Chapletajic 2 - Quiché Bible

Xuxlan c'ut ri Dios

¹ Xtz'akat c'u u banic ri caj ulew, xukuje' conojel ri jastak ri e c'o pa ri caj xukuje' ri e c'o cho ri uwächulew.

² Aretak xurik ri uwuk k'ij ri Dios u q'uisom chic u banic ri xuchaplej u banic, xtani' c'ut.

³ Xutewichi'j c'ut ri uwuk k'ij, xuk'alajisaj c'ut chi tastalicalaj k'ij, rumal rech chi pa we k'ij ri' xtani' che u banic ronojel ri chac ri xebubano'.

Ri achi chupam ri ticonijibal Eden

⁴ Are wa' ri u tzijobelil ri u banic ri caj xukuje' ri ulew. Aretak ri Ajawaxel Dios xuban ri caj ulew,

⁵ maja' c'u c'o jun k'ayes cho ri uwächulew mawi c'o jun ichaj q'uiyinak rumal rech chi ri Ajawaxel Dios maja' cukasaj jäb puwi' ri ulew, mawi c'o jachin caticow ri ulew.

⁶ Cäq'uiy c'u ulok ja' pa ri ulew, ri cuja'j ronojel ri ulew.

⁷ Are' c'u ri Ajawaxel are xucoj ri puc'uc' ulew che u nuq'uic ri achi, xuxlab c'u pa u tza'm xuya' c'u u c'aslemal. Jeri' ri achi xuchaplej c'aslemal.

⁸ Ri Ajawaxel xusuc'umaj jun ticonijibal chupam ri ulew Eden ri c'o pa elebal k'ij, chila' xuya' wi ri achi ri xbantaj rumal.

⁹ Ri Dios xebuq'uiyisaj chila' ronojel qui wäch je'licalaj tak che' ri quequiya' utzalaj tak wächinic utz qui tijic. Pa u niq'uiajil c'ut ri ticonijibal xucoj wi ri juwi' che' re ri c'aslemal, xukuje' ri juwi' che' ri cuya' retamaxic ri utz xukuje' ri man utz taj.

¹⁰ Pa Eden cäq'uiy wi jun nima' ri cuja'j ri ticonijibal chila' c'ut cujach wi rib we nima' ri' pa quiejeb.

¹¹ Ri nabe nima', Pison u bi', ri cäk'ax pa ronojel ri ulew Habil, jawije' c'o wi k'an puak.

¹² Ri k'an puak ri c'o pa ri ulew ri' sibalaj pakal rajil, xukuje' c'o c'oc'alaj k'ol chila'; xukuje' abaj re onis.

¹³ Ri ucab nima', Jihon u bi', ri cäk'ax pa ronojel ri ulew Cus.

¹⁴ Are c'u ri urox are' ri nima' Tigris, ri cäk'ax pa elebal k'ij che ri Asiriy. Ri ucaj are' ri nima' Euprats.

¹⁵ Aretak ri Ajawaxel Dios xucoj ri achi chupam ri ticonijibal Eden rech cutajij xukuje' cuchajij,

¹⁶ xuya' we takanic ri' che: “Cuya' catij awe ri qui wäch conojel ri che' ri e c'o pa ri ticonijibal, Matij c'u awech ri u wäch ri che' ri cuya' retamaxic ri utz xukuje' ri man utz taj.

¹⁷ Matij awe ri u wäch ri che' ri', we catijo kastzij catcäm na.”

¹⁸ Xubij c'u ri Ajawaxel Dios: “Man utz taj chi ri achi xak u tuquiel cäc'ojic. Quinban jun to'l rech ri takal che.”

^19-20 Are c'u ri Ajawaxel Dios ulew xucoj che qui banic conojel ri awaj xukuje' conojel tak ri chicop ri c'o qui xic', xebuc'am c'u ulok chuwäch ri achi rech quebucoj qui bi'. Ri achi xucoj qui bi' conojel ri awaj aj uwo ja, conojel ri chicop ri c'o qui xic' xukuje' conojel ri juyubal tak awaj, are c'u bi'aj wa' xcanaj chque. Man c'o ta c'u ne jun chque ri utz ta xel che to'l rech ri xtaki' ta che.

²¹ Ri Ajawaxel Dios xuwartasaj ri Adan aretak c'u kajinak che waram ri Dios xresaj jun chque ri u c'alc'a'x, xuban c'u can u banic ri u ti'jal.

²² Ri Ajawaxel Dios xucoj we c'alc'a'x ri' che u banic jun ixok, xujach c'u pa u k'ab ri Adan.

²³ Aretak ri Adan xril ri ixok, ruc' quicotemal xubij: “¡Are kas u tz'akatil ri nu ti'jal wa' xukuje' u tz'akatil ri nu bakil! ‘Ixok’ cuchi'x na, che c'u ri achi xresaj wi ri Dios.”

²⁴ Rumal c'u ri' ri achi quebuya' can ri u tat u nan rech cätuni' ruc' ri rixokil, ri e quieb quebux na xa jun winak.

²⁵ Ri achi jacha' ri ixok e ch'anach'oj, man c'o ta c'u jun chque ri quieb xuna' ta q'uixbal chi jewa' qui banom wa'.