Elem 32 - Quiché Bible

¹ Xquil c'u ri aj israelib chi, xbeytaj ri Moises che ri u kajic ulok puwi' ri juyub, xquimulij quib chrij ri Aaron, xquibij che: “Chatwalijok, chebabana' ka diosib ri cäc'amow ka be, ri Moises ri xujesan ulok pa Ejipt, man keta'm taj jas ri xuc'ulmaj.”

² Ri Aaron xubij chque: “Chebiwesaj ba ri e u wi' tak xiquinaj re k'an puak ri e c'o che tak ri qui xiquin ri e iwixokil, ri e i c'ojol, ri e i mia'l, chebic'ama' ulok chwe waral.”

³ Conojel c'ut xquesaj ri u wi' tak qui xiquin re k'an puak ri e qui cojom che tak ri qui xiquin, xequijach pa u k'ab ri Aaron,

⁴ xuc'am c'u chque, xuja'risaj ri k'an puak pa k'ak', xuban jun alaj ama' wacax, conojel c'ut je xquibij wa': “¡Israel, are a dios wa' ri xatesan ulok pa Ejipt!”

⁵ Aretak ri Aaron xril wa', xuwoc jun porobal chuwäch ri alaj ama' wacax, xuchap u rakic u chi', xubij: “Chwek cäkaban jun nimak'ij che u ya'ic u k'ij ri Ajawaxel.”

⁶ Ak'ab xewalij chucab k'ij, xequiya' tabal tak tok'ob ri quechajirisaxic, xukuje' tabal tak tok'ob che utzirisan ib. C'äte c'u ri xt'uyi c'u ri tinimit che wa'im, xuq'uianic, aretak xnojic xwalij che etz'enem.

⁷ Ri Ajawaxel xubij che ri Moises: “Jät, chatkaj bic, ri awinakil ri xebawesaj ulok pa Ejipt, e kajinak pa mac.

⁸ Chanim c'ut xquitas quib che ri be ri xebentak che u ternexic. Xquija'risaj k'an puak, xquiban jun alaj ama' wacax, cätajin cäquik'ijilaj, xukuje' cätajin cäquiya' tabal tok'ob chuwäch, cäquibij c'ut: ‘Israel, are a dios wa' ri xatesan ulok pa Ejipt.’”

⁹ Xubij chi ri Ajawaxel che ri Moises: “E wilom we winak ri', kas c'u wilom chi sibalaj co caquitac'aba' quib.

¹⁰ ¡Camic chinaya' can pa jamaril nicowirinak c'u ri woyowal quinsachisaj na qui wäch! Ri in quinban na chawe jun nimalaj tinimit.”

¹¹ Ri Moises xuta' tok'ob che ri Ajawaxel ri u Dios, xubij: “Ajawaxel, ¿jas ta che cäk'ak'ar ri oyowal la puwi' ri tinimit la ri xesaj la ulok pa Ejipt ruc' ri nimalaj cuinem la?

¹² ¿Jas ta che cäya' la be chi cäquibij ri aj ejiptib: ‘Ri Dios xeresaj bic waral ruc' ri itzel u chomanic che qui cämisaxic pa tak ri c'ache'laj, che u sachisaxic qui wäch cho ri uwächulew?’ Chk'ila' ba' la ri nimalaj oyowal la, chel c'u'x la mäc'äjisaj la u wäch ri tinimit la.

¹³ Chenataj ri e pataninel tak ech la che la, ri Abraham, ri Isaac, xukuje' ri Israel, xcha' la chque ri chi'nic ri kas cäban na pa ri bi' la: ‘Quinbano chi ri e u wi' tak i mam sibalaj queq'uiyiric jacha' ri ch'imil ri e c'o pa ri caj, ronojel c'u we ulew ri' ri nu chi'm chiwe, quinya' che quechbal re chbe k'ij sak.’”

¹⁴ Xuk'il c'u rib ri Ajawaxel che ri c'ax ri u chomam u banic puwi' ri u tinimit.

¹⁵ Xkaj c'u ulok ri Moises puwi' ri juyub, u c'amom ulok ri quieb tz'alam tak abaj ri e tz'ibatal wi ri pixab, tz'ibatal c'u ri caperaj qui wäch.

¹⁶ Kas c'u are' ri Dios xbanow ri quieb tz'alam tak abaj, xukuje' kas are' ri Dios xtz'iban ri c'o chquiwäch ri abaj.

¹⁷ Ri Josue aretak xuta' ri qui rakoj chi'aj ri winak, xubij che ri Moises: “Rakoj tak chi'aj re ch'o'j cätataj chquixo'l ri aj israelib.”

¹⁸ Ri Moises xubij che: “Man rakoj chi'aj taj re ch'o'j mawi rakoj chi'aj re bis, e jule' tak rakoj chi'aj chic ri quinto.”

¹⁹ Aretak c'u xopan ri Moises cuc' ri aj israelib, xril ri alaj ama' wacax ri qui banom, xukuje' ri xojowem ri cätajin cäquibano, xk'ak'ar ri royowal, xebuq'uiak ri tz'alam tak abaj ri e ruc'am ulok, xebuc'äjij chuxe' ri juyub;

²⁰ xuc'am c'u ri alaj ama' wacax ri qui banom, xuq'uiak pa ri k'ak' xjaric, xtakan che u joq'uic c'ä xc'äjir na, we c'äjil ri' xujopij puwi' ri ja'; xebutak c'u ri aj israelib che ruq'uiaxic ri ja'.

²¹ Xubij c'u ri Moises che ri Aaron: “¿Jas ri xuban we tinimit ri' chawe chi xebatakchi'j che u banic jun nimalaj mac?”

²² Ri Aaron xubij che ri Moises: “Matoyowar wuc', wajaw. Aweta'm chi we winak ri' are cäkaj ri u banic ri etzelal chquiwäch.

²³ Xquibij c'u chwe: ‘Chabana' jun ka dios ri cäc'amow ka be, man keta'm ta c'ut jas xuc'ulmaj we Moises ri' ri xujesan ulok pa Ejipt.’

²⁴ Xinbij c'u chque: ‘Jachin ri c'o k'an puak ruc', chuc'ama' ulok.’ Xelquiya' c'u ri k'an puak chwe, ri in xinya' pa ri k'ak', ¡xel c'u we alaj ama' wacax ri'!”

²⁵ Xril c'u ri Moises chi ri aj israelib xak e tzokopitalic qui yo'm quib pa yok'ic cumal ri qui c'ulel, man e k'ilom ta c'ut rumal ri Aaron,

²⁶ xtaq'ui' ri Moises chuchi' ri roquibal ri kajebal, xurak u chi', xubij c'ut: “Jachin tak ri qui yo'm qui tzij che u ternexic ri Ajawaxel, chepet wuc'.” Conojel c'u ri aj levitib, xquimulij quib ruc' ri Moises.

²⁷ Xubij c'u ri Moises chque: “Jewa' cubij ri Ajawaxel ri u Dios ri Israel: ‘Chijujunal chic'ama' ri i kok'ebal, jix pa ri kajebal, chixoc pa tak ri ja, chijujunal chebicämisaj ri iwanima' iwib cuc', ri e iwachalal, o e i c'ulja.’ ”

²⁸ Ri aj levitib je xquibano jas ri takanic ri xuya' ri Moises chque, craj c'u ne e oxib mil achijab xecäm pa ri k'ij ri' chquixo'l ri aj israelib.

²⁹ Xubij c'u ri Moises chque: “Camic, quic'am ix tz'akatalaj takanic chuwäch ri Ajawaxel, rumal rech chi chijujunal xuc'ulelaj ri u c'ojol jujun chic ri e rachalal. Rumal c'u rech wa' ix u tewichi'm ri Ajawaxel camic.”

³⁰ Chucab k'ij, xubij ri Moises chque ri aj israelib: “Ri ix, i banom jun nimalaj mac. Camic quinpaki' chi na jawije' c'o wi ri Ajawaxel, che rilic we quincuinic chi quixucuyu'.”

³¹ Xopan c'u ri Moises jawije' c'o wi ri Ajawaxel xubij che: “Kastzij, ri winak qui banom jun nimalaj mac, xquiban jun qui dios re k'an puak.

³² Quintz'onoj tok'ob che la chi cäsach la qui mac, we c'u man caj la cäsach la qui mac, chesaj la ri nu bi' chupam ri wuj ri tz'ibam la.”

³³ Ri Ajawaxel xubij che ri Moises: “Xuwi ri cämacun chnuwäch, are wa' quinwesaj ri u bi' chupam ri nu wuj.

³⁴ Jät ba', chebac'ama' bic we winak ri' pa ri c'olbal ri nu bim chawe. Cäc'am c'u na a be rumal ri nu tako'n aj caj. Aretak c'u copan ri k'ij re ri c'äjisan wächaj, quinc'äjisaj na qui wäch rumal ri qui mac.”

³⁵ Ri Ajawaxel xuya' jun c'axalaj yabil paquiwi' ri winak, rumal rech chi xquik'ijilaj ri alaj ama' wacax re k'an puak ri xuban ri Aaron.