Chapletajic 49 - Quiché Bible

Q'uisbal tak u tzij ri Jacob

¹ Ri Jacob ri nim winak chic xebusiq'uij ri e u c'ojol, xubij chque: “Chixkeb ulok, quinya' c'u can u bixic chiwe jas ri quic'ulmaj na:

² Nu c'ojol, chixkeb ulok che u tatabexic ri quinbij chiwe.

³ Ruben, at ri nu nabeal, ri nabe u wächinic ri nu chuk'ab, ri nabe chnimarisax u k'ij, xukuje' ri nabe pa ri cuinem.

⁴ Man at ta chi c'ut ri at nabe, at junam ruc' jun nimalaj ja' ri man k'atatijel taj: xatz'iloj ri nu ch'at aretak xatwar ruc' jun chque ri man kas ta wixokil.

⁵ Ri Simeon, ri Levi, cachalal quib; ri qui ch'ojibal e chaconisan re tokinic.

⁶ ¡Mawi jubik' quinwaj quinc'oji' ta pa ri c'olbal ri caquimulij wi tak quib! aretak c'u e oyowarinak xequicämisaj winak, xak che u banic ri cäcaj xequik'ajisaj ri cakan ri ama'ib tak wacax.

⁷ ¡C'okotajinak, je, chc'okotaj ri awajalaj royowal! ¡In quebenjabuj na chnimalaj conojel pa ronojel ri tinimit Israel!

⁸ At, Juda, ri awachalal cäquiya' na a k'ij. Quebachap na ri e a c'ulel chquikul, xukuje' ri kas e awachalal cäquimej na quib chawäch.

⁹ ¡Juda, nu c'ojol! At junam ruc' jun alaj coj aretak cutanaba' u tijic ri ti'j ri u chapom: cukasaj ri u jolom, cäjupi cho ri ulew, cujaluj rib chi jun nimalaj coj. ¿Jachin ta lo ri cuchajij anima' ri cätzuruwic?

¹⁰ Man c'o ta jun quesan ri cuinem pa u k'ab ri Juda mawi ri ch'ämiy ri c'o pa u k'ab c'ä cäpe na ri ajchak'e ri ch'ämiy, ri cänimax na cumal conojel tak ri tinimit.

¹¹ Ri cuyukba' ri alaj u bur chquixe' tak ri juwi' uva, ri cuch'aj ronojel ri ratz'iak ¡ruc' u wa'l uva, cuc' ri qui wa'l tak uva!

¹² Ri e u bak'wäch e k'ek na chuwäch ri u wa'l uva, ri e u ware e sak na chuwäch ri leche.

¹³ Ri Zabulon cäc'oji' chuchi' ri plo, ri quebopan tak wi ri jucub. Ri e u c'ulbatil copan c'ä pa Sidon.

¹⁴ Ri Isacar are jun cowilaj awaj re eka'n ri cuxlan chupam tak ri e u cäbal.

¹⁵ Aretak xrilo chi utz ri ulew xukuje' chi sibalaj utz che uxlanibal, xubus ri uwo rachak che u c'amic bic eka'n man xc'ulelan taj xux lok'om pataninel.

¹⁶ Ri Dan cuk'at na tzij paquiwi' ri kas u winakil jacha' jun chque ri ramak' ri Israel.

¹⁷ Ri Dan junam ruc' jun itzel cumätz ri c'o chuchi' ri be, ri cusoc u xe' cäkan ri quiej cätzak c'u ri c'o chrij ri quiej.

¹⁸ ¡Oh, Ajawaxel, quinweyej chi quincol la!

¹⁹ Ri Gad quekaj na banal tak c'ax puwi', cäcuin c'u che cokataxic bic.

²⁰ Ri Aser, sibalaj c'o cutijo ri wa ri cuyao takal u tijic cumal tak ri ajawinelab.

²¹ Ri Neptali junam ruc' jun ati't masat ri tzokopitalic ri e c'o je'licalaj tak ral.

²² Ri Jose jacha' juwi' tico'n chunakaj ja' ri sibalaj cäwächinic, ri e u k'ab quepaki' puwi' ri nimalaj tapia.

²³ Ri e aj q'uiakal ch'ab cäquiban coyowal che, quequiq'uiak tak ch'ab che, amak'el c'ut caquiya' latz' che.

²⁴ E c'o c'u cowilaj tak u k'ab ri Jose amak'el co u tanim ri u q'uiakbal ch'ab; ¡maltiox che ri u Dios ri Jacob ri c'o ronojel u cuinem!, ¡maltiox che ri u bi' ri ajyuk', ri to'l rech ri Israel!

²⁵ ¡Maltiox che ri u Dios ri a tat ri catuto' na; ri Dios ri c'o ronojel u cuinem, ri cattewichi'n na! ¡Cuc' tak tewichibal ri quepe chicaj! ¡Cuc' tak tewichibal re ri nimalaj plo! ¡Cuc' tak tewichibal re tu'bisanic xukuje' alc'ualanic!

²⁶ Nim na ri a tewichi'xic rumal ri a tat chuwäch ri tewichibal ri xquiya' ri e nu mam chwe in. C'ä chuq'uisbalil tak ri junalic tak juyub, we tewichibal ri' cäc'oji' na pa u jolom ri Jose, ri cha'tajinak chquixo'l ri rachalal.

²⁷ Ri Benjamin, junam ruc' jun c'analaj utiw, ak'abil cutij ri awaj ri u cämisam, pa ri benak k'ij c'ut cujach ri queto'tajic.”

²⁸ E are wa' ri e cablajuj (12) amak' ri Israel, are c'u wa' ri xubij ri qui tat chque ri u c'ojol aretak xebutewichi'j, chquijujunal.

Ri u cämical ri Jacob

²⁹ C'o jun k'ij ri Jacob xuya' we takanic ri' chque ri ralc'ual, xubij: “Xa co'l man quincämic. Aretak quincämic, chinimuku' cuc' ri e nu mam, pa ri mukubal ri c'o pa ri rulew ri Epron ri aj hitit,

³⁰ chila' pa Canaan pa ri mukubal ri c'o pa Macpel chuwäch ri Mamre, ri xulok' ri Abraham che ri Epron rech cäcanaj che qui mukubal ri rachalaxic.

³¹ Chila' xmuk wi ri Abraham xukuje' ri Sara ri rixokil, ri Isaac xukuje' ri Rebec ri rixokil, xukuje' chila' xinmuk wi ri Lea.

³² Ri ulew xukuje' ri mukubal ri c'o pa ri ulew ri', xlok' chque ri aj hititib.”

³³ Aretak xto'taj ri Jacob che u ya'ic ri pixbenic chque ri e u c'ojol, xk'oyi' chic jumul xcäm c'ut.