Apocalipsis 11 - Quiché Bible

Ri e quieb k'alajisanelab

¹ Xya' jun aj chwe junam ruc' jun etabal. Xbix c'u chwe: “chatwalijok, chawetaj ri rachoch Dios xukuje' ri porobal. Chebawajilaj ri quek'ijilan chila'.

² Mawetaj ri uwo ja ri c'o cho ri rachoch Dios, rumal rech chi yo'm chque ri man aj judeyib taj. Ri e are' cäquitac'alej na ri tastalicalaj tinimit cawinak quieb ic'.

³ Quinya' na chque ri quieb nu k'alajisanelab, chi cäquitzijoj na ri nu tzij jun mil quieb sient oxc'al (1260) k'ij, qui cojom wakwoj catz'iak che u c'utic chi quebisonic.”

⁴ E are wa' ri e u che'al aseitun xukuje' ri quieb tzuc'ulibal ri e c'o chuwäch ri Rajaw ri uwächulew.

⁵ We c'o jachin jun cäraj cuban c'ax chque, quel ulok k'ak' pa qui chi', quebutij ri quec'ulelanic. We c'o c'u jachin jun cäraj cuban c'ax chque, jewa' ri u cämical curik na.

⁶ C'o qui cuinem che u tz'apixic ri caj, rech man cäpe ta chi jäb pa tak ri k'ij aretak cäquitzijoj ri u tzij ri Dios. Xukuje' c'o qui cuinem che qui q'uexic ri ja' pa quic', xukuje' che u banic c'ax che ri uwächulew ruc' ronojel u wäch c'axc'olil joropa' mul ri cäcaj.

⁷ Aretak qui tz'akatisam chic ri qui k'alajisanic, ri xibibal awaj ri cäpaki' ulok pa ri jul re ri k'ekumalaj c'olbal cäch'ojin na cuc', quebuch'äc na, quebucämisaj c'u na.

⁸ Ri qui cuerp queya' na can pa ri nim be pa ri nimalaj tinimit, jawije' xrip wi ri Cajaw cho ri ripibal. Pa c'ambal no'j, cäbix Sodom xukuje' ri Ejipt che u bi' ri tinimit ri'.

⁹ Winak tak que conojel tinimit, amak' tak, ch'abal tak, nimak tak tinimit, caquil na ri qui cuerp oxib k'ij ruc' niq'uiaj, man c'u cajwax taj chi quemuk ri qui cuerp.

¹⁰ Ri e jekel cho ri uwächulew quequicot na che ri qui cämical. Cäquiban na nimak'ij, cäquitakala' na sipanic chquixo'l. Rumal rech chi we e quieb k'axal tzij ri' qui banom c'ax chque ri e jekel cho ri uwächulew.

¹¹ E oc'owinak chic oxib k'ij ruc' niq'uiaj, ri Dios xebuc'astajisaj. Xetaq'ui c'ut. Xquixe'j quib conojel ri xeilowic.

¹² Ri quieb k'alajisanelab xquita' jun nimalaj ch'abal chicaj ri xubij chque: “Chixpakal ulok waral.” Xepaki' c'u chicaj pa jun sutz', xeilitaj cumal ri quec'ulelanic.

¹³ Pa ri jok'otaj ri' xuban jun nimalaj cabrakan. Xwulij jun u lajujil ri tinimit, xecämisax wukub mil (7000) winak rumal ri cabrakan. Ri jule' chic xquixe'j quib, xquiya' juluwem che ri Dios aj chicaj.

¹⁴ Ri ucab c'axc'olil xoc'owic. Chiwilampe', ri urox c'axc'olil chanim cäpetic.

Ri uwuk trompet

¹⁵ Ri uwuk tako'n aj caj xrok'esaj ri u trompet. Xepe nimak tak ch'abal chicaj, ri xquibij: “Ri e ajawibal re ri uwächulew e rech chic ri Kajaw xukuje' e rech chic ri u Crist. Cajawin c'u na puwi' ronojel amak'el chbe k'ij sak.”

¹⁶ Ri juwinak quiejeb (24) nimak tak tatayib ri e t'uyut'oj pa ri qui tem re ajawibal chuwäch ri Dios, xexuquic, xquikasaj ri qui palaj, xquik'ijilaj c'ut ri Dios.

¹⁷ Xquibij: “Cäkamaltioxij che la, Ajawaxel, Dios ri c'o ronojel cuinem uc' la, ri c'o la, ri c'o la ulok ojer, xukuje' cäpe na la, rumal rech chi c'amom la ri nimalaj chuk'ab la lal c'u ajawininak.

¹⁸ E ch'ujarinak c'u ri nimak tak tinimit, petinak c'u ri oyowal la, xukuje' ri k'ij aretak cäk'at la tzij paquiwi' ri cäminakib, xukuje' aretak cäya' la ri tojbal que ri pataninelab ech la ri e k'axal tzij, que ri tastalic tak winak, xukuje' que ri nim cäquil wi ri bi' la, chi ch'utik chi nimak. Xopan ri k'ij aretak cäsach la qui wäch ri quesachow u wäch ri uwächulew.”

¹⁹ Xjaktaj c'ut ri rachoch Dios pa ri caj. Xilitaj c'ut ri caxa re ri u c'ulwächinic chupam ri rachoch Dios. Xec'ulmataj caypa', jininem, cakultakja, cabrakan xukuje' nimalaj sakbach.