Bixonic Tak 6 - Quiché Bible

Ri e rachil xquibij:

¹ “¿Jawije' ri xbe wi ri lok' chawäch je'lic chquixo'l tak ri je'lic? ¿Jawije' ri xutakej wi u be? ¡Cujbe na awuc' che u tzucuxic!”

Ri ixok xubij:

² “Ri lok' chnuwäch benak pa ri ticbal u cotz'i'j, chupam ri ticbal u cotz'i'j ri c'oc'arinak, che u yuk'uxic ri u jumulaj xukuje' che qui ch'upic tak ri roxox.

³ In in rech ri lok' chnuwäch, xukuje' ri are' wech in. Ri are' cuyukuj ri u jumulaj xo'l tak ri roxox.”

U ri' bix Ri achi xubij:

⁴ “At, at lok' chnuwäch, at je'lic xukuje' at ch'äcanel jacha' ri tinimit Tirs xukuje' Jerusalen; man cäk'atitaj taj jacha' juk'at ajch'ojab ri qui takem qui be.

⁵ ¡Chatanaba' nu ca'yexic, in ch'äctajinak c'u cumal ri a bak'wäch! Ri e a wi' quejunamataj cuc' ri alaj tak q'uisic' ri quech'opilaj pa tak ri juyub Galaad.

⁶ Ri e a ware, conojel e tz'akat, quejunamataj cuc' ri jumulaj tak chij ri c'äte qui walijic ulok che atinem ri e suc'umatal chic rech quesocax tak ri quij.

⁷ Ri e caperaj a palaj e caperaj crabaj ri e c'utal chrij ri ch'ukubal awib.

⁸ E oxc'al ri e ajawinelab ixokib e jumuch' ri man kas ta e ixokilab sibalaj c'u e q'ui ri k'apojib,

⁹ are c'u ri alaj nu ut ri k'apoj xa jun u tuquiel xa jun ri mialaxel ri sibalaj cajwaxic rech ri ixok ri xalanic. Aretak xca'yex cumal ri alitomab xequicot ruc'; xukuje' tak ajawinelab ixokib xukuje' ri man kas ta e ixokilab caquiya' u k'ij.”

Ri e rachil xquibij:

¹⁰ “¿Jachin wa' ri cutac'abaxtaj rib jacha' ri k'ij re ri u sakaribal? Je'lic jacha' ri ic', cäjuluwic jacha' ri k'ij, ¡man c'o ta jun cacuin ta che u k'atixic jacha' juk'at ajch'ojab ri qui takem qui be!”

Ri ixok xubij:

¹¹ “Xinbe pa ri qui juyubal ri nogal che u rayixic ri räx chuchi' ri nima'; are quinwaj quebenwil ri qui tux ri juwi' tak uva xukuje' ri qui cotz'ijal tak ri crabaj.

¹² Man xinwetamaj ta chi c'ut jas ri xc'ulmatajic c'ä xinna' na wib in c'o chupam jun carwaj chuxcut ri u c'ojol ri wajawinel.”

Ri e rachil xquibij:

¹³ “¡Chattzelej ulok, aj Sulamit! ¡Chattzelej ulok! ¡Chattzelej ulok, cäkaj catkilo!” “¿Jas c'ut ri qui waj quiwil che ri aj sulamit?” “¡Jun xojowem jacha' ri cäban pa tak ri kajebal!”