Apocalipsis 7 - Quiché Bible

Ri camak' tak ri e aj Israel ri xcoj quetal

¹ Aretak xebantaj we jastak ri', xebenwil quiejeb tako'nib aj caj ri e tac'atoj paquiwi' ri quiejeb u tza'm ri uwächulew. Qui chapom ri quiejeb quiakik', rech man cäjich'ich' ta ri quiakik' cho ri uwächulew, mawi cho ri plo, mawi puwi' apachique che'.

² Xinwil chi jun tako'n aj caj ri cäpaki' ulok pa ri relebal k'ij, ruc'am ri u t'ikbal ri c'aslic Dios. Xurak u chi' ruc' chuk'ab chque ri quiejeb tako'nib aj caj, ri xya' chque ri u banic c'ax che ri uwächulew xukuje' che ri plo,

³ xubij chque: “Miban c'ax che ri uwächulew, mawi che ri plo, mawi chque ri che', c'ä cäkacoj na quetal ri u pataninelab ri ka Dios ruc' jun t'ikbal cho ri u metz'al ri qui palaj.”

⁴ Xinta' ri cajilabal ri xcoj quetal, are jun sient cawinak quiejeb mil (144,000) chque conojel ri e camak' ri e aj israelib.

⁵ Che ri ramak' ri Juda, cablajuj mil (12,000) xcoj quetal. Che ri ramak' ri Ruben, cablajuj mil (12,000) xcoj quetal. Che ri ramak' ri Gad, cablajuj mil (12,000) xcoj quetal.

⁶ Che ri ramak' ri Aser, cablajuj mil (12,000) xcoj quetal. Che ri ramak' ri Neptali, cablajuj mil (12,000) xcoj quetal. Che ri ramak' ri Manases, cablajuj mil (12,000) xcoj quetal.

⁷ Che ri ramak' ri Simeon, cablajuj mil (12,000) xcoj quetal. Che ri ramak' ri Levi, cablajuj mil (12,000) xcoj quetal. Che ri ramak' ri Isacar, cablajuj mil (12,000) xcoj quetal.

⁸ Che ri ramak' ri Zabulon, cablajuj mil (12,000) xcoj quetal. Che ri ramak' ri Jose, cablajuj mil (12,000) xcoj quetal. Che ri ramak' ri Benjamin, cablajuj mil (12,000) xcoj quetal. E are tak wa' ri xcoj quetal.

Ri q'uialaj winak ri quicojom sakloloj tak atz'iak

⁹ Aretak e bantajinak chi we jastak ri', xinca'yic, xinwil q'uialaj winak, ri man c'o ta jun cäcuin che cajilaxic, ronojel qui wäch tak tinimit, amak', winakil, ch'abal. E tac'atoj chuwäch ri tem re ajawibal xukuje' chuwäch ri Alaj Chij, quicojom sakloloj tak atz'iak xukuje' cuc'am u xak tak tut pa qui k'ab.

¹⁰ Xquirak qui chi' ruc' chuk'ab, xquibij: “Ri colobal ib are' ri ka Dios yowinak, ri t'uyul puwi' ri tem re ajawibal, xukuje' ri Alaj Chij.”

¹¹ Conojel ri tako'nib aj caj e tac'atoj chrij ri tem re ajawibal xukuje' chquij ri nimak tak tatayib xukuje' chquij ri quiejeb awaj. Xexuqui' chuwäch ri tem, xquikasaj ri qui palaj cho ri ulew, xquik'ijilaj ri Dios,

¹² je xquibij wa': “¡Je' chbanok! Ri tewichibal, xukuje' ri juluwem, xukuje' ri no'j, xukuje' ri maltioxinic, xukuje' ri nim ilic, xukuje' ri cuinem, xukuje' ri chuk'ab cheyok che ri ka Dios amak'el chbe k'ij sak. Je chbanok.”

¹³ Jun c'ut chque ri nimak tak tatayib, xubij chwe: “¿Jachin tak wa' ri qui cojom sakloloj tak atz'iak? ¿Jawije' e petinak wi?”

¹⁴ Xinbij c'u che: “Wajaw, wa' lal lal etamaninak.” Ri are' xubij chwe: “E are wa' ri e elinak ulok pa ri nimalaj c'axc'olil, ri qui ch'ajom ri catz'iak, xquisakarisaj pa ri u quiq'uel ri Alaj Chij.

¹⁵ Rumal ri' e c'o chuwäch ri u tem ri Dios re ajawibal, ri e are' quepatanij chi pa k'ij chi chak'ab pa ri rachoch. Ri t'uyul puwi' ri tem c'o cuc', quebuchajij.

¹⁶ Man quenum ta chic, mawi cächak'ij chic qui chi'. Man quec'at ta chic rumal ri k'ij, man c'o ta chi k'ak' cuban c'ax chque.

¹⁷ Are' c'ut ri Alaj Chij ri c'o pa u niq'uiajil ri tem re ajawibal quebuyuk'uj na, cuc'am na qui be pa tak qui q'uiyibal ja' re c'aslemal. Ri Dios cusu' na ri u wa'l qui wäch.”