Chapletajic 29 - Quiché Bible

Ri Jacob copan pa Aran

¹ Ri Jacob xutakej ri u be, xbe c'u pa ri culew ri aj elebal k'ij.

² Xurika' jun c'ua' pa ri juyub, chunakaj ri c'ua' e c'o oxmulaj chij ri cätajin quebuxlanic, chila' c'u cäquitij wi qui joron ri awaj. Cojom jun nimalaj abaj che ch'ukubal u wi' ri c'ua',

³ aretak c'u conojel ri tzobaj caquimulij quib chila', ri ajyuk'ab cäquesaj ri abaj ri ch'ukubem u wi' ri c'ua', cäquiya' c'u qui joron ri qui chij, cäquich'uk chi c'u can u wi' ri c'ua'.

⁴ Ri Jacob xuc'ot qui chi' ri ajyuk'ab: “¿Jawije' quixel wi nu winak?” “Uj aj Aran,” xecha'.

⁵ Ri Jacob xubij chque: “¿La quich'ob u wäch ri Laban u c'ojol ri Nacor?” xcha' chi chque. “Je', cäkach'ob u wäch,” xecha'.

⁶ “¿La utz u wäch?” xcha' chi na ri Jacob chque. Ri ajyuk'ab xquibij che: “Je', utz u wäch ri Laban, chawilampe' ri u mia'l ri Raquel petinak e ruc'am ri u chij ri u tat,” xecha' ri ajyuk'ab.

⁷ Ri Jacob xubij chque: “C'ä c'o na ri k'ij, man ya'tal taj chi quebitz'apij ri chij chanim. ¿Jasche man quiya' qui joron, quebiyuk'uj ta chi c'u na jubik'?”

⁸ Ri ajyuk'ab xquibij che ri Jacob: “Man cuya' taj Je cäkaban wa'. Cäkeyej na chi cäquimulij quib conojel ri ajyuk'ab rech cäquesaj ri abaj ri tz'apibem u wi' ri c'ua' rech cujcuinic cäkaya' qui joron ri chij.”

⁹ Cätajin c'u cätzijon ri Jacob cuc' ri ajyuk'ab aretak xopan ri Raquel, e ruc'am ri u chij ri u tat, are c'u cajyuk' ri chij.

¹⁰ Aretak ri Jacob xril ri Raquel e ruc'am ri u chij ri Laban ri u xibal ri u nan, aninak xbe che resaxic ri abaj ri tz'apibem u wi' ri c'ua', xuya' qui joron ri chij;

¹¹ xuya' rutzil u wäch xutz'umaj ri u palaj ri Raquel, xok' ri Jacob.

¹² Aretak ri Jacob xutzijoj che ri Raquel chi ri are' are ral ri Rebec, ri rana'b ri Laban, aninak xbe ri Raquel xubij che ri u tat.

¹³ Aretak ri Laban xuta' u tzijol chi ri Jacob, ral ri rana'b, aninak xbe che u c'ulaxic, xulak'apuj, xuya' rutzil u wäch, xutz'umaj ri u palaj, xuc'am bic cho rachoch. Aretak e c'o chi pa ja, ri Jacob xutzijoj che ri Laban ronojel ri u c'ulmam,

¹⁴ xubij c'u ri Laban che: “Kas ba' tzij chi xa jun ka quiq'uel awuc'.” Jun ic' chic c'o ri Jacob ruc' ri Laban,

Ri Jacob xchacun che u ch'äquic ri Raquel xukuje' ri Lea

¹⁵ ri Laban xubij che ri Jacob: “Man rumal ta rech chi at wachalal, xak ta catchacun wuc' chi jeri'. Chabij chwe joropa' ri cawaj catintojo.”

¹⁶ E c'o c'u quieb u mia'l ri Laban: Lea u bi' ri nabeal, Raquel u bi' ri chak'axel.

¹⁷ Ri Lea sibalaj e tur ri e u bak'wäch; are c'u ri Raquel sibalaj cabitowic.

¹⁸ Benak chi c'u ranima' ri Jacob ruc' ri Raquel, rumal ri' xubij che ri Laban: “Quinchacun na wukub junab uc' la che u ch'äquic ri Raquel ri chak'axel mia'l la.”

¹⁹ Ri Laban xubij: “Utz ba', chawe quinya' wi chuwäch ri quinya' che jun winak ri man weta'm ta u wäch. Chatcanaj ba' can wuc'.”

²⁰ Jeri' ri Jacob xchacun wukub junab che u ch'äquic ri Raquel, man xuna' ta c'ut xeboc'ow ri junab rumal rech chi sibalaj benak ranima' ruc' ri Raquel.

²¹ Aretak xtz'akat ri wukub junab, ri Jacob xubij che ri Laban: “Ya' la ri wixokil rech quinc'uli' ruc', xtz'akat ya' ri junab ri xink'at che u ch'äquic.”

²² Ri Laban xebusiq'uij conojel ri u c'ulja rech quec'oji' ruc' pa ri nimak'ij rech ri c'ulanem.

²³ Ri Laban are c'u xuc'ama' ri Lea chak'ab, xujach che ri Jacob, xwar c'u ri Jacob ruc'.

²⁴ Ri Laban xusipaj jun ali che ri Lea Zilp u bi' che u lok'om pataninel.

²⁵ Ak'ab chucab k'ij ri Jacob xrilo chi ruc' ri Lea xwar wi, xuch'a' che ri Laban: “¿Jas ri banom la chwe? ¿La ma ta xinchacun uc' la che u ch'äquic ri Raquel? ¿Jas c'u che xinsub la?”

²⁶ Ri Laban xubij che: “Man uj nak'atal taj chi are ta cäc'uli' nabe ri chak'axel chuwäch ri nabeal.

²⁷ Chatz'akatisaj ba' ri wukub k'ij re ri a c'ulanem ruc' ri Lea, c'ä te' c'u ri' cäkaya' chic ri Raquel chawe we caya' a tzij chi catchacun chi na wukub junab wuc' che u ch'äquic.”

²⁸ Ri Jacob xuya' u tzij che ri xbix che; aretak c'u xtz'akat ri wukub k'ij re ri c'ulanem ruc' ri Lea, ri Laban xujach ri Raquel pa u k'ab rech coc che rixokil.

²⁹ Ri Laban xusipaj jun ali che ri Raquel Bil u bi', che u lok'om pataninel.

³⁰ Xc'uli' c'u ri Jacob ruc' ri Raquel, are c'u lok' xril na ri Raquel chuwäch ri Lea, xchacun chi c'u na wukub junab ruc' ri Laban.

Ri e u c'ojol ri Jacob

³¹ Aretak ri Ajawaxel xrilo chi ri Jacob cäretzelaj u wäch ri Lea, ri Dios xubano chi ri Lea quec'oji' ral, are c'u ri Raquel xuban che chi man quec'oji' ta ral.

³² Xcanaj c'u yawab winak ri Lea, xc'oji' jun ral ala ri xucoj Ruben che u bi', xubij c'ut: “Rilom ri Ajawaxel ri nu bis. Quinulok'ok'ej c'u na ri wachajil camic.”

³³ Ri Lea xc'oji' chi jun ral ala, xucoj Simeon che u bi', xubij c'ut: “Ri Ajawaxel xrilo chi quetzelax nu wäch, rumal ri' xuya' chi jun wal ala.”

³⁴ Xc'oji' chi c'u jun ral ala ri xucoj Levi che u bi', xubij c'ut: “Camic cäjeki' na ri wachajil wuc', e walam chi c'u oxib u c'ojol.”

³⁵ Xc'oji' chic jun ral ala ri Lea, xucoj Juda che u bi', xubij c'ut: “Camic quinya' u k'ij ri Ajawaxel.” Man e c'o ta chi c'u ral xec'ojic.