Bixonic Tak 8 - Quiché Bible

¹ ¡C'o ta banom wi chi at ta nu xibal, ri xatq'uiyisax ta cumal ri e uwo u c'u'x ri nu nan! Jeri', aretak ta catinrik pa ri be, cuya' ta c'u ri' quintz'umaj ta ri a palaj ma ta c'u c'o jachin jun qui nu yok'o;

² cuya' ta c'u ri' catinc'am bic pa rachoch ri nu nan, catin coj ta c'u bic chupam, at ta c'u ri' ri catux wajtij. In quinya' ta c'u ri' ri ruq'uiaxic ri u wa'l uva chawe ri sibaj ta utz na xukuje' ri qui wa'l tak ri nu crabaj.

³ ¡Chuya' ta c'ut ri u mox k'ab chuxe' ri nu jolom, qui nu lak'apuj ta c'ut ruc' ri riquiak'ab!

Ri achi xubij:

⁴ “Chi chi'j chwe, ixokib aj Jerusalen, chi man quiwesaj taj ri u waram ri lok' chnuwäch ¡Chiya' che chi warok c'ä jampa' chraj chc'astajok!”

Uwak bix Ri e rachil xquibij:

⁵ “¿Jachin wa' ri cätajin capaki' ulok pa ri chaki'j uwo sak, tzalan puwi' ri u teleb ri lok' chuwäch?” “Chuxe' jun u che'al mansa'n xinya' wi latz' che ri a waram: chila' jawije' xebucoch' wi k'oxom ri a nan; chila' jawije' xatralaj wi ri a nan.”

Ri achi xubij: Ri ixok xubij:

⁶ “Chinac'ama' bic chinat'ika' bic puwi' ri awanima', ¡chinac'ama' bic chinat'ika' bic che ri u kul ri ak'ab! Ri lok'ok'ebal c'uxaj sibalaj c'o u chuk'ab jacha' ri cämical; ri ajwanic, man casubun taj jacha' ri quemuk wi ri cäminakib. ¡Ri k'ak' ri canicowic aj lok'ok'ebal c'uxaj are' jun k'ak' aj Dios!

⁷ Ri qui ja'il conojel tak ri plo man quecuin ta ri' che u chupic ri lok'ok'ebal c'uxaj; mawi ta ne tak ri nima' quecuin ta che u chupisaxic. We ta c'o jun quebuchi'j ta conojel ri u k'inomal che u q'uexwäch ri lok'ok'ebal c'uxaj, xa etz'ben tak wächaj cuc'ulaj na.”

Ri e rachil xquibij:

⁸ “Ri alaj ka chak' man e c'o ta uwo tak u c'u'x. ¿Jas quekabana' na che aretak cheltokok?

⁹ We ta jun nimalaj tapia que ka yac ta wikbal ri' puwi' re sak puak; We ta jun uchi'ja, que ka ch'uk ta rij ri' cuc' tak tz'alam re chacalte'.”

Ri ixok xubij:

¹⁰ “In in junam ruc' jun nimalaj tapia, ri e uwo nu c'u'x e jacha' tac'atak tak ja. Rumal ri', chquiwäch ri e u bak'wäch are', nu rikom chic ri utzilal.

¹¹ Ri Salomon xc'oji' jun u ticbal u uva pa Baal-amon. Xujach can pa qui k'ab chajinelab, aretak c'u cayactaj ri u wächinic caquijach jun mil sak puak che chquijujunal.

¹² Ri jun mil puak e awech Salomon, quieb sient c'ut chque ri chajinelab ¡in quinchajij ri kas nu ticbal uva!”

Ri achi xubij:

¹³ “¡Chaya' chwe chi quintatabej ri a chabebal, ajawinel ixok' quech tak ri ticbal tak cotz'i'j! ¡Ri e kachil queyem u tatabexic!”

Ri ixok xubij:

¹⁴ “¡Chatxic'anok, nu lok', chatxic'anok jacha' jun masat aj lianic, jacha' ri ral jun ati't masat paquiwi' tak ri juyub nojinak chque tak c'oc'al!”