Elem 26 - Quiché Bible

Ri tastalic k'ijilabal

¹ “Lajuj tasbal re tumim lino cacoj che ri u banic ri k'ijilabal, quem azul, quem morato, quiäk quem; utzalaj qui t'isic, quieb wächbal ri aj cajalaj tak tobanelab ri e c'o qui xic' cat'is chquiwäch.

² Chquijujunal ri tasbal rajawaxic xa junam quetabalil; cajlajuj (14) bara' ruc' jun k'abaj ruc' niq'uiaj k'abaj qui rabic, cacab bara' ruc' jun k'abaj ruc' niq'uiaj k'abaj qui wäch.

³ Chebat'isa' ri job tasbal cäquekala quib ri qui chi', xukuje' je caban chi chque ri job,

⁴ chebacojo' jujun c'amal re bätz' azul chuchi' ri nabe job tasbal xukuje' chuchi' ri job tasbal chic.

⁵ Che ri nabe job tasbal, che ri ucab job tasbal, rajawaxic caban cawinak lajuj (50) c'amal ri cäquic'ulajij quib.

⁶ Chebabana' xukuje' cawinak lajuj (50) ch'epebal re k'an puak, ri cäch'epabex que ri job tasbal cuc' ri job chic, jeri' chi ri u wi' ri k'ijilabal xa jun cutikej wi rib.

⁷ Xukuje' chabana' julajuj (11) tasbal re quismal q'uisic', ri cux xa jun lic'om che ri ch'ukubal u wi' ri k'ijilabal.

⁸ Chquijujunal ri tasbal rajawaxic xa junam quetabalil; waklajuj (16) bara' qui rabic, cacab bara' ruc' jun k'abaj ruc' niq'uiaj k'abaj qui wäch.

⁹ Chebat'isa' ri job tasbal xa jun caban chque, chebat'isa' ri wakib chic xa jun caban chque, chameja' ri uwak tasbal ri cäcanaj chuwäch ri lic'om.

¹⁰ Chabana' cawinak lajuj (50) c'amal chuchi' ri nabe job tasbal che t'ikbal rech xukuje' cawinak lajuj (50) c'amal chuchi' ri wakib tasbal chic.

¹¹ Xukuje' quebaban cawinak lajuj (50) ch'apabal re k'an ch'ich', chebach'apa pa tak ri c'amal, rech conojel ri tasbal xa jun u wäch cacanajic.

¹² Rumal rech chi c'o na u rabic ri tasbal re ri lic'om, ri cäto'taj canok ch'akap cäcanaj pa jun u xcut ri k'ijilabal, ch'akap pa ri jun u xcut chic.

¹³ Jeri' ri k'ijilabal kas cäch'ukutaj can cumal ri quieb ch'akatak ri quetzayi can pa ri quieb u xcut, niq'uiaj bara' cäcanaj pa ri jun u xcut, niq'uiaj bara' pa ri jun u xcut chic.

¹⁴ Chabana' chic jun ch'ukubal re qui tz'umal ama'ib tak chij ri tz'ajom ruc' quiäk, xukuje' caban chi jun ch'ukubal u wi' re utzalaj tz'um ri cäbe puwi'.

¹⁵ Chebabana' jujun tak tz'alam re q'uisis che ri k'ijilabal, suc' qui cojic chabana'.

¹⁶ Chquijujunal ri tz'alam rajawaxic job (5) bara' ruc' jun k'abaj qui rabic, oxib (3) k'abaj qui wäch,

¹⁷ caban cacab qui tu' ri jujun tz'alam rech cäquich'apala' tak quib. Jewa' caban chque conojel ri u tz'alamil ri k'ijilabal.

¹⁸ Aretak quebabano, chebabana' juwinak (20) tz'alam che ri mox k'ab.

¹⁹ Chebacojo' cawinak (40) qui tac'alibal re sak puak. Chquijujunal ri tz'alam rajawaxic cacoj cacab qui tac'alibal ri quech'api wi ri qui tu'.

²⁰ Xukuje' je caban chi che ri jun u xcut chic re ri riquiak'ab, quebaban juwinak (20) u tz'alamil

²¹ cachil ri cawinak (40) qui tac'alibal re sak puak, rech quecanaj cacab qui tac'alibal ri jujun tz'alam.

²² Che ri rij ri k'ijilabal ri c'o pa ri kajebal k'ij, chebabana' wakib tz'alam,

²³ xukuje' quieb chi tz'alam ri quebacoj chque ri xquina re chrij.

²⁴ We tz'alam ri' quech'ap chquixe' xukuje' paquiwi'. Je caban chi chque ri quieb tz'alam chic ri quebajwataj pa ri quieb u xquina.

²⁵ E wajxakib c'u wa' chi tz'alam cachil waklajuj qui tac'alibal ri cäquic'ulajij, cäbe quieb tac'alibal re sak puak chquixe' jujun tz'alam.

²⁶ Chebabana' job balul re q'uisis ri catok'obex que ri tz'alam che ri jun u xcut ri k'ijilabal,

²⁷ job balul chic ri cätok'obex que ri tz'alam pa ri jun u xcut chic, xukuje' job chic ri cätok'obex que ri tz'alam chrij ri k'ijilabal ri cäca'y pa ri u kajebal k'ij.

²⁸ Ri balul ri cäcanaj pa qui niq'uiajil quebutok'ej conojel ri tz'alam pa qui niq'uiajil, pa jun u xcut ri k'ijilabal c'ä pa ri jun u xcut chic.

²⁹ Cach'uk quij ri tz'alam ruc' k'an puak, quebaban qui xiquin re k'an puak, ri quejut wi ri balul xukuje' cach'uk quij ri balul ruc' k'an puak.

³⁰ Cawoc ri k'ijilabal, jas ri u bantajic ri xc'utun chawäch puwi' ri juyub.

³¹ Chabana' jun ch'ukubal re quem azul, quem morato', quiäk quem xukuje' tumim lino; chebat'isa' quieb wächbal chuwäch, ri aj cajalaj tobanelab ri e c'o qui xic'.

³² Cuc' jujun ch'epebal re k'an puak, caxequeba' chque quiejeb akan re q'uisis, ri ch'ukum quij ruc' k'an puak quec'oji' c'u paquiwi' quiejeb qui tac'alibal re sak puak.

³³ Caxequeba' ri ch'ukubal cuc' ch'epebal re k'an puak, chila' c'ut, chrij ri ch'ukubal caya' wi ri caxa ri c'olbal re ri c'ulwächinic. We ch'ukubal ri' cajwataj na chiwe che tasbal u xo'l ri c'olbal tastalic ruc' ri c'olbal ri sibalaj tastalic.

³⁴ Cacoj c'u ri tz'apibal puwi' ri caxa rech ri c'ulwächinic chupam ri c'olbal ri sibalaj tastalic.

³⁵ Chaya' ri mexa chuwäch ri ch'ukubal pa ri k'ijilabal, pa ri riquiak'ab ri relebal k'ij are c'u ri tzuc'ulibal chaya' pa ri u mox k'ab ri relebal k'ij cuc'lawichij rib ruc' ri mexa.

³⁶ Chabana' jun oquibal ri cacoj chuchi' ri lic'om, jun tasbal re quem azul, quem morato', quiäk quem xukuje' tumim lino, utzalaj u t'isic cabano.

³⁷ Chebabana' akan re q'uisis che ri tasbal, ri cach'uk quij ruc' k'an puak xukuje' quebaban qui ch'epebal re k'an puak, quebaban job qui tac'alibal re k'an ch'ich'.”