Bixonic Tak 7 - Quiché Bible

Ri achi xubij:

¹ “¡Sibalaj e je'l tak ri e awakan chquipam tak ri xajäb, u mia'l ajawinel! Ri e u mejic tak ri u xe' a pam e jacha' tak ri wikbal re utzalaj k'an puak ri e banom cumal nawinel tak k'abaj.

² Ri a muxux jun kumubal quetequic ri amak'el c'o utzalaj u wa'l uva chupam; ri apam jun pila trico sutim rij chque tak roxox.

³ Ri e uwo a c'u'x e quieb alaj tak masat aj lianic, quieb alaj tak masat yo'xab.

⁴ Ri a kul jun tac'atic ja re marpil; ri e quieb a bak'wäch e quieb c'olbal tak ja' re ri tinimit Esbon, chunakaj ri oquibal re Bat-rabim; ri a tza'm junam ruc' ri tac'atic ja aj Libano ri caca'y apan che ri tinimit aj Damasc.

⁵ Ri a jolom, puwi' ri a cuerp, xak junam ruc' ri juyub Carmel; bätz' aj azul ri e a wi': ¡jun ajawinel yututal chquipam tak ri e u c'olotil!

⁶ Nu lok', ixok ch'äcanel, ¡man at c'o ta at c'o wi, sibalaj at je'lic!

⁷ Ri a taq'ui'c jacha' ri u taq'ui'c juwi' tut; ri e uwo a c'u'x e jacha' jutak tzayaj u wäch tut.

⁸ In quinchomaj quinpaki' puwi' ri juwi' tut quebenwechbej tak c'ut ri e u wäch. Ri e uwo a c'u'x quebux c'u na jacha' jutak tzayaj uva; ri awuxlab, u c'oc'al tak mansa'n,

⁹ ri u pa a chi', jacha' ri utzalaj u wa'l uva ri sibalaj ch'uch'uj cakaj bic coc'ow pa ri chi'aj xukuje' pa ri wareaj.”

Ri ixok xubij:

¹⁰ “In in rech ri in lok' chuwäch: ri e u chuk'ab ri u lok'ok'ebal c'u'x quec'amow ulok wuc'.

¹¹ ¡Tasaj, ri catinlok'ok'ej, jo' pa ri kulew! Cakoc'owisaj na ri ak'ab chquixo'l tak ri e u cotz'i'j pok'.

¹² Nim a k'ab c'ut cujbe na jawije' e tiquil tak wi ri uva, che rilic we e tuxinak chic, we cätajin quepok' chic ri qui cotz'ijal, we e cotz'ijaninak chic ri e u che'al ri crabaj. ¡Chila' c'u quiya' wi ri nu lok'ok'ebal c'uxaj chawe!

¹³ Ri e tak u xe' ri k'ayes ri cunabal caquijabuj ri qui c'oc'al. Chuchi' ri kachoch e c'o ronojel qui wäch che': chaki'j tak wächinic xukuje' wächinic ri c'äte' qui ch'upic, ri e nu tasom chawe, ri lok' chnuwäch.”