Chapletajic 40 - Quiché Bible

Ri Jose cuk'alajisaj ri quieb ichic'

¹ Quieb oxib k'ij chic c'o ri Jose pa che', aretak ri qui nimal ri e suc'umal u wa'l uva xukuje' ri qui nimal ri e suc'umal tak caxlanwa xemacun chuwäch ri ajawinel re Ejipt.

² Ri paraon, ri ajawinel, xyactaj c'u royowal chquij we quieb takanelab ri' ri qui nimal ri e suc'umal u wa'l uva xukuje' qui nimal ri e suc'umal tak caxlanwa,

³ xtakan che qui cojic pa che' ri c'o cho rachoch ri c'amal qui be ri ajch'ojab, jawije' c'o wi ri che' kas are' c'u c'olbal wa' ri tz'apital wi ri Jose pa che'.

⁴ Ri c'amal qui be ri ajch'ojab, xebujach we quieb achijab ri' ri nimak qui banic pa u k'ab ri Jose, naj c'ut xec'oji' pa che'.

⁵ Jun chak'ab ri quieb ajpache' ri k'axal u wa'l uva xukuje' ri banal caxlanwa, chquijujunal xquiban jun quichic', chquijujunal c'ut ri ichic' jalan ri caquibij chquijujunal.

⁶ Ak'ab aretak xopan ri Jose che quilic, xeburika' chi sibalaj quebisonic;

⁷ xuc'ot qui chi', xubij chque: “¿Jasche quixbisonic, k'alaj che ri i palaj?”

⁸ Ri achijab ri' xquibij che ri Jose: “Ka banom jujun kichic', man c'o ta c'u jun cäcuinic cubij ta chke jas quel cubij ri xkichic'aj.” Ri Jose xubij chque: “¿La ma ta puch are' ri Dios cayo'w ri k'alajisanic?” xcha' ri Jose chque. “Chibij ba' chwe ri xinwichic'aj.”

⁹ Ri qui nimal ri e suc'umal u wa'l uva xutzijoj ri richic' che ri Jose cuc' tak we tzij ri': “Pa ri nu waram xinwil juwi' uva.

¹⁰ Ri e c'o oxib u k'ab, xetuxic xquiya' qui cotz'ijal, ri e qui cotz'ijal xebux jutak tzayaj chak' tak qui wäch.

¹¹ Ri in wuc'am ri u lak ri ajawinel pa nu k'ab. Quebenc'am c'ut ri uva quebenpitz' chupam ri lak. Xinya' c'u ri lak pa u k'ab ri ajawinel.”

¹² Xubij ri Jose che: “Ri xawichic'aj je cubij wa': ri oxib u k'ab ri uva quel cubij oxib k'ij,

¹³ quel cubij wa' chi pa oxib k'ij, catresaj bic ri ajawinel pa che', catcoj chi na jumul pa ri chac, caya' chi c'u na jumul ri u lak ri ajawinel pa u k'ab jas ri a banom can nabe.

¹⁴ Aretak c'u chc'ulmataj wa', chinnataj chawe, chabana' c'u jun tok'ob chatch'aw panuwi' ruc' ri paraon rech quinresaj chupam we c'olbal ri'. ¡Chel a c'u'x chwe!

¹⁵ Ri in xa in eläk'am ulok pa ri culew ri aj hebreyib, xukuje' man c'o ta c'u jun etzelal nu banom waral ri rumal ta rech in cojom pa che'.”

¹⁶ Aretak ri qui nimal ri e suc'umal tak caxlanwa xuto chi utz u k'alajisaxic ri richic' ri qui nimal ri e suc'umal tak u wa'l uva xuban ri Jose, ri are' xutzijoj ri richic' che, xubij che: “Ri in xinwichic'aj chi e wiquiram oxib chicäch sak caxlanwa.

¹⁷ Ri chicäch ri c'o paquiwi' ri quieb e c'o ronojel qui wäch caxlanwa chquipam, ri quekaj chuwäch ri ajawinel, e are tak c'ut ri chicop ri c'o qui xic' quepe che qui tijic ri caxlanwa ri e c'o pa ri chicäch ri wiquiram.”

¹⁸ Ri Jose xubij che: “Are wa' ri cubij ri awichic': ri oxib chicäch quel cubij oxib k'ij,

¹⁹ quel cubij wa' chi pa oxib k'ij catresaj bic ri ajawinel pa che', catuxequeba' c'u chuwäch jun che', quepe c'u ri c'uch cäquitij ri a ti'jal.”

²⁰ Churox k'ij c'ut xtz'akat u junab ri ajawinel, xuban jun nimalaj nimak'ij, xerula'j ri nimak qui k'ij, chquiwäch c'ut ri e rula', ri ajawinel xtakan che quesaxic ulok pa ri che' ri qui nimal ri e suc'umal tak u wa'l uva xukuje' ri qui nimal ri e suc'umal tak caxlanwa.

²¹ Ri qui nimal ri e suc'umal u wa'l uva xucoj chi jumul pa ri u chac, xuya' chi jumul ri lak pa u k'ab ri ajawinel jas ri u banom can nabe;

²² are c'u ri qui nimal ri e suc'umal tak caxlanwa xtakan che u jitz'axic, kas je xelic jas ri xubij ri Jose.

²³ Are c'u ri qui nimal ri e suc'umal u wa'l uva man xnataj ta chic ri Jose che.