Marcos 5 - Quiché Bible

Ri achi aj Jeras ri c'o itzel uxlabal che

¹ Xebopan ch'käp che ri cho, pa ri culew ri aj Jeras.

² Elinak chi bic ri Jesus pa ri jucub, chanim xel ulok jun achi chquixo'l ri mukubal, ri c'o jun itzel uxlabal che.

³ Chila' c'u jekel wi chquixo'l ri mukubal. Man c'o ta jun cäcuin che u ximic, mawi ne cuc' tikom ch'ich'.

⁴ Q'ui mul ximom ri e rakan xukuje' ri e u k'ab cuc' tikom tak ch'ich', quebuc'äjij c'u ri tikom tak ch'ich'. Man c'o ta c'u jun cäcuinic cätakan puwi'.

⁵ Ronojel k'ij, chi chak'ab chi pa k'ij cäc'oji' ri achi chquixo'l ri mukubal, pa tak ri juyub. Curak u chi', cusoc rib che abaj.

⁶ Aretak xril apan ri Jesus chi naj, aninak xbec, xxuqui' chuwäch.

⁷ Xurak u chi' ruc' chuk'ab, xubij: “¿Jas awe chwe, Jesus, u C'ojol ri Dios ri sibalaj aj chicaj? Catinbochi'j chuwäch ri Dios, maban c'ax chwe.”

⁸ Rumal rech chi u bim ri Jesus che: “Itzelalaj uxlabal, chatel che ri achi.”

⁹ Ri Jesus xucot u chi': “¿Jas a bi'?” Ri are' xutzelej u bixic: “ ‘Sibalaj uj Q'ui’ ri nu bi', rumal rech chi uj q'ui.”

¹⁰ Sibalaj xubochi'j ri Jesus chi mätakanic chi chebel bic pa ri c'olbal ri'.

¹¹ E c'o c'u apan nimalaj jumulaj ak chunakaj ri juyub ri queyuk'uxic.

¹² Ri itzel tak uxlabal xquibochi'j ri Jesus, xquibij: “Chujataka bic cuc' ri ak, rech cujoc chquipam.”

¹³ Ri Jesus xuya' c'u chque. Xebel bic ri itzel tak uxlabal che ri achi, xeboc bic chquipam ri ak. Ri cäraj e quieb mil (2000) ri ak xquiq'uiak biquib tza'm ri juyub c'ä xejik' pa ri cho.

¹⁴ Are c'u ri e yuk'ul tak ak xebanimajic. Xequiya' u tzijol pa ri tinimit pa tak ri juyub. Xepe c'u ri winak che rilic jas ri xc'ulmaxic.

¹⁵ Xebopan ruc' ri Jesus. Xquil ri achi ri xec'oji' q'ui itzel tak uxlabal che, t'uyulic chi c'ut u cojom chic ratz'iak, utz chic ri u chomanic. Xquixe'j c'u quib ri winak.

¹⁶ Are c'u ri winak ri xquil ri xc'ulmatajic, xquitzijoj chque ri niq'uiaj chic jas ri xuc'ulmaj ri achi ri xc'oji' ri itzel uxlabal che xukuje' jas ri xquic'ulmaj ri ak.

¹⁷ Xquichaplej c'u u bochi'xic ri Jesus chi chel bic pa ri culew.

¹⁸ Aretak xoc ri Jesus pa ri jucub, ri achi ri xc'oji' ri itzel uxlabal che xubochi'j chi cäbe ruc'.

¹⁹ Ri Jesus man xuya' ta che, xane' xubij che: “Jät cho awachoch cuc' ri e awachalaxic. Chaya' u tzijoxic chque ronojel ri u banom ri Ajawaxel chawe, jas xubano xel u c'u'x chawe.”

²⁰ Xel bic ri achi, xuchaplej u tzijoxic pa tak ri Lajuj Tinimit ronojel ri u banom ri Jesus che. Conojel c'ut xquimayo.

Ri u mia'l ri Jair, xukuje' ri ixok ri xuchap ocok ri ratz'iak ri Jesus

²¹ Xoc ri Jesus pa ri jucub, xk'ax chi jumul ch'käp che ri cho. Aretak xopan chila', xquimulij quib q'uialaj winak ruc'. Xcanaj c'u chuchi' ri cho.

²² Xpe jun achi, Jair u bi', are qui nimal ri e c'o pa ri ja ri cäquitijoj wi quib ri aj judeyib che ri pixab. Aretak xril ri Jesus, xumej rib chuwäch.

²³ Sibalaj xubochi'j, xubij: “Ri nu mia'l cämic cubano. Saj la, cheya' ri k'ab la puwi' rech cutziric, cäc'asi c'ut.”

²⁴ Ri Jesus xbe ruc', e q'ui winak xeteri bic chrij, cäquipitz' c'ut.

²⁵ C'o jun ixok chquixo'l, c'o chi cablajuj junab xak quel u quiq'uel.

²⁶ Sibalaj u rikom c'ax cumal q'ui tak cunanelab. U sachom ronojel ri c'o ruc', man c'o ta c'u rechbem, xane' catajin cänimatajic.

²⁷ Aretak xuta' u tzijol ri Jesus, xopan chrij chquixo'l ri q'uialaj winak, xuchap ocok ri u k'u'.

²⁸ Xuchomaj: “Xuwi ta ne quinchap ocok ri u k'u', quinutzir c'u na.”

²⁹ Chanim xtäni' ri u quiq'uel ri quelic. Xuna' pa ri u cuerp chi xcunataj che ri yabil.

³⁰ Ri Jesus xuna' chi c'o chuk'ab xel che. Xutzolk'omij rib chquixo'l ri q'uialaj winak, xubij: “¿Jachin xchapow ri watz'iak?”

³¹ Xquibij ri u tijoxelab che: “Quil la chi ri q'uialaj winak capitz' la cumal. Jas c'u che cabij la: ‘¿Jachin xchapow ri watz'iak?’ ”

³² Ri Jesus c'ut xca'y chque conojel che rilic jachin ri xbanow wa'.

³³ Xuxe'j c'u rib ri ixok, cäbirbitic, xuna' c'ut chi xcunatajic. Xpetic, xumej rib chuwäch ri Jesus, xubij ronojel ri kastzij ri xc'ulmataj ruc'.

³⁴ Ri Jesus xubij che: “Nu mia'l, rumal ri a cojonic xatcunatajic. Jät pa jamaril, xatcunataj c'u che ri a yab.”

³⁵ C'ä cätajin catzijon ri Jesus aretak xebopan jujun aj uwo rachoch ri Jair, ri cätakan pa ri ja ri cäquitijoj wi quib ri aj judeyib che ri pixab. Xquibij che: “Ri a mia'l xcämic. ¿Jasche c'ä caya' latz' che ri Ajtij?”

³⁶ Ri Jesus xuta' ri qui tzij, xubij che ri Jair: “Maxe'j awib, xuwi chatcojonok.”

³⁷ Man xuya' ta c'u ri Jesus chi c'o jun cäteri bic chrij, xane' xuwi ri Lu', ri Santiag, ri Xuan ri rachalal ri Santiag.

³⁸ Xebopan cho rachoch ri achi ri nim u banic. Xril ri Jesus chi ri winak qui tuquin quib, sibalaj quebok'ic, sibalaj cäquirak qui chi'.

³⁹ Xoc pa ja, xubij chque: “¿Jasche quituquij iwib, quixok'ic? Ri ac'al man cäminak taj, xa' cäwaric.”

⁴⁰ Ri winak cäquitze'j u wäch. Ri Jesus xeresaj bic conojel, xebuc'am ri u tat u nan ri ac'al xukuje' ri e c'o ruc', xeboc bic jawije' ri tutz'ul wi ri ac'al.

⁴¹ Xuchap c'u ri u k'ab ri ac'al, xubij che: “Tabit cum.” Je quel cubij wa' pa ri ka ch'abal: “Ali, quinbij chawe, chatwalijok.”

⁴² Chanim xwalij ri ali, xbinic. Cablajuj chi c'u u junab. Ri winak xquimayo, xsach qui c'u'x.

⁴³ Ri Jesus sibalaj xebupixbej chi mäquetamaj wa' ri niq'uiaj winak chic. Xubij chque chi chquiya' u wa ri ali.