Hechos 20 - Quiché Bible

Ri Pawl xbe pa Masedon xukuje' pa Gres

¹ Aretak xtäni' ri tuquin ib, ri Pawl xebusiq'uij ri cojonelab. Xebupixbej, xebuch'abej canok. Xel bic, xbe pa Masedon.

² Xoc'ow pa tak ri tinimit ri e c'o chila', xebupixbej ri cojonelab, q'ui tzij xubij chque. Te c'u ri', xopan pa Gres.

³ Xcanaj c'u can oxib ic' chila'. Aretak c'u benam rech pa Siriy puwi' ri plo ri aj judeyib xquichomaj u cämisaxic, xuchomaj c'ut u tzelejic pa Masedon.

⁴ Xachilax bic rumal ri Sopater u c'ojol ri Pir aj Berey, ri Aristarc xukuje' ri Segund, ri aj tesalonib, ri Gay aj Derb, ri Timotey, ri Tiquico xukuje' ri Tropim, ri e aj Asiy.

⁵ E are wa' xenabej bic, xujqueyej pa Troas.

⁶ Ri uj c'ut, aretak e oc'owinak chi tak ri k'ij re ri caxlanwa ri man caya' ta ch'am ruc', xujel bic pa Pilips, xujbe puwi' ri plo. Oc'owinak chi c'u job k'ij xujopan cuc' ri kachil pa Troas. Xujc'oji' wukub k'ij chila'.

Ri Pawl xebusolij ri cojonelab pa Troas

⁷ Pa ri nabe k'ij c'ut re ri seman, xkamulij kib che u piric ri caxlanwa. Ri Pawl xebutijoj ri cojonelab; xtzijon chquiwäch c'ä pa niq'uiaj ak'ab, rumal rech chi chucab k'ij quel na bic chila'.

⁸ E c'o c'u q'ui chäj e tzijom pa ri oxwik ja ri ka mulin wi kib.

⁹ C'o jun ala Eutic u bi', t'uyul chuchi' ri wenta'n. Ri are' xc'amtaj rumal jun nimalaj waram, rumal rech chi ri Pawl sibalaj xuyuk rakan ri u tzijonic. Sibalaj warinak chic, xtzak bic chuchi' ri oxwik ja c'ä iquim. Cäminak chic xwalijisaxic.

¹⁰ Xkaj c'u bic ri Pawl, xjupi' chrij, xuk'aluj, xubij: “Mixe'j iwib. Ri ala c'aslic.”

¹¹ Xpaki' c'ut, xupir ri caxlanwa. Aretak wokinak chic, sibalaj naj xtzijonic c'ä xpe na u sakaric. Te c'u ri' xel bic.

¹² C'asal c'u ri ala xc'am bic sibalaj c'u xcu'bi qui c'u'x rumal wa.

Ri Pawl xel bic pa Troas, xbe pa Milet

¹³ Ri uj c'ut xujnabej chupam ri nim jucub, xujbe puwi' ri plo pa Aso, che roc'owebexic bic ri Pawl, jacha' ri chomanic ri banom are' c'u xraj xbe che rakan.

¹⁴ Aretak xurik rib kuc' pa Aso, xkac'am bic pa ri jucub. Xujbec, xujopan pa Mitilen.

¹⁵ Xujel bic chila', xujbe puwi' ri plo. Chucab k'ij xujopan chuwäch ri Quiyo. Chucab k'ij chic xujopan pa Samos. Chucab k'ij chic xujopan pa Milet.

¹⁶ U chomam chi c'u ri Pawl chi xak coc'ow chuwäch ri Epes. Man cäraj taj cutzak u k'ij pa Asiy. Cäraj c'ut cäbe aninak, rech cäroc'owisaj ri nimak'ij quech ri cawinak lajuj k'ij (50) pa Jerusalen, we cäcuinic.

Ri Pawl xebutzijobej tak ri tatayib ri quetakan ri comon cojonelab pa Epes

¹⁷ Aretak c'o pa Milet, xtakan che qui siq'uixic tak ri tatayib ri quetakan ri comon cojonelab pa Epes.

¹⁸ Aretak xebopan ruc', xubij chque: “Ix quich'obo jas ri nu c'olem chixo'l ronojel k'ij, kas pa ri nabe k'ij aretak xinopan pa Asiy.

¹⁹ Man xinnimarisaj ta wib, nu patanim ri Ajawaxel ruc' ok'ej. Nu rikom c'ax rumal ri xquichomaj u banic ri aj judeyib chwe.

²⁰ Man c'o ta jun jasach ri c'o quechbex che, ri ma ta xinbij chiwe, ronojel xixintijoj che, chquiwäch ri winak xukuje' pa tak iwachoch.

²¹ Xink'alajisaj chquiwäch ri aj judeyib xukuje' ri man aj judeyib taj chi rajawaxic cäquiq'uex qui c'u'x chuwäch ri Dios. Xinbij chque chi rajawaxic quecojon che ri Kajaw Jesus.

²² Are c'u ri camic, chiwilampe'. Ri Uxlabaxel u bim chwe chi rajawaxic quinbe pa Jerusalen. Man weta'm taj jas ri quinc'ulmaj na chila'.

²³ Xak xuwi weta'm chi pa tak conojel tinimit ri Ruxlabal ri Dios cuk'alajisaj chnuwäch chi quinqueyej ri u pa che' xukuje' ri c'axc'olil.

²⁴ Man are ta quinwilij ri nu c'aslemal, man quinnimarisaj ta u k'ij ri nu c'aslemal, rech jeri' quinq'uis na ri nu chac ruc' quicotemal. Jeri' quintz'akatisaj na ri patan ri xinc'am che ri Ajawaxel Jesus, are ri u k'alajisaxic ri utzalaj tak tzij, ri cubij chi ri Dios u banom tok'ob chque ri winak.

²⁵ Camic c'ut, in weta'm chi iwonojel ix, ri xinoc'ow iwuc' che u tzijoxic ri rajawibal ri Dios, man quiwil ta chi jumul ri nu wäch.

²⁶ Rumal c'u ri', quink'alajisaj chiwäch pa we k'ij ri' camic, chi we c'o jun cäcäm pa ri u mac, kas chrij quel wi, man nu mac ta chic in.

²⁷ Nu tzijom c'u ronojel ri u chomanic ri Dios chiwe. Man c'o ta jas ma ta xinbij chiwe.

²⁸ Chichajij iwib. Chichajij ronojel ri jumulaj chij ri yo'm pa i k'ab rumal ri Ruxlabal ri Dios. Xuya' pa i k'ab rech quebiyuk'uj ri e comon cojonelab rech ri Dios, ri xebulok' ruc' ri u quiq'uel.

²⁹ Weta'm c'ut chi aretak in benak chic, queboc na winak chixo'l e je ta ne c'a'nalaj tak utiw, ri cäcan na c'ax chque ri jumulaj chij.

³⁰ Xukuje' chixo'l ix quewalij wi na winak ri cäquitzijoj na jech'laj tak jastak, rech ri e cojonelab, queteri c'u bic chquij.

³¹ Rumal c'u ri' chixc'asc'atok. Chnataj chiwe jas xinban in chixo'l. Oxib junab chi chak'ab chi pa k'ij, man xintanaba' ta i pixbexic chijujunal cuc' tak ok'ej.

³² Camic c'ut, wachalal, quixinjach pa u k'ab ri Dios. Are' cäcuin che i yaquic xukuje' pa ri u tzij re lok'obal c'u'x. Cuya' ronojel ri u chi'm che ri tastalicalaj u tinimit.

³³ Man nu rayim ta c'u u wäch ri u sak puak, o ri u k'an puak, o ri ratz'iak jachin jun.

³⁴ Ix c'ut iweta'm chi xinchacun cuc' ri nu k'ab rech xinch'äc ri xajwataj chwe xukuje' ri xajwataj chque ri e c'o wuc'.

³⁵ Pa ronojel xinc'ut chiwäch chi je chixchacun wa'. Jeri' quebito' ri c'o cajwataj chque. Chnataj ta c'u chiwe ri u tzij ri Ajawaxel Jesus, ri xubij: Are' sibalaj utz na re ri cäyanic chuwäch ri cäc'amowic.”

³⁶ Aretak xbitaj wa', ri Pawl xxuquic, xuban ch'awem ruc' Dios cuc' conojel.

³⁷ Conojel c'ut sibalaj xebok'ic. Xquilak'apuj ri Pawl, xquitz'umaj.

³⁸ Sibalaj quebisonic rumal rech ri tzij ri xubij, chi man cäquil ta chi u wäch. Te c'u ri' xcachilaj bic c'ä xopan ruc' ri nim jucub.