c'o u chuk'ab che u banic nimak tak mayibal.”

¹⁵ Ri niq'uiaj chic xquibij: “Are ri Eliy.” Ri e jule' chic xquibij: “Are jun k'axal tzij, je jas jun chque ri e k'axal tak tzij ojer.”

¹⁶ Aretak xuta' ri Herod, xubij: “Ri Xuan, ri xinwesaj u jolom, are wa' xc'astaj ulok chquixo'l ri cäminakib.”

¹⁷ Are c'u ri Herod xtakan che u cojic ri Xuan pa che'; je xuban ri Herod wa' u mac rech chi ri Herody (ri rixokil ri Pelip, ri rachalal). Ri Herod xuc'am ri Herody che rixokil.

¹⁸ Ri Xuan xubij che ri Herod: “Awas che la chi cac'oji' ri rixokil ri achalal la uc' la.”

¹⁹ Ri Herody xpe royowal chrij ri Xuan, are ta xraj xucämisaj; man xcuin ta c'ut.

²⁰ Ri Herod nim c'u xril wi ri Xuan. Reta'm chi are' suc', xukuje' achi tastalic. Xuchajij pa che' rech man cäpe ta c'ax chrij. Aretak c'u cutatabej ri u tzij ri Xuan, man curik taj jas cubano. Pune' ta ne jeri', sibalaj cäkaj chuwäch ri Herod cutatabej ri cubij.

²¹ Xopan jun k'ij aretak xya' che ri Herody chi cuban jas ri cäraj. Xurik ri nimak'ij re u tz'akatisaxic u junab ri Herod. Xuban c'u jun nimalaj wa'im chque ri nimak qui k'ij ri e c'o ruc', chque ri qui nimakil ri ajch'ojab xukuje' chque ri nimak qui k'ij pa Galiley.

²² Ri ral ali ri Herody xoc bic, cäxojowic. Xkaj c'u chquiwäch ri Herod xukuje' ri e c'o ruc'. Ri ajawinel xubij che ri ali: “Chata' chwe ri cawaj, quinya' c'u na chawe.”

²³ Xuban ri chi'nic ri kas cäban na ruc': “Apachique ta ne ri cata' chwe, quinya' na chawe, pune' ta ne pa niq'uiaj che ri wajawibal.”

²⁴ Xel bic ri ali, xubij che ri u nan: “¿Jas ri quinta' che?” Ri are' xubij: “Chata' ri u jolom ri Xuan Bautist.”

²⁵ Te c'u ri', ri ali aninak xoc bic chuwäch ri ajawinel, xuta' tok'ob che, xubij: “Quinwaj chi caya' la chwe chanim pa jun liq'uilic lak ri u jolom ri Xuan Bautist.”

²⁶ Ri ajawinel sibalaj xbisonic, rumal c'u ri e u chi'nic ri kas queban na chquiwäch ri e c'o ruc' pa ri mexa, man xuya' ta c'ut xuk'il ta rib che ri xtz'onox che.

²⁷ Ri ajawinel chanim xutak bic jun chque ri ajch'ojab che u c'amic ulok ri u jolom ri Xuan Bautist.

²⁸ Xbe c'ut ri ajch'o'j pa ri che' xeresaj ulok ri u jolom ri Xuan, xuya' pa jun liq'uilic lak. Xuya' che ri ali, ri ali c'ut xuya' che ri u nan.

²⁹ Ri e u tijoxelab ri Xuan, aretak xquito, xepetic, xequic'am ulok ri u cuerp, xquiya' pa jun mukubal.

Ri Jesus xuya' qui wa job mil achijab

³⁰ Xetzelej c'u ulok ri takomxenlab che u rikic quib ruc' ri Jesus, xquitzijoj che ronojel ri xquibano xukuje' ronojel ri tijonic ri xquiya' chque ri winak.

³¹ Ri Jesus xubij chque: “Tisaj ix pa i tuquiel wi pa jun c'olbal cätz'inowic, chixuxlan jubik'.” Rumal rech chi e q'ui ri winak ri queboquic quebelic mawi c'u ne cuya' quewa'ic.

³² Xebe pa jun jucub qui tuquiel, xebe pa jun c'olbal cätz'inowic.

³³ Q'ui c'ut ri xebilowic, xquich'ob qui wäch. Xebel ulok q'ui winak pa conojel ri tinimit, xebe q'ui winak chila' chi cakan, nabe xebopan chquiwäch.

³⁴ Aretak xel ulok ri Jesus pa ri jucub, xeril q'uialaj winak. Xel u c'u'x chque, rumal rech chi e je ta ne e chij ri man c'o ta cajyuk'. Xuchaplej qui tijoxic chque q'ui jastak.

³⁵ Benak chi c'u ri k'ij, ri tijoxelab xekeb ruc' ri Jesus, xquibij: “Tz'inowel ri c'olbal, benak chi ri k'ij.

³⁶ Chejacha' la bic ri winak rech quebe pa tak ri juyub xukuje' pa ri alaj tak tinimit ri e c'o apanok, che u lok'ic ri cäquitijo.”

³⁷ Ri Jesus xubij chque: “Chiya' ix chque ri cäquitijo.” Xquibij che: “¿La cujbe ta che u lok'ic quieb sient chicäch caxlanwa rech caquitijo?”

³⁸ Ri Jesus xubij chque: “¿Joropa' caxlanwa e c'o iwuc'? Jiwilampe'.” Aretak xquetamaj, xquibij: “E c'o job caxlanwa xukuje' quieb cär.”

³⁹ Ri Jesus xtakanic chi conojel ri winak chet'uyul pa tak mulaj puwi' ri räx k'ayes.

⁴⁰ Xet'uyi' pa tak mulaj: pa tak sient, pa niq'uiaj tak sient.

⁴¹ Ri Jesus xebuc'am ri job caxlanwa xukuje' ri quieb cär, xca'y chicaj, xumaltioxij che ri Dios, xebupir ri caxlanwa. Xebuya' chque ri u tijoxelab, rech quequiya' chquiwäch ri winak. Xukuje' ri quieb cär xebujach chquiwäch conojel.

⁴² Conojel xewa'ic, xenojic.

⁴³ Te c'u ri' xquiyac ri ch'akatak caxlanwa ri ch'akatak cär ri man xequiq'uis taj, are cablajuj chicäch nojinak.

⁴⁴ E job mil (5,000) c'ut ri achijab ri xquitij que ri wa.

Ri Jesus xbin puwi' ri cho

⁴⁵ Te c'u ri' ri Jesus xebutak ri u tijoxelab chi cheboc pa ri jucub, chi chenabej chuwäch ch'käp che ri cho pa Betsaid. Ri are' c'ut xcanaj can jok'otaj che qui jachic can ri winak.

⁴⁶ Aretak e u jachom chi bic, xbe pa ri juyub che u banic ch'awem ruc' Dios.

⁴⁷ Aretak xk'ekal chic, ri jucub c'o pa u niq'uiajil ri cho. Ri Jesus u tuquiel c'o can cho ri ulew.

⁴⁸ Xrilo chi ri u tijoxelab cäquirik c'ax che u binebisaxic ri jucub, rumal rech chi ri quiakik' petinak chquiwäch. C'olacraj cäpe ri sakaric, xpe c'u ri Jesus, cäbin puwi' ri cho, raj xoc'ow chquiwäch.

⁴⁹ Aretak xquilo chi cäbin puwi' ri cho, xquichomaj chi xibinel, xquirak qui chi'.

⁵⁰ Conojel c'ut xquilo, xquixe'j quib. Chanim ri are' c'ut xebuch'abej, xubij chque: “Chijiquiba' i c'u'x. In wa', mixe'j iwib.”

⁵¹ Xoc cuc' pa ri jucub, xtäni' c'u ri quiakik'. E are c'u ri u tijoxelab sibalaj c'u xemayinic.

⁵² Man qui ch'obom ta c'u ri mayibal ri xuban ri Jesus ruc' ri caxlanwa, xane' co ri canima'.

Ri Jesus xebucunaj ri yawabib pa Jenesaret

⁵³ E k'axenak chi c'ut, puwi' ri cho xebopan chuchi' ri ulew pa jun c'olbal Jenesaret u bi', ri xquixim wi ri jucub chuchi' ri cho.

⁵⁴ Xuwi c'u xebel pa ri jucub, ri winak xquich'oboxtaj u wäch ri Jesus.

⁵⁵ Xquibinibej c'u ronojel ri Jenesaret. Ri winak xequic'am ulok ri yawabib cho ch'atum tak che', xebopan pa ronojel tak c'olbal ri xquito chi c'o wi ri Jesus.

⁵⁶ Apawije' c'ut ri copan wi ri Jesus, pa ri alaj tak tinimit, pa tak ri tinimit, o pa tak ri juyub, ri winak quequiya' ulok ri yawabib cho tak ri c'ayibal. Xquibochi'j ri Jesus chi xuwi ta ne cäquichap ocok ri u chi' ri u k'u'. Conojel c'ut ri xechapowic, xecunatajic.