Elem 10 - Quiché Bible

Ri c'äjisabal wächaj cumal ri sac'

¹ Ri Ajawaxel xubij che ri Moises: “Jät, jach'abej ri ajawinel ri paraon, nu banom chi c'u che ri are' xukuje' ri e rach k'atal tak tzij chi co caquitac'aba' quib, rech quebenc'ut ri nimak tak mayibal chquiwäch ri quincuin che qui banic,

² rech xukuje' ri at catzijoj chque ri a c'ojol, ri e u wi' tak a mam ri xinban che retz'bexic qui wäch ri aj ejiptib, xukuje' ri nimak tak mayibal ri xinban chquixo'l. Jeri' quiwetamaj na chi in ri' ri Ajawaxel.”

³ Ri Moises rachilam ri Aaron xebe che u ch'abexic ri ajawinel, xquibij c'u che: “jewa' cubij ri Ajawaxel ri qui Dios ri aj hebreyib: ‘¿C'ä jampa' ri camach' ta na awib chnuwäch? Chatzokopij bic ri nu tinimit rech cäbe che nu k'ijilaxic;

⁴ we c'u catakej qui k'atixic ri nu tinimit, chwek quebentak ulok sac' puwi' ri awulew,

⁵ cäquich'uk u wäch ri ulew, mawi c'u cäk'alajin chic ri ulew. Cäquiq'uis na u tijic ri man xsach ta u wäch rumal ri sakbach, xukuje' quequikul na conojel tak ri che' ri e c'o pa tak ri juyub.

⁶ Cäquibalij na quib pa ri nimalaj awachoch xukuje' pa ri cachoch conojel ri awach k'atal tak tzij, xukuje' pa ri cachoch conojel ri e aj ejiptib. ¡Ri cätajin cäc'ulmataj camic mawi jumul xquil ri e a tat mawi tak ri e a mam ri kas pa tak ri qui k'ijol c'ä pa tak ri kech uj!’ ” Xuwi xq'uis u bixic wa' rumal ri Moises, xel ulok pa ri nimalaj rachoch ri ajawinel.

⁷ Ri e rach k'atal tak tzij ri ajawinel je xquibij wa': “¿C'ä jampa' lo cutanaba' u banic c'ax we achi ri' chke? Chetzokopij la bic we winak ri' rech quebe che u k'ijilaxic ri qui Dios, ri Ajawaxel. ¿La c'ä maja' puch quetamaj la chi sachinak chi u wäch ri Ejipt?”

⁸ Ri ajawinel xusiq'uij chi jumul ri Moises rachilam ri Aaron xubij c'u chque: “Jix che u k'ijilaxic ri Ajawaxel ri i Dios. Nabe c'ut chabij chwe jachin tak ri quebec.”

⁹ Ri Moises xubij che ri ajawinel: “Quebe na junam kuc' ri kalc'ual xukuje' ri e ka ri'jab, ri e ka c'ojol xukuje' tak ri e ka mia'l, quekac'am bic na ri ka chij, ri e ka wacax, jun nimalaj nimak'ij wa' chke chuwäch ri Ajawaxel.”

¹⁰ Ri ajawinel xubij chque: “sibalaj k'alaj ri itzel i chomanic. ¿La are pa i c'u'x chi quixrachilaj bic ri Ajawaxel, xukuje' chi quixintzokopij ta bic ri ix xukuje' ri e iwalc'ual?

¹¹ Man je ta wa' ri quebanok. Jix xuwi ri ix ri ix achijab ri tz'akat chic i junab che u k'ijilaxic ri Ajawaxel, are c'u wa' ri quiwaj.” Xtakan c'u ri ajawinel che quesaxic bic chuwäch.

¹² Xubij c'u ri Ajawaxel che ri Moises: Chayaca' ri a k'ab puwi' ri Ejipt rech quepe ri sac', cäquiq'uis c'u qui kulic conojel ri tico'n xukuje' ronojel ri to'tajinak can rumal ri sakbach.

¹³ Ri Moises xuyac ri u ch'ämiy puwi' ri Ejipt, ri Ajawaxel xutak ulok jun quiakik' pa elebal k'ij, ronojel ri jun k'ij ronojel ri jun ak'ab xuban ri quiakik'. Aretak xsakaric ri quiakik' ri cäpe pa elebal k'ij e u c'amom chi ulok ri sac',

¹⁴ ri xquinojisaj ronojel ri ulew. Mawi jumul e c'olinak, mawi quec'oji' ta chi na, e q'uia sac' jacha' xec'oji' pa ri k'ij ri',

¹⁵ xquich'uk c'u u wäch ronojel ri ulew, man cäk'alajin ta chic ri ulew ri cätac'alexic, xequitij ronojel ri tico'n, ronojel ri qui wächinic ri che' ri xeto'taj can rumal ri sakbach. Man c'o ta jun räx k'ayes xcanaj can pa jun c'olbal pa ronojel ri Ejipt: mawi cho ri ulew, mawi paquiwi' tak ri che'.

¹⁶ Ri ajawinel aninak xutak u siq'uixic ri Moises rachil ri Aaron, xubij chque: “In macuninak chuwäch ri Ajawaxel ri i Dios xukuje' chiwäch ix,

¹⁷ quinta' tok'ob chiwe chi xuwi' chi we jumul ri' quisach nu mac, chitz'onoj ba' ri u tok'ob ri Ajawaxel ri i Dios panuwi' xuwi ta ne cäresaj we c'äjisabal wächaj re cämical panuwi'.”

¹⁸ Xuwi c'u xel ulok ri Moises pa ri nimalaj rachoch ri ajawinel, xutz'onoj tok'ob che ri Ajawaxel.

¹⁹ Ri Ajawaxel xuq'uex ri u be ri quiakik', xbe c'u ri quiakik' pa ri u kajebal k'ij, xebuc'am c'u bic ri sac' xebuq'uiak pa ri Quiäk Plo. Mawi jun sac' xcanaj can pa ronojel ri Ejipt,

²⁰ ri Ajawaxel xuban che ri ajawinel chi co xutac'aba' rib, man xraj ta chic xebe ri aj israelib.

Ri c'äjisabal wächaj re k'eku'm

²¹ Ri Ajawaxel xubij che ri Moises: “Chayaca' ri a k'ab chicaj rech cäpe jun nimalaj k'eku'm puwi' ronojel ri Ejipt, ri sibalaj tzatz na ri cuya' ne canakic.”

²² Ri Moises xuyac ri u k'ab chicaj, xpe c'u jun nimalaj k'eku'm puwi' ronojel ri Ejipt

²³ ri mawi jun xcuin ta che u ca'yexic ri u c'ulja pa oxib k'ij, mawi xslab ta pa ri u c'olbal. Pa conojel c'u ne ri cachoch ri aj israelib c'o sakilal.

²⁴ Ri ajawinel xutak u siq'uixic ri Moises, xubij che; “Jix che u k'ijilaxic ri Ajawaxel, chebic'ama' bic ri iwalc'ual, chebiya' c'u can ri i chij xukuje' tak ri i wacax.”

²⁵ Ri Moises xubij che: “Man je ta wa' cäbanic, xane' xukuje' ri lal quebe ya' na la bic ri awaj ri quebekaya' che tabal tok'ob xukuje' ri quekaporoj che u ya'ic u k'ij ri Ajawaxel ri ka Dios.

²⁶ Xukuje' ri kawaj quebe na kuc'. Mawi jun awaj cäcanaj canok, quekacha' c'u na jujun chquixo'l ri quekaya' che u ya'ic k'ijilanic che ri Ajawaxel. Cujopan c'u na chila' c'äte ri' caketamaj jachique ri quebajwataj chke che u ya'ic u k'ij ri Ajawaxel.”

²⁷ Are' c'u ri Ajawaxel xubano chi ri ajawinel paraon co xutac'aba' rib. Man xraj taj xebe ri aj israelib.

²⁸ Xubij chi c'ut ri ajawinel che ri Moises: “Chatel bic waral, kas chawila' awib, matpe chi jumul chnuwäch, apachique c'u k'ij ri catpe chi jumul chnuwäch, catcäm na.”

²⁹ Ri Moises xubij che ri ajawinel: “Utz ri bim la. Man quinpe ta chic che ch'abexic la.”