Elem 18 - Quiché Bible

Ri Jetro copan che u ch'abexic ri Moises

¹ Ri Jetro, ri cojol tabal tok'ob pa Madian, u ji' ri Moises, xuta' u tzijol ronojel ri u banom ri Dios che u to'ic ri Moises xukuje' ri u banom che ri u tinimit Israel, xretamaj chi ri Ajawaxel xeresaj ulok ri aj israelib pa Ejipt.

² Ri Jetro ri u ji' ri Moises xuc'am ulok ri Sepor ri rixokil ri Moises e rachilam ri quieb ral, ri e u tzelem can ri Moises pa Madian.

³ Jerson u bi' ri jun, rumal rech chi xubij ri Moises: “Xak wokxanim wib pa jun ulew ri man wech taj,”

⁴ Eliezer u bi' ri jun chic rumal rech chi xubij: “Ri u Dios ri nu tat xpe che nu to'ic, xinuto' chuwäch ri u ch'ich' re ch'o'j ri ajawinel ri paraon.”

⁵ Kajinak c'u ri Moises pa ri chaki'j uwo sak chunakaj ri u juyub ri Dios, chila' c'u xopan wi ri Jetro rachil ri Sepor rixokil ri Moises xukuje' ri quieb u c'ojol.

⁶ Xubij c'u che ri Moises: “In ri Jetro ri a ji', in petinak che awilic, xpe ri awixokil wuc' e rachil ri quieb ral.”

⁷ Ri Moises xel ulok che u c'ulaxic ri u ji'. Xumej rib chuwäch, xutz'umaj; aretak quiya'lom chic rutzil qui wäch, xeboc pa ri lic'om rachoch.

⁸ Ri Moises xutzijoj che ri u ji' ronojel ri u banom ri Ajawaxel che ri ajawinel xukuje' chque ri aj ejiptib che qui to'ic ri aj israelib xukuje' xutzijoj ronojel ri c'ax ri xquic'ulmaj pa tak ri be xukuje' ri xuban ri Dios che qui to'ic.

⁹ Sibalaj c'u xquicot ri Jetro rumal ronojel ri utzil ri xuban ri Dios chque ri aj israelib, aretak xeresaj ulok pa qui k'ab ri aj ejiptib,

¹⁰ xubij c'ut: “Tewichital ri Ajawaxel, ri xixesan ulok pa u k'ab ri ajawinel xukuje' pa qui k'ab ri aj ejiptib; xixresaj pa u k'ab ri banal c'ax

¹¹ xukuje' chupam ri c'ax ri xquiban chiwe. Camic weta'm chic chi ri Ajawaxel are c'o na u k'ij chquiwäch conojel ri diosib.”

¹² Ri Jetro xuc'am jun awaj xuporoj che u ya'ic u k'ij ri Ajawaxel xukuje' niq'uiaj tabal tak tok'ob chic. Xopan c'u ri Aaron e rachilam conojel ri nimak tak tatayib aj israelib che wa'im ruc' ri u ji' ri Moises chuwäch ri Dios.

Ri Moises quebucoj k'atal tak tzij

¹³ Chucab k'ij xt'uyi' ri Moises che u k'atic tzij paquiwi' ri c'ax ri queriktaj wi ri aj israelib, xetaq'ui' c'u ronojel ri jun k'ij chuwäch ri Moises.

¹⁴ Aretak c'u xril ri u ji' ri Moises ri cätajin cuban che u k'atic tzij paquiwi' ri winak, xubij che: “¿Jas ri cätajin caban cuc' we winak ri'? ¿Jasche xuwi ri at catt'uyic conojel c'ut ri winak quetaq'ui' chawäch ronojel ri jun k'ij?”

¹⁵ Ri Moises xubij che ri u ji': “Rumal rech chi ri winak quepe wuc' che u ta'ic qui no'j che ri Dios.

¹⁶ Aretak c'o jun c'ax chquixo'l quepe wuc', ri in quink'at tzij paquiwi', quink'alajisaj c'ut jachin ri c'o u mac; quinbij c'u chque jas cubij ri u pixab ri Dios xukuje' ri u tijonic.”

¹⁷ Are c'u ri Jetro ri u ji' xubij che: “Man utz taj ri cabano,

¹⁸ catk'itaj at xukuje' quek'itaj na ri winak ri e c'o awuc'. Ri chac cuq'uis ri a chuk'ab, xak a tuquiel man catcuin taj je catakej u banic wa'.

¹⁹ Kas ba' chatatabej ri no'j ri quinya' chawe, c'o c'u ri Dios awuc'. At rajawaxic catch'aw ruc' ri Dios che qui q'uexwäch ri winak, quebaya' c'u ri c'ax chuwäch.

²⁰ Chebatijoj c'u ri winak chque tak ri pixab xukuje' ri tijonic, chac'utu' chquiwäch jas cäquiban pa ri qui c'aslemal xukuje' ri patanijic ri cäquibano.

²¹ Chebacha' achijab chquixo'l ri winak ri c'o qui no'j, ri cäquina' quib chuwäch ri Dios, ri ch'ajch'oj canima', achijab ri man quequitzucuj taj chäcoj ruc' subunic, chaya' takanic pa qui k'ab paquiwi' jujun mil winak, jujun sient, cawinak lajuj, xukuje' lajujitak.

²² E are' c'u tak wa' ri cäquik'at na tzij paquiwi' ri winak amak'el; xuwi cäquic'am na ulok ri c'axalaj tak jastak chawäch at, are c'u ri man c'ax taj cäquik'at na tzij e are' puwi'. Jeri' catquito' na che u c'amic bic ri aweka'n.

²³ We je cabano jas ri xinbij chawe, we c'u xukuje' je cubij ri Dios chawe, man catk'itaj taj; conojel c'u ri winak ruc' quicotemal quetzelej na cho tak cachoch.”

²⁴ Xkaj pa u jolom ri Moises ri xubij ri u ji' che, xuban c'u ronojel ri xbix che.

²⁵ Xebucha' achijab ri c'o qui no'j chquixo'l conojel ri aj israelib, xuya' takanic pa qui k'ab paquiwi' jujun mil winak, jujun tak sient, cawinak lajuj, xukuje' lajujitak winak.

²⁶ Cäquik'at c'u tzij paquiwi' ri winak amak'el; xuwi c'u ri c'axalaj tak jastak cäquic'am ulok chuwäch ri Moises, are c'u ri man c'ax taj, cäquik'at tzij e are' puwi'.

²⁷ Ri Moises xujach bic ri u ji', xtzelej c'u ri u ji' ri Moises pa ri rulew.