Elem 34 - Quiché Bible

Ri c'ac' tak abaj ri xetz'ibax wi ri pixab

¹ Ri Ajawaxel xubij che ri Moises: “Chebaramij quieb tz'alam tak abaj junam cuc' ri quieb ri xecoj can nabe, rech quebentz'ibaj ri tzij chquiwäch, ri xetz'ibax chquiwäch ri nabe tz'alam tak abaj, ri xebapaxij.

² Chasuc'umaj awib chwek ak'ab, rech catpaki' puwi' ri juyub Sinai, quinaweyej c'u pa ri c'olbal ri naj elinak chicaj.

³ Mawi jun winak cäpaki' ta awuc', mawi c'o jun militaj u wäch pa ronojel ri juyub; mawi chij, mawi wacax meyuk'ux cho ri juyub.”

⁴ Ri Moises xuramij quieb tz'alam tak abaj junam cuc' ri quieb nabe. Ak'ab c'ut chucab k'ij xebuc'am bic ri quieb tz'alam tak abaj, xpaki' puwi' ri juyub Sinai, jacha' ri takanic ri xuya' ri Ajawaxel che.

⁵ Xkaj c'u ulok ri Ajawaxel pa jun sutz', xc'oji' c'u chila' ruc' ri Moises, xubij c'ut ri kas u bi'.

⁶ Xoc'ow chuwäch ri Moises, je xubij wa' co u bixic ri kas u bi' xubij: “¡Ri Ajawaxel! ¡Ri Ajawaxel! ¡Dios junalic, xukuje' tok'obisal wächaj, coch'onel xukuje' nim pa lok'ok'ebal c'uxaj xukuje' kastzij!

⁷ Ri cäcanaj jic pa ri lok'ok'ebal u c'u'x paquiwi' q'ui mil tak ija'lil, xukuje' cusach mac che ri banoj etzelal, ri c'ulelanic xukuje' ri macaj; mawi c'u jubik' ma ta cuc'äjisaj u wäch ri ajchak'mac, xane' cuc'äjisaj qui wäch ri quetzelal ri tataxelab paquiwi' ri alc'ualxelab, paquiwi' ri e i tak mam, paquiwi' ri e xiquin tak mam, xukuje' paquiwi' ri e calc'ual ri e xiquin tak mam.”

⁸ Chanim xumej rib ri Moises, xuk'ijilaj ri Ajawaxel xubij:

⁹ “¡Ajawaxel! ¡Ajawaxel! We kastzij chi in lok' chwäch la, chujachilaj la bic. We winak ri' kastzij sibalaj e tac, xa ba' sacha' la ri ka mac, ri ketzelal, chujc'ama' che tinimit la.”

Cäjal ri c'ulwächinic

¹⁰ Ri Ajawaxel xubij: “Chixtatabenok: In quinban camic jun c'ulwächinic ruc' ronojel ri a tinimit. Quebenban na mayibal tak jastak ri mawi jumul e banom pa jun nim tinimit chic ri c'o cho ri uwächulew, conojel c'u ri winak ri e c'o chquinakaj cäquil na ri cäcuin ri Ajawaxel che u banic, e mayibal tak c'ut ri quebenbana' na iwuc'.

¹¹ Chebitz'akatisaj ba' qui banic ri ix nu takom wi camic, are c'u ri in quebenwesaj bic chiwäch ri aj amoreyib, ri aj cananeyib, ri aj hititib, ri aj perezeyib, ri aj hebeyib, ri aj jebuseyib.

¹² Miban jun c'ulwächinic cuc' ri winak ri e jekel chupam ri ulew ri quixoc wi na, rech mequiban chiwe chi quixkaj chupam ri qui c'amibal.

¹³ Xane' chebiyojij ri qui porobal, chebic'äjij conojel tak ri abaj ri quequik'ijilaj xukuje' tak cuta'm ri e tastalic.

¹⁴ Mik'ijilaj jule' tak dios chic, rumal rech chi ri Ajawaxel achixomanel. Dios achixomanel ri u bi'.

¹⁵ Miban jun c'ulwächinic cuc' ri winak ri e jekel chupam we ulew ri', mäc'ulmataj ne chi aretak cäquimej quib che qui k'ijilaxic ri e qui diosib, aretak quequiya' tabal tok'ob chquiwäch, quixcula'j ta c'ut, quitij ta c'u iwech we tabal tak tok'ob ri',

¹⁶ o quequic'ulba' ta ne ri qui mia'l cuc' tak ri i c'ojol, aretak c'ut quequik'ijilaj tak ri e qui diosib, quequitakchi'j ta c'u ne tak ri e i c'ojol che u mejic quib chquiwäch che qui k'ijilaxic.

¹⁷ Mawi jumul mebiban ix i diosib re tzacom ch'ich'.”

Ri nimak k'ij ri queboc'owisax chujunab

¹⁸ “Chiwoc'owisaj ri nimak'ij re ri caxlanwa ri man cäya' ta ch'am ruc', je roc'owisaxic quibano jacha' ri takanic ri nu yo'm chiwe, wukub k'ij quitij caxlanwa ri man cäya' ta ch'am ruc'. Ri u k'ijol are ri ic' Abib, chupam c'ut we ic' ri' xixel ulok pa Ejipt.

¹⁹ Ronojel alc'ualaxel ala ri nabeal, wech in, xukuje' ri nabe tak cal ri e i wacax, ri e i chij, ri e i q'uisic', we ama' ri cäcalaj e wech in.

²⁰ Are c'u ri quiban che ri nabe ral ri ati't bur we ama' ri cäralaj, rajawaxic quiya' jun alaj chij o jun alaj q'uisic' che u q'uexwäch ri alaj bur; we c'u man quiya', qui k'ajisaj na ri rij u wi' ri alaj bur. Xukuje' rajawaxic quiya' jun sipanic che qui q'uexwäch ri e nabeal tak i c'ojol chquijujunal. C'o c'u jun mape che wilic we man c'o jas cuc'am ulok.

²¹ Wakib k'ij chixchacunok, pa ri uwuk k'ij chixuxlanok, pune' pa u k'ijol ticonijic o pa u k'ijol k'atoj.

²² Chiwoc'owisaj ri nimak'ij quech ri wukutak k'ij, ri quech ri nabe tak qui wächinic ri trico, xukuje' ri nimak'ij aretak cäq'uis u yaquic tak ri qui wäch ri tico'n q'uisbal re ri junab.

²³ Conojel ri e iwachijab rajawaxic pa jun junab cutac'aba' na rib oxmul chuwäch ri Ajawaxel ri u Dios ri Israel.

²⁴ Ri in c'ut quebenwesaj na bic ri niq'uiaj nimak tak tinimit chic chiwäch, quinnimarisaj na u wäch ri iwulew. Jeri' man c'o ta jun cuchajij ta anima' che u majic ri iwulew aretak quixbe che u tac'abaxic iwib chuwäch ri Ajawaxel ri i Dios oxmul pa ri jun junab.

²⁵ Aretak quebiya' ri awaj che tabal tok'ob, merachilaj quic' xukuje' caxlanwa ri cäya' ch'am ruc', mawi quic'ol ta can ri cäto'taj canok che ri cäpil che ri Oc'owem che ri ucab k'ij.

²⁶ Rajawaxic quebic'am bic ri nabe utzalaj tak qui wächinic ri e iwulew pa ri rachoch ri Ajawaxel. Mebitzac ri alaj tak q'uisic' chupam ri u leche ri qui nan.”

Ri Moises cutz'ibaj ri pixab

²⁷ Ri Ajawaxel xubij che ri Moises: “Chebatz'ibaj tak we tzij ri', are c'u wa' ri qui tac'alibal tak ri c'ulwächinic ri quiban awuc' xukuje' cuc' ri aj israelib.”

²⁸ Ri Moises xcanaj can cawinak (40) k'ij, cawinak (40) ak'ab ruc' ri Ajawaxel, man xwa' taj mawi xuq'uianic. Xebutz'ibaj c'u ri tzij re ri pixab chquiwäch tz'alam tak abaj, are wa' ri e lajuj takomal.

²⁹ Aretak xto'taj ri Moises, xkaj ulok chuxe' ri juyub Sinai e ruc'am ulok ri quieb tz'alam tak abaj ri e tz'ibatal wi ri pixab, man c'o ta c'u cunabej chi ri u palaj cäjuluwic rumal rech chi xtzijon ruc' ri Ajawaxel.

³⁰ Aretak ri Aaron xukuje' conojel ri aj israelib xquil ri u palaj ri Moises chi cäjuluwic, xquixe'j quib, man xekeb ta ruc'.

³¹ Xesiq'uix c'u rumal ri Moises, ri Aaron e rachil conojel ri c'amal tak qui be ri aj israelib aretak xebopan ruc' ri Moises, ri Moises xtzijon cuc'.

³² Chumatam chi jubik' xekeb conojel ri aj israelib, xebuya' c'u conojel ri takanic chque ri e u yo'm ulok ri Ajawaxel che puwi' ri juyub Sinai.

³³ Aretak c'u xto'taj che tzij cuc', xuch'uk ri u palaj.

³⁴ Aretak ri Moises coc chuwäch ri Ajawaxel che u tzijobexic, cresaj ri ch'ukubal chupalaj c'ä quel na ulok. Cuk'alajisaj c'u chquiwäch ri aj israelib ri takanic ri yo'm ulok che rumal ri Ajawaxel.

³⁵ Aretak cäquil ri aj israelib chi cäjuluw ri u palaj ri Moises, ri Moises cucoj chi jumul ri ch'ukubal chupalaj, c'äte cresaj aretak coc chi jumul che u tzijobexic ri Ajawaxel.