Bixonic Tak 4 - Quiché Bible

Ri achi xubij:

¹ “¡Sibalaj at je'lic nu lok'! ¡Sibalaj at je'lic! Ri e a bak'wäch e quieb ut e c'utal chrij ri a ch'ukubal; ri e a wi' e jacha' alaj tak quisic' ri quech'opilaj pa tak ri juyub re Galaad.

² Ri e a ware conojel utz qui banom, e jacha' jumulaj tak chij ri c'äte' ri' quewalij ulok che atinem ri e suc'umatal chic che u kopixic ri quij.

³ Ri e a chi' e quiäk e jacha' quiäk bätz', e ch'äcanelab tak c'ut ri e a tzij. Ri e a palaj e caperaj crabaj e c'utal chrij ri a ch'ukubal.

⁴ Ri a kul cabititic jacha' ri tac'atic u ja ri David, ri xyac che qui tanibal ch'ojibal. E xequel c'u jun mil e qui quetecak tak ch'ich' chupam, qui quetequic ch'ich' cowilaj tak ajch'ojab.

⁵ Ri e uwo a c'u'x e quieb masat ri aj lianic, quieb masat yo'xab ri quebe echa' xo'l tak ri roxox.

⁶ Pa ri u petic ri k'ij quebanimaj tak c'ut ri mumu'j. Quinbe na pa ri u juyubal ri mir, puwi' ri juyub ri c'o wi c'oc' k'ol.

⁷ ¡At je'lic, nu lok'; at je'lic cächaptaj chque ri awakan c'ä che ri a jolom! ¡Man c'o ta jun a yab c'olic!

⁸ Chatkaj ulok wuc', chaya' can ri Libano, at ri catec'ulan wuc'; chatkaj ulok wuc' chaya' can ri Libano. Chaca'yej ulok ri beya' kas puwi' ri Amana, kas puwi' ri Senir xukuje' ri Hermon; kas pa ri qui jul ulok tak ri coj, kas pa tak ri qui juyubal tak ri leopard.

⁹ Xaweläk'aj ri wanima', alaj wana'b, at ri catec'ulan wuc'; xaweläk'aj ri wanima' ruc' xa jun a cayenic ri xaya' chwe, ruc' jun chque ri jujun tak rabaj a chachal.

¹⁰ ¡Man e c'o ta c'o wi ri e a lok'ok'enic, alaj wana'b, at ri catec'ulan wuc'! ¡Sibalaj e qui' na ri e a lok'ok'enic chuwäch ri u wa'l uva, are c'o na ri qui je'lical tak ri e a c'oc'al chquiwäch conojel ri cäbanbex quech conojel ri c'oc'al!

¹¹ At ri catec'ulana wuc', chque ri e achi' queq'uiy ulok juyubal räx cab. ¡Juyubal räx cab xukuje' leche e c'o chuxe' ri awak'! ¡Jacha' ri u c'oc'al ri Libano jeri u c'oc'al ri awatz'iak!

¹² At, alaj wana'b, at ri catec'ulan wuc', at ticbal cotz'i'j tz'apitalic, tz'apim ja', t'ikom bulbux;

¹³ ticbal cotz'i'j ri queq'uiy wi ulok e u che'al crabaj ri quequiya' je'licalaj tak qui wächinic; ticbal cotz'i'j ri e c'o wi cotz'i'j pok',

¹⁴ e ajetak cotz'i'j nard xukuje' asapran, c'oc'alaj aj xukuje' cane'l, xukuje' ronojel qui wäch tak che' re c'oc' k'ol, re mir re aloe; ¡Ronojel qui wäch tak ri quebanbex c'oc'al!

¹⁵ Ri u q'uiyibal ja' pa ri ticbal cotz'i'j are jun c'ua' ri caq'uiy wi ulok ri ja' ri cakaj ulok kas pa ri Libano.

¹⁶ Quiakik' re ri u wiquiak'ab elebal k'ij: ¡Chatc'astajok! Quiakik' re ri u mox k'ab elebal k'ij: ¡Tasaj waral! ¡Chixjich'ich' chupam ri nu ticbal cotz'i'j chijabuj c'ut ri u c'oc'al!” “Tasaj nu lok', chupam ri a ticbal cotz'i'j, chebatija' c'u awe ri e qui wächinic ri man c'o ta c'o wi ri u qui qui'al.”