Marcos 3 - Quiché Bible

Jun achi chaki'j u k'ab

¹ Ri Jesus xoc chi bic jumul pa ri ja ri cäquitijoj wi quib ri aj judeyib che ri pixab. C'o c'u jun achi chila' chaki'jarinak jun u k'ab.

² Cäquil c'ut ri cuban na ri Jesus, we cucunaj ri achi pa ri k'ij re uxlanem. We jeri', c'o caquitzujubej rech.

³ Ri Jesus xubij che ri achi ri chaki'j u k'ab: “Chatwalijok. Chatc'ol pa ka niq'uiajil.”

⁴ Xubij c'u ri Jesus chque ri winak: “¿La cuya' cäban utzil pa ri k'ij re uxlanem o cäban etzelal? ¿La utz ri cäcol ri u c'aslemal jun winak o cäcämisaxic?” Ri e are' c'ut man xech'aw taj.

⁵ Xpe royowal ri Jesus chque, xebuca'yej ri winak ri e c'o pa tak u xcut. Xk'oxow ri ranima', rumal rech chi sibalaj co ri canima'. Xubij che ri achi: “Chayuku' ri a k'ab.” Ri achi xuyuku, ri u k'ab c'ut xcunatajic.

⁶ Chanim xebel bic ri pariseyib, xquichomaj cuc' ri aj herodianib jas cäquiban che u cämisaxic ri Jesus.

E c'o e q'ui winak chuchi' ri cho

⁷ Are c'u ri Jesus xbe apan chuchi' ri cho e rachilam ri e u tijoxelab.

⁸ Terenetal c'u cumal q'uialaj winak kas pa Galiley, aj Judey, aj Jerusalen xukuje' aj Idumey. E petinak ch'käp che ri nima' Jordan, e petinak chquinakaj tak ri tinimit Tir xukuje' Sidon. Sibalaj e q'ui ri winak, qui tom ronojel jas ri cuban ri Jesus, xebopan c'u ruc'.

⁹ Xubij chque ri u tijoxelab chi xak chc'ol jun jucub che, rech man cäpitz' ta cumal ri q'uialaj winak.

¹⁰ Xebucunaj e q'ui winak, jeri' chi conojel ri yawabib caquich'iquimila' quib che u chapic ri Jesus.

¹¹ Ri itzel tak uxlabal, aretak xquil ri Jesus, xexuqui' chuwäch, xquirak qui chi', xquibij: “At ri' ri u C'ojol ri Dios.”

¹² Ri Jesus c'ut xebutako chi mäquik'alajisaj chquiwäch ri winak jachin ri are'.

Ri Jesus xebucha' ri cablajuj u takomxenlab

¹³ Ri Jesus xpaki' cho ri juyub, xebusiq'uij jachin tak ri xraj, xebopan c'u ruc'.

¹⁴ Xebucha' cablajuj takomxenlab, rech quec'oji' ruc', quebutak bic che u tzijoxic ri u tzij chque ri winak, ri xucoj takomxenlab che qui bi',

¹⁵ rech cuya' takanic pa qui k'ab che quesaxic itzel tak uxlabal.

¹⁶ Are' c'u wa' ri cablajuj ri xebucha'o. Ri Simon ri xucoj Lu' che ucab u bi';

¹⁷ ri Santiag u c'ojol ri Zebedey, ri Xuan ri rachalal, ri Jesus xucoj Boanerjes che ucab qui bi', (quel cubij wa' chi e je jas ri cakulja);

¹⁸ ri Trix, ri Pelip, ri Bartolome, ri Matey, ri Max, ri Santiag u c'ojol ri Alpey, ri Tadey, ri Simon re ri juk'at cananeyib,

¹⁹ xukuje' ri Judas Iscariot ri jachal re ri Jesus.

Ri winak xquibij chi ri Jesus c'o ri u cuinem ri itzel ruc'

²⁰ Xoc c'ut ri Jesus cho jun ja e rachil ri u tijoxelab. Jumul chic xquimulij quib q'uialaj winak cuc', jeri' chi mawi ne quecuin che u tijic qui wa.

²¹ Aretak xquita' ri rachalal ri Jesus, xebe ruc' che u chapic, cäquibij c'ut: “Are' ch'ujirinak.”

²² Ri ajtijab re ri pixab ri e kajinak ulok pa Jerusalen, cäquibij chi c'o ri Beelzebu ruc'. Cäquibij chi queresaj itzel tak uxlabal rumal ri qui nimal ri itzel tak uxlabal.

²³ Ri Jesus xebusiq'uij, xubij chque pa c'ambal tak no'j: “¿La cuya' lo chi ri Satanas cäresaj bic ri Satanas?

²⁴ We c'o jun ajawibal quieb u banom cuc'ulela' c'u rib we ajawibal ri', man cäcuin ta ri' cajeki'c.

²⁵ We c'o jun ja winak quieb u banom cuc'ulela' c'u rib, man cäcuin ta ri' cajeki'c.

²⁶ We ta u tasom rib ri Satanas, cäch'ojin ta c'u ri' chrij chbil rib, ma ta cäcuin ri' cäjekic, xane' cäsach ta u wäch ri'.

²⁷ Man cäcuin ta jun coc pa rachoch jun achi ri c'o u chuk'ab, quebutokij ri jastak rech, we ta ma ta nabe cuyut na ri achi ri c'o u chuk'ab. C'äte ri' cutokij ri jastak ri c'o pa rachoch.

²⁸ Quinjiquiba' u bixic chiwe chi ri Dios cuya' na ri sachbal macaj chque ri winak chque conojel ri qui mac xukuje' ronojel ri lawaloyil ri caquibij;

²⁹ are' c'ut ri cuyok' ri Ruxlabal re ri Dios mawi jumul cusach na u mac, cacanaj ajchak'mac chbe k'ij sak.”

³⁰ Ri Jesus xubij wa' rumal rech chi ri e are' caquijiquiba' u bixic chi c'o jun tz'ilalaj uxlabal ruc'.

Ri u nan xukuje' ri e rachalal ri Jesus

³¹ Xepe c'u ri rachalal xukuje' ri u nan ri Jesus, e tac'atoj apan cho ja. Xetakan che u siq'uixic.

³² Ri Jesus sutim rij cumal ri q'uialaj winak ri e t'uyut'oj, xbix c'u che: “Chawilampe', ri a nan e rachil ri awachalal e c'o apan cho ja, catquitzucuj.”

³³ Ri Jesus xubij chque: “¿Jachin ri nu nan? ¿Jachin tak ri wachalal?”

³⁴ Xebuca'yej ri winak ri e t'uyut'oj pa tak u xcut, xubij: “Chebiwilampe' ri nu nan xukuje' ri e wachalal.

³⁵ Apachin ri cuban ri u rayibal ri Dios, are ri' ri wachalal, ri wana'b, xukuje' ri nu nan.”