Hechos 6 - Quiché Bible

Xecoj wukub pataninelab

¹ Pa tak ri k'ij ri', aretak cätajin queq'uiyir ri cojonelab, ri quech'aw pa grieg xquiyac wixwitem chquij ri quech'aw pa hebrey, cäquibij chi aretak quepatanix ri malca'nib chuchuyib ronojel k'ij, ri qui malca'nib ri e are' man quepatanix taj.

² Je c'u ri' ri cablajuj takomxenlab xequisiq'uij conojel ri cojonelab, xquibij chque: “Man utz taj chi ri uj cäkaya' can ri u tzijoxic ri u tzij ri Dios che u jachic ri wa pa tak ri mexa.

³ Chebitzucuj ba wukub achijab chixo'l, kachalal, ri k'alaj chi e nojinak che ri Uxlabaxel, xukuje' c'o qui no'j, rech quekacoj pa we chac ri'.

⁴ Are c'u ri uj cujc'oji' amak'el pa ri ch'awem ruc' Dios xukuje' pa ri u tzijoxic ri u tzij ri Dios.”

⁵ Xkaj ri tzij chquiwäch conojel, xequicha' c'ut ri Estebn, are jun achi nojinak che cojonic xukuje' nojinak che ri Ruxlabal ri Dios, xukuje' xequicha' ri Pelip, ri Procr, ri Nicanor, ri Timon, ri Parmens xukuje' ri Nicolas ri aj Antioquiy ri u c'amom ri qui cojonic ri aj judeyib.

⁶ Xequic'am c'u bic chquiwäch ri takomxenlab. Xquiban ch'awem ruc' Dios, xquiya' ri qui k'ab paquiwi'.

⁷ Cätajin cäq'uiy ri u tzij ri Dios, ri cojonelab sibalaj queq'uiyir pa Jerusalen. Xukuje' sibalaj e q'ui chque ri e cojol tabal tok'ob aj judeyib xeniman che ri cojonic.

Xc'am bic ri Estebn chquiwäch ri nimak qui banic

⁸ Ri Estebn nojinak che tok'ob xukuje' ri u cuinem ri Dios. Ri are' cuban nimak tak mayibal xukuje' nimak tak etal chquixo'l ri winak.

⁹ Jujun chque ri e c'o pa ri ja ri cäquitijoj wi quib ri aj judeyib che ri pixab ri binam Tzokopim tak Winak chque, junam cuc' jujun tak aj Siren, aj Alejandriy, aj Silisiy, ri e aj Asiy, xquichaplej chomanic ruc' ri Estebn.

¹⁰ Man xecuin ta c'u ri winak che u to'ic quib chuwäch ri u tzij, rumal rech chi yo'm u no'j rumal ri Ruxlabal ri Dios.

¹¹ Xequitoj c'u jujun achijab, xequicoj qui c'u'x che u bixic: “Ka tom chi ri Estebn cuyok' ri Moises xukuje' cuyok' ri Dios.”

¹² Aretak xquita' we tzij ri', xyactaj coyowal ri winak. Xepe ri winak xukuje' ri e nimak tak tatayib xukuje' ri ajtijab re ri pixab; xepe chrij ri Estebn, xquichapo, xquic'am ulok chquiwäch ri k'atal tak tzij.

¹³ Xequitac'aba' achijab chquiwäch ri k'atal tak tzij, rech cäquiban tzij chrij ri Estebn, ri e are' xquibij: “We achi ri' man cutanaba' ta u yok'ic we tastalicalaj c'olbal ri' xukuje' u yok'ic ri pixab.

¹⁴ Ka tom chi cubij, chi we Jesus ri' ri aj Nazaret cuwulij na ri rachoch Dios ri', quebuq'uex na ri nak'atisabal ri e u yo'm can ri Moises chke.”

¹⁵ Ri e k'atal tak tzij xukuje' ri e t'uyut'oj chila', conojel queca'y che ri Estebn. Xquil ri u palaj je jas ri u palaj jun tako'n aj caj.