Bixonic Tak 5 - Quiché Bible

Ri achi xubij:

¹ “In oquinak chic chupam ri nu ticbal cotz'i'j alaj wana'b, at ri catec'ulan wuc'. Nu majim chic ri nu mir xukuje' tak ri c'oc'al ri e ya'tal chwe, nu naom chic ri juyubal räx cab re ri wakaj, uq'uiatajinak chic ri u wa'l nu uva xukuje' ri nu leche.” “Lok'alaj tak wachil, chixwok xukuje' chixuq'uianok, ¡Chiwuq'uiaj ronojel ri qui waj!”

Xubij chque ri e rachil: Ucaj Bix Ri ixok xubij:

² “Ri in cätajin quinwaric c'asc'atinak c'ut ri wanima'. Xinto chi ri quinlok'ok'ej casiq'uin chuchi' ri uchi'ja: ‘¡Chajaka' chnuwäch, nu lok'; alaj wana'b, alaj nu ut ri k'apoj! ¡Ri nu jolom nebel rumal ri räxk'ab! ¡Ri räxk'ab re ri chak'ab cabelel pa nu jolom!’

³ ‘Wesam chic ri watz'iak; ¡quebencoj chi c'u na ri' jumul! E nu ch'ajom chic ri wakan; ¡quenoj chi c'u ri' jumul che ri puc'uc' ulew!’

⁴ Ri quinlok'ok'ej xunim ulok ri u k'ab chupam ri u julil ri uchi'ja. ¡Are wa' ri sibalaj xinslabesanic!

^5-6 C'äte' c'u ri' xinwalij che u jakic chuwäch ri nu lok'. Chque ri nu k'ab xukuje' chque ri u wi' nu k'ab xekaj tak u tz'ujal mir puwi' ri c'opibal rech ri oquibal. ¡Aretak xinto xch'awic xinna' chi quincämic! Xinjak ri oquibal chuwäch ri nu lok', man c'o ta chi c'ut ri are' chi'. Xinsiq'uij man c'o ta xutzelej u bixic chwe.

⁷ Xinrik cumal ri chajinelab ri quebanow ri solinic chupam ri tinimit; xinquich'ayo, xinquisoco; ¡ri quechajin ri oquibal chupam ri tinimit ruc' chuk'ab xquijolij ri nu ch'ukubal!

⁸ Ixokib aj Jerusalen, we quirik ri nu lok', chichi'j chwe chi quibij che chi cätajin quincäm rumal lok'ok'ebal c'uxaj.”

Ri e rachil xquibij:

⁹ “¿Jas ri u jalbem rib ri a lok', je'lic chquixo'l tak ri je'lic? ¿Jas ri u jalbem rib ri calok'ok'ej chi cujatakchi'j che u banic we chi'nic ri'?”

Ri ixok xubij:

¹⁰ “Ri nu lok' räxbak'alic sakpak'alic, man sachbal ta chquixo'l ri mil tak achijab.

¹¹ Ri u jolom re utzalaj k'an puak; ri u wi' u k'ajom tak rib k'ek k'ek jacha' jun joj;

¹² ri e u bak'wäch e quieb ut ri e atinisam chupam leche, ri e kajinak chunakaj jun c'olbal ja';

¹³ ri e jutak peraj u palaj e nimak tak ticbal cotz'i'j ri e c'o wi c'oc'alaj tak cotz'i'j. Ri e u chi' e roxox tak ri quebelel wi ulok jutak tz'uj mir;

¹⁴ ri e u k'ab e lak'apubal k'abaj re k'an puak ri ch'ukutal quij che ri je'lic abaj ri topas; ri u cuerp pilimalaj marpil ri u ware ri elepant ri e ch'epom tak je'lic abaj ri sapir che.

¹⁵ Ri e u ch'ec e tak rakan ja re marmol ri co e tac'al paquiwi' tak tac'alibal re utzalaj k'an puak; ri u bantajic man sachbal taj jacha' ri e chacalte' re ri Libano;

¹⁶ ri u pa u chi' man c'o ta c'o wi ri u qui'al. ¡Ronojel are' are jun ch'äcanel! Je u banic wa' ri nu lok', je u banic wa' ri lok' chwe, ixokib aj Jerusalen.”