Chapletajic 48 - Quiché Bible

Ri Jacob cutewichi'j ri Eprain xukuje' ri Manases

¹ Oc'owinak chi quieb oxib k'ij aretak xya' u bixic che ri Jose chi yawab ri u tat. Xbe ri Jose xebuc'am bic ri quieb u c'ojol, ri Manases, ri Eprain.

² Aretak xya' u bixic che ri Jacob chi xopan ri Jose che rilic, xucoj u chuk'ab xt'uyi' ak'an pa ri u ch'at.

³ Xubij c'u che ri Jose: “Ri Dios ri c'o ronojel u cuinem, xuc'ut rib chnuwäch pa ri tinimit ri Luz u bi' ri c'o pa Canaan, xinutewichi'j c'ut,

⁴ cuc' tak we tzij ri': ‘Chawilampe', quinbano chi sibalaj queq'uiyir ri e a c'ojol, ri e awija'l quequipok'isaj na nimak tak tinimit. Chque c'ut, ri e awija'lil quinya' wi na we ulew ri'. Cux c'u na quech chbe k'ij sak.’

⁵ E are' c'u we quieb a c'ojol ri', ri Eprain, ri Manases ri xil qui wäch aretak majok chinul awuc' pa Ejipt, e wech wa', jacha' ri Ruben xukuje' ri Simeon.

⁶ Are c'u ri a c'ojol ri quebalax na, e are wa' ri e awech, rumal c'u rech chi e cachalal ri Eprain xukuje' ri Manases, caquic'am na quech ri quechbal.

⁷ Aretak in tzelejinak chi ulok pa Padan-aram, xcäm ri Raquel ri a nan pa Canaan, xa co'l, man cujopan pa Eprat; xinmuk c'u can chuchi' ri be re Eprat ri are Belen camic.”

⁸ Ri Israel xca'y chque ri u c'ojol ri Jose, xc'otow chi'aj: “We alabom ri', ¿e jachin tak?”

⁹ “E are nu c'ojol wa' ri e u yo'm ri Dios chwe waral pa Ejipt,” xcha' ri Jose. Xubij c'u ri u tat che: “Chebakebsaj ulok chnuwäch rech quebentewichi'j canok.”

¹⁰ Man cäca'y ta chi c'u ri Jacob rumal ri u ri'jobic. Rumal ri' ri Jose xebukebisaj ri e u c'ojol chuwäch, xebutz'umaj c'ut xukuje' xebulak'apuj.

¹¹ Xubij c'u che ri Jose: “Mawi jumul xinchomaj chi quinwil ta chi na a wäch. U yo'm c'u ri Dios chwe chi xinwil na qui wäch ri e a c'ojol.”

¹² Ri Jose xeresaj ri ac'alab xo'l u ch'ec ri u tat, xxuqui' chuwäch, xumej rib c'ä xuya' na ri u palaj cho ri ulew.

¹³ Xebuc'am qui cabichal ri Eprain ruc' ri u k'ab u wiquiak'ab, ri Manases ruc' ri u mox, xebukebisaj chuwäch ri u tat. Jeri' ri Eprain xcanaj pa ri u mox ri Jacob, are c'u ri Manases xcanaj pa ri u wiquiak'ab.

¹⁴ Ri Jacob aretak xuyuk ri u k'ab paquiwi', xebujalc'atij ri u k'ab, ri u wiquiak'ab xuya' puwi' ri u jolom ri Eprain ri chak'axel, are c'u ri u mox, xuya' puwi' ri u jolom ri Manases pune' are nabeal.

¹⁵ Je c'u u tewichi'xic ri Jose wa' xubano: “Are' ri Dios ri xquinimaj ri Abraham, xukuje' ri Isaac ri e nu mam; ri Dios ri in chajininak ulok kas pa ri k'ij ri xinalaxic,

¹⁶ ri tako'n aj caj ri quinuto'tajisaj chuwäch apachique c'ax, chtewichi'n we quieb alabom ri'. Xa ta rumal quech cänatax ri nu bi' xukuje' ri u bi' ri nu mam Abraham, ri nu tat Isaac. Chec'oji' ta q'ui calc'ual. Chebux ta tinimit winak cho ri uwächulew.”

¹⁷ Man utz ta c'u xril ri Jose chi ri u tat, are xuya' ri u wiquiak'ab puwi' ri u jolom ri Eprain xuc'am ri u k'ab ri u tat xresaj puwi' ri u jolom ri Eprain xuya' puwi' ri u jolom ri Manases.

¹⁸ Xubij c'u che: “¡Man je taj ri cäban la, tat! Are nabeal wa'. Puwi' wa' ya' wi la ri iquiak'ab la.”

¹⁹ Ri u tat man xraj taj, xubij c'u che ri Jose: “¡Weta'm nu c'ojol, weta'm ri quinbano! Xukuje' ri are' cux na jun nim tinimit nim u k'ij. Are c'u ri Eprain ri u chak', are cänimar na u k'ij chuwäch. Ri e rija'lil cäquipok'osaj na nimak tak tinimit.”

²⁰ Kas pa ri k'ij ri' ri Jacob xebutewichi'j cuc' tak we tzij ri': “Ri tinimit re Israel cucoj na ri i bi' ix che tak tewichi'nic, cäquibij c'u na: ‘Chubana' ri Dios chawe jas ri xuban che ri Eprain xukuje' che ri Manases.’ ” Ri Jacob ri cäbix Israel che are xuya' u k'ij ri Eprain chuwäch ri Manases.

²¹ Xubij c'u che ri Jose: “Chawilampe', ri in xa pa quieb oxib k'ij quincämic, are' c'u ri Dios c'o iwuc' amak'el, cuban c'u na chiwe chi quixutzelej na pa ri culew ri e i mam.

²² Are nim ri nu yo'm chawe at chuwäch ri nu yo'm chque ri awachalal: quinya' ri Siquem chawe ri wesam chque ri aj amoreyib ruc' tijow tak chuk'ab cuc'.”