Apocalipsis 16 - Quiché Bible

Ri e kumubal ri e re c'äjisabal wächaj

¹ Xinta' jun cowilaj ch'abal ri xel ulok pa ri k'ijilabal, ri xubij chque ri wukub tako'nib aj caj: “Jix, chik'ija' puwi' ri uwächulew ri wukub lak re ri royowal ri Dios.”

² Xbe ri nabe tako'n aj caj, xuk'ij ri u lak puwi' ri uwächulew. Xpe c'u jun itzelalaj ch'a'c sibalaj c'ax chque ri winak ri qui c'amom ri retal ri itzel awaj xukuje' chque ri cäquik'ijilaj ri u wächbal.

³ Ri ucab tako'n aj caj xuk'ij ri u lak puwi' ri plo. Xux c'u quic' je ta ne ri u quiq'uel jun cäminak. Xecäm c'u conojel ri e c'asal pa ri plo.

⁴ Ri urox tako'n aj caj xuk'ij ri u lak paquiwi' tak ri nima' xukuje' paquiwi' ri e q'uiyibal tak ja', xebux c'u quic'.

⁵ Xinta' c'u ri tako'n aj caj que tak ri ja' ri je xubij wa': “Lal ri' ri lal suc', ri c'o la, ri c'o la ulok ojer, ri tastalic ri man queban ta la etzelal, rumal rech chi k'atom la tzij paquiwi' we jastak ri'.

⁶ U mac rech chi we winak ri' xquituruwisaj ri qui quiq'uel ri tastalic tak winak aj Dios, xukuje' ri quech ri e k'axal tzij, yo'm c'u la quic' chque pa u q'uiaxic. ¡Takal c'u chque!”

⁷ Xinta' chi jun aj porobal je xubij wa': “Je', Ajawaxel, Dios ri c'o ronojel cuinem uc' la. Kastzij xukuje' suc' ri k'atoj tzij ri xban la.”

⁸ Ri ucaj tako'n aj caj xuk'ij ri u lak puwi' ri k'ij. Xya' c'u che ri k'ij chi quebuc'atisaj ri winak ruc' k'ak'.

⁹ Xec'at c'u ri winak ruc' nimalaj k'ak'. Man xquiq'uex ta c'u qui c'u'x, man xquinimarisaj ta u k'ij ri Dios. Xane' xiquiyok' ri u bi' ri Dios, ri c'o u takanic paquiwi' ri c'axc'olil ri'.

¹⁰ Ri uro' tako'n aj caj xuk'ij ri u lak puwi' ri u tem ri itzel awaj re ajawibal. Xk'ekumar c'u ri rajawibal. Ri winak xquicach'uj ri cak' rumal rech ri k'oxowem.

¹¹ Xquiyok'ok'ej ri Dios aj caj rumal rech ri qui k'oxowem xukuje' ri qui ch'a'c. Man xquiq'uex ta c'u qui c'u'x chquij ri qui chac.

¹² Ri uwak tako'n aj caj xuk'ij ri u lak puwi' ri nimalaj nima' Euprats. Xtzaj c'u ri ja' chupam, rech cäsuc'umataj ri qui be ri ajawinelab aj elebal k'ij.

¹³ Xinwilo chi quebel ulok pa u chi' ri dragon, pa u chi' ri itzel awaj, xukuje' pa u chi' ri u jalum rib chi k'axal tzij, oxib tz'ilalaj tak uxlabal e je jas ri xtutz'.

¹⁴ E are wa' e cuxlabal itzel tak uxlabal. Xequiban etal, xebe cuc' ri ajawinelab re ronojel ri uwächulew, xequimulij che u banic ri ch'o'j re ri nimalaj u k'ij ri Dios ri c'o ronojel u cuinem.

¹⁵ Chiwilampe', quinpetic je jacha' jun eläk'om. Utz re ri cäc'asc'atic, ri quebuchajij ri ratz'iak, rech man ch'anal taj cäbinic, man quebel ta ri u q'uixbal.

¹⁶ Xequimulij c'u ri ajawinelab pa ri c'olbal Armajedon, are' ri u bi' pa ri ch'abal hebrey.

¹⁷ Ri uwuk tako'n aj caj xuk'ij ri u lak pa ri quiakik'. Xel c'u ulok jun cowilaj ch'abal pa ri k'ijilabal, ri kas xel ulok pa ri tem re ajawibal, ri xubij: “Xbantajic.”

¹⁸ Xepe c'u caypa', ch'abal, xukuje' xuban jun cakulja; xuban jun nimalaj cabrakan, man c'o ta jun cabrakan ri je ta u banom wa' kas aretak e c'olinak ri winak cho ri uwächulew; sibalaj c'u nim ri cabrakan.

¹⁹ Xuban oxib ch'akatak ri nimalaj tinimit. Xetzak ri qui tinimit tak ri amak'. Ri nimalaj Babilon xnataj che ri Dios. Xuya' c'u re ri kumubal u wa'l uva, are ri c'äjisabal u wäch ri xtak ulok rumal ri Dios pa ri royowal.

²⁰ Conojel ri ch'akatak tak ulew ri e c'o pa qui niq'uiajil tak ri plo xebanimajic, xukuje' tak ri juyub man xeriktaj ta chic.

²¹ Xekaj c'u ulok nimak tak sakbach chicaj paquiwi' ri winak, ri quepajan jujun quintal. Ri winak xquibij c'axalaj tak yok'obal chrij ri Dios rumal rech ri c'axc'olil re ri sakbach. Sibalaj nim c'ut ri c'ax ri xubano.