Bixonic Tak 3 - Quiché Bible

¹ Chupam ri nu ch'at, pa tak chak'ab xintzucuj ri cälok'ok'ex rumal ri nu c'aslemal. Xintzucuj man c'u xinrik taj.

² Xinwalij c'ut xinbinibej ri tinimit che u tzucuxic ri cälok'ok'ex rumal ri nu c'aslemal xo'l tak ri ja xukuje' pa tak ri c'ayibal. Xintzucuj man c'u xinrik taj.

³ Xinc'ot qui chi' ri chajinelab ri quesolin ri tinimit: “¿La man iwilom ix ri cälok'ok'ex rumal ri nu c'aslemal?”

⁴ Xa jubik' e nu yo'm canok, aretak xinrik apan ri cälok'ok'ex rumal ri nu c'aslemal. Xinchapapej che ri u k'ab, man xintzokopij taj xinc'am bic chupam ri rachoch ri nu nan.

Ri achi xubij:

⁵ “Chiya' i tzij chibij chwe, ixokib aj Jerusalen, cumal tak ri masat aj lianic xukuje' cumal tak ri ati'tab tak masat ri e co pa ri c'ache'laj, chi man qui wesaj taj ri u waram ri lok' chnuwäch. ¡Chiya' che chi warok c'ä jampa' chraj chc'astajok!”

Urox bix Ri e rachil xquibij:

⁶ “¿Jas wa' ri petinak pa ri chaki'j uwo sak cätajin c'u cabin chquixo'l tac'atak tak sib, chupam u sibal mir xukuje' re c'oc' k'ol xukuje' re ronojel u wäch c'oc'al?

⁷ ¡Are ri u telew ri Salomon! Chajital cumal oxc'al ajch'ojab ri sibalaj c'o na qui chuk'ab pa Israel;

⁸ conojel queta'm caquicoj ri ch'ich' re ch'o'j e ajch'ojab c'ut ri quesan chic qui no'j; chquijujunal tzayal ri qui ch'ich' re ch'o'j xe'quipam che u to'ic quib we ne c'o u q'ueyowal caquitaklebej chak'ab.

⁹ Ri ajawinel Salomon u banom jun u telew cuc' che' ri pakal cajil re ri Libano.

¹⁰ Ri e rakan e re sak puak; ri u k'elibal chrij re k'an puak; ri t'uyulibal azul cojom puwi': ri u pam wiktal ruc' lok'ok'ebal c'uxaj cumal ri ixokib aj Jerusalen.

¹¹ Ixokib re Sion, ¡Chixel ulok che u ca'yexic ri ajawinel Salomon! U cojom bic ri u corona ri xuban ri u nan che che ri k'ij re ri u c'ulanem, che ri k'ij ri sibalaj utz na che ri u c'aslemal.”