Colosenses 1 - Quiché Bible

Ri Paul cuya' rutzil qui wäch

¹ Ri in Pawl, takom re ri Jesucrist je c'u wa' ri u rayibal ri Dios, xukuje' ri kachalal Timotey,

² quintz'ibaj we wuj ri' chque ri cojonelab ri e c'o pa Colos, chque ri tastalic jicalaj tak kachalal pa ri Jesucrist. Are' ri Dios ka Tat cuban tok'ob chiwe xukuje' cuya' jamaril chixo'l.

Ri Pawl cuban ch'awem paquiwi' ri cojonelab

³ Amak'el cujmaltioxin che ri Dios ri u Tat ri Kajaw Jesucrist, aretak cäkaban ch'awem ruc' Dios piwi'.

⁴ Ka tom i tzijol chi c'o i cojonic che ri Crist Jesus, chi quebilok'ok'ej conojel ri tastalic tak cojonelab,

⁵ rumal rech ri eyebal c'uxaj chrij ri c'olom chiwe pa ri caj. I tom chi c'u wa' rumal ri tzij re kastzij, are wa' ri kastzij re colobal ib.

⁶ We tzij ri' ri xtzijox chiwe, are' wa' tzijom pa tak conojel ri c'olbal cho ri uwächulew. Cätajin cäq'uiyic xukuje' cuya' u wächinic jas ri u banom ulok iwuc' pa ri k'ij aretak xita' ri u tok'ob ri Dios xukuje' kas c'u xiwetamaj chi are' kastzij.

⁷ Are wa' ri xitijoj wi iwib ruc' ri Epapras, ri lok'alaj kach ajchac. Are jun jicalaj pataninel re ri Crist c'o chixo'l.

⁸ Ri are' xubij chke ri lok'ok'ebal i c'u'x ri yo'm rumal ri Uxlabaxel.

⁹ Rumal wa' ri uj, kas pa ri k'ij ri xketamaj, man ka tanabam ta u banic ch'awem ruc' Dios piwi', xukuje' che u tz'onoxic che ri Dios chi chubana' chiwe chi ruc' tz'akatil quiwetamaj ri u rayibal chuya' c'u ronojel u wäch no'j chiwe xukuje' ch'obonic aj uxlabal.

¹⁰ Jeri' quibano jas ri takal chiwe ri ix rech ri Ajawaxel, rech ronojel ri quibano cäkaj chuwäch. Quiya' c'u conojel wächinic que conojel utzalaj tak chac, sibalaj c'u quiwetamaj na u wäch ri Dios.

¹¹ Cäkata' che ri Dios chi cuya' i chuk'ab ruc' ri nimalaj u cuinem ri u juluwem. Jeri' quixcuin che u ch'ijic ronojel c'ax, quicuy ronojel ri cäban chiwe.

¹² Ruc' quicotemal quinmaltioxin che ri Tataxel, rumal rech chi u yo'm chke chi cäkac'am ke ri echbal ri cuya' chque ri tastalic tak cojonelab ri e c'o pa ri sakil.

¹³ Xujresaj pa ri u cuinem ri k'eku'm, xujuk'axej c'u pa ri rajawibal ri lok'alaj u C'ojol,

¹⁴ ri xujresaj pa u k'ab ri ka c'ulel rumal ri u quiq'uel xukuje' xusach ri ka mac.

C'o jamaril chkaxo'l ruc' ri Dios rumal ri u cämical ri Crist

¹⁵ Ri Crist ri quilatajic are' wa' ri u wächbal ri Dios, ri man quilitaj taj; are' ri u c'ojol are' ri c'o nabe chuwäch ronojel ri banom.

¹⁶ Rumal c'ut are' xeban conojel ri jastak ri e c'o pa ri caj xukuje' ri e c'o cho ri uwächulew, ri queilitajic xukuje' ri man queilitaj taj, we ajawibal, we takanic, we e camal be, xukuje' we aj cuinem; conojel wa' xebantaj rumal ri are' xukuje' che u nimarisaxic u k'ij.

¹⁷ Ri Crist kas c'o ulok nabe c'ä majok cheban conojel ri jastak, rumal c'ut ri are' e jekel conojel ri jastak.

¹⁸ Xukuje' are' ri jolomaj ri catakan puwi' ri cuerp, ri are' ri comon cojonelab. Are' ri tiquiritajic, are' ri nabe ri xc'astajisax chquixo'l ri cäminakib, rech jeri' ri are' nabe c'o paquiwi' conojel ri jastak.

¹⁹ Xraj c'ut ri Dios chi cajeki' ronojel ri are' pa ri Crist,

²⁰ rumal c'ut ri Crist are' xraj chi cac'oji' jamaril chuxo'l cuc' conojel ri jastak, ruc' ronojel e aj uwächulew o we aj caj. Xuban c'u ri jamaril rumal ri u quiq'uel ri Crist ri xtix cho ri ripibal.

²¹ Ri ix nabe naj ix c'o wi che ri Dios, i c'ulel ri Dios pa ri iwanima', rumal ri itzel tak chac ri xibano.

²² Camic c'ut ri Dios u yo'm chi jamaril chixo'l ruc' are', rumal ri u cämical ri Crist, aretak xurik cämical pa ri u cuerp aj winak. Xuban wa' che i tac'abaxic chuwäch are', ix tastalic tak winak chic, man ix tz'ajtajinak taj, man c'o ta chi i mac,

²³ we kas co ix tac'al pa ri i cojonic, man quiya' ta canok, we kas cu'l i c'u'x chrij ri tzij re colobal ib ri i tom, man cuban ta quieb i c'u'x. Are utzalaj tak tzij wa' cätzijox pa tak ronojel c'olbal cho ri uwächulew. Ri in, in Pawl in cojom che patanijic.

Ri Pawl cojom che pataninel rech ri comon ajcristib

²⁴ Quinquicot c'u pa tak ri c'axc'olil ri nu rikom rumal iwech, c'ä c'ax c'u que che ri Crist rumal ri qui c'axc'olil ri comon cojonelab, are wa' ri u cuerp. Quinc'am c'u we we c'axc'olil ri' pa ri nu cuerp. Quinrik c'u c'ax rumal quech ri comon cojonelab.

²⁵ Ri in in cojom che pataninel re ri comon cojonelab. Ri Dios u yo'm pa nu k'ab ri i patanixic, rech kas cätz'akat u tzijoxic ronojel ri u tzij.

²⁶ Are jun jasach ri man etamatal ta can nabe, c'u'm ulok rumal ri Dios kas pa tak ri k'ij junab chquiwäch conojel ri winak ri e c'o cho ri uwächulew. Camic c'ut k'alajisam chi chquiwäch ri winak ri e tastalic.

²⁷ Ri xraj wi ri Dios u ya'ic retamaxic ri u k'inomal ri u juluwem we awatalic ri' chquixo'l ri man aj judeyib taj; are Crist wa' pa ri ix, ri cu'lbal i c'u'x che ri juluwem.

²⁸ Are Crist wa' ri cäkatzijoj uj. Quekapixbej conojel winak chquila' quib, quekatijoj rech kas cäquich'obo, jeri' chquijujunal quebux tz'akat pa ri Crist.

²⁹ Rumal ri' sibalaj quinchacunic, quintij nu chuk'ab. Ri cuinem ri cuya' ri Crist chwe, are cächacun pa ri wanima' ruc' chuk'ab.