Chapletajic 34 - Quiché Bible

Ri rajil u c'äxel ri c'ax ri xban che ri Din

¹ Ri Din, ri u mia'l ri Jacob ri xralaj ri Lea, xbe che qui solixic ri alitomab ri e aj Siquem,

² xilitaj c'u rumal ri Siquem u c'ojol ri Hamor ri aj hebey ri c'amal be pa ri c'olbal ri', ruc' c'u chuk'ab xk'oyi' ruc', xresaj c'u u q'uixbal.

³ Sibalaj c'u xbe ranima' ruc', are ta c'u xraj xajawax ta rumal.

⁴ Xtzijom c'ut ri Siquem ruc' ri Hamor, ri u tat, xubij che: “Jeta' la we ali ri'. Are' quinwaj quinc'uli' ruc'.”

⁵ Xretamaj c'u ri Jacob chi ri Siquem xresaj u q'uixbal ri Din ri u mia'l, e benak c'u ri u c'ojol che qui yuk'uxic ri cawaj pa ri juyub, man c'o ta jas xubij, c'ä xetzelej na ulok ri e u c'ojol.

⁶ Are' c'ut ri Hamor, u tat ri Siquem, xbe che rilic ri Jacob rech quetzijon na ruc'.

⁷ Aretak xetzelej ulok ri e u c'ojol ri Jacob pa ri juyub, xquetamaj c'ut ri xc'ulmatajic, sibalaj xpe coyowal rumal chi bantajinak jun nimalaj c'ax chque ri aj israelib chi ri Siquem xk'oyi' ruc' ri u mia'l ri Jacob. ¡Jun jasach wa' ri ma ta mawi jubik' xbantajic!

⁸ Xtzijon c'u ri Hamor cuc' ri u c'ojol ri Jacob xubij chque: “Ri nu c'ojol Siquem, sibalaj benak ranima' ruc' ri iwanab. Chibana' tok'ob, chiya' che chi c'ulana ruc',

⁹ chixoc che kachalaxic; jeri' ri uj cujc'uli' na cuc' ri i mia'l xukuje' ri ix quixc'uli' na cuc' ri ka mia'l uj.

¹⁰ Chixcanaj kuc'. C'o we ulew ri' chiwäch, chixcanaj waral, chibana' i c'ay, chilok'o' iwulew.”

¹¹ Ri Siquem xubij che ri u tat ri Din xukuje' chque ri e u xibal: “Quixinbochi'j chi chinimaj ri cäkabij chiwe. Xa ta ne joropa' ri quita' chwe quinya' chiwe.

¹² Pune' ta ne jun tojbal ri coc'ow na chuwäch ri nak'atisabal xukuje' q'ui tak sipanic, ri in quinya' na chiwe; chiya' c'u c'olbal chi chc'ulan ri ali wuc'.”

¹³ Rumal c'u rech chi ri Siquem resam u q'uixbal ri Din, ri e u c'ojol ri Jacob xquitzelej u bixic che xukuje' che ri Hamor ri u tat ruc' subunic,

¹⁴ xquibij chque: “Man cuya' taj cäkaya' ri kanab che jun achi ri man kopim taj ri u wi' ri tz'umal ri achi wi che retal, q'uixbal wa' chke uj.

¹⁵ Cäkaya' c'u ri kanab chiwe we quibano jas ri cäkabij chiwe: we quikopij ri u wi' ri qui tz'umal ri achijab wi, conojel ri achijab ri e c'o chixo'l.

¹⁶ We je quiban wa' cuya' quixc'uli' cuc' ri e ka mia'l, xukuje' ri uj cujc'uli' na cuc' ri e i mia'l; cujc'oji' na iwuc', cujux na xa jun tinimit.

¹⁷ We c'u man quiya' i tzij che u banic ri cäkabij chiwe chi quebikopij ri u wi' ri i tz'umal ri ix achijab wi, cujel na bic waral, cäkac'am bic ri kanab.”

¹⁸ Ri Hamor xukuje' ri Siquem ri u c'ojol, xquiya' qui tzij che u banic ri xbix chque cumal ri e u c'ojol ri Jacob.

¹⁹ Man xubey ta rib ri ala, xukopij ri u wi' ri u tz'umal ri achi wi, sibalaj c'u benak ranima' ruc' ri u mia'l ri Jacob. Ri Siquem are c'u nim u k'ij chquixo'l conojel ri e c'o pa rachoch ri u tat.

²⁰ Xbe ri Siquem rachil ri u tat chuchi' ri oquibal chupam ri tinimit, jawije' queban wi tak ri chomanic, chila' c'ut xquibij wi chque ri winak:

²¹ “We achijab ri' e utz kuc', quec'oji' na kuc' xukuje' quechacun na pa we c'olbal ri', c'o sibalaj ulew chque; ri uj cuya' cujc'uli' cuc' ri e qui mia'l, xukuje' ri e are' cuya' quec'uli' cuc' ri e ka mia'l.

²² Ri e are' cäcaj quec'oji' kuc', xuwi we cäkaj cäkabano jas ri qui bim chke: chi conojel ri achijab cäkopix ri u wi' ri qui tz'umal ri achijab che que, jas ri qui nak'atisam wi quib we winak ri'.

²³ Ronojel ri jastak quech xukuje' conojel ri cawaj, e kech. Xuwi kabana' jas ri qui bim chke, quec'oji' c'u na kuc'.”

²⁴ Conojel ri achijab ri e c'o chupam ri tinimit ri e c'o chi qui junab che u banic ch'o'j xquiya' qui tzij che ri xubij ri Hamor rachilam ri Siquem, xekopix ri u wi' ri qui tz'umal ri e achijab wi che quetal.

²⁵ Are c'u ri Simeon, ri Levi e u c'ojol ri Jacob e u xibal ri Din, churox k'ij xeboc pa ri tinimit aretak ri achijab c'ä c'o qui k'oxom che ri xkopix wi ri u wi' ri qui tz'umal ri e achijab wi che quetal, xequicämisaj c'ut conojel ruc' ri ch'ich' re ch'o'j cuc'am, man xecuin taj ri aj Siquem xquito' ta quib.

²⁶ Xquicoj ri ch'ich' re ch'o'j che u cämisaxic ri Hamor xukuje' ri Siquem ri u c'ojol, xquesaj bic ri Din pa rachoch ri Siquem, xquic'am bic, xebec.

²⁷ Xepe ri niq'uiaj u c'ojol chic ri Jacob, xequitac'alela' ri cäminakib, xequeläk'aj bic ri jastak quech ri winak che u tojic u q'uexel ri c'ax ri xban che ri canab.

²⁸ Xequic'am bic chij, wacax, bur, ronojel ri c'o pa ri tinimit, xukuje' ronojel ri c'o pa ri juyub;

²⁹ xeboc che reläk'axic bic ronojel ri c'o pa tak ja, xequic'am bic ac'alab, ixokib.

³⁰ Xubij c'u ri Jacob che ri Simeon xukuje' ri Levi: “Ri ix in i yo'm pa jun latz'. Ri winak aj waral, ri aj cananeyib, ri aj perezeyib, cäquetzelaj na nu wäch. Cäquimulij na quib chwij, cäquiq'uis na tzij panuwi', man e q'ui ta c'u ne ri achijab ri e c'o wuc', quinquicämisaj na junam cuc' conojel ri e c'o pa wachoch.”

³¹ Xquitzelej c'u u bixic: “¿La are ta c'u takalic chi ri Siquem je cuban che ri kanab jas ri cäban che jun nim ch'utin?”