Apocalipsis 10 - Quiché Bible

Ri tako'n aj caj ri c'o ri alaj wuj ruc'

¹ Xinwil chi jun cowilaj tako'n aj caj xkaj ulok cho ri caj. Pistal rumal jun sutz', ri c'o jun räxquiak'ab chujolom. Ri u palaj are je jas ri k'ij, ri e rakan je jas bolobak rak' k'ak'.

² C'o jun alaj wuj jaktalic pa u k'ab. Xuya' ri rakan re u wiquiak'ab puwi' ri plo, are c'u ri u mox xuya' puwi' ri ulew.

³ Xurak u chi' ruc' nimalaj chuk'ab, jacha' aretak cawun ri coj. Aretak xurak u chi', wukub cakulja xquicoj ri qui ch'abal.

⁴ Aretak e ch'awinak chic ri wukub cakulja, raj xintz'ibanic. Xinta' c'u jun ch'abal chicaj ri xubij chwe: “Chebac'u' ri jastak ri qui tzijom ri wukub cakulja, mebatz'ibaj wa'.”

⁵ Ri tako'n aj caj ri xinwilo chi tac'al puwi' ri plo xukuje' puwi' ri ulew, xuwalijisaj ri u k'ab re u wiquiak'ab chicaj.

⁶ Quincha' ri chi'nic ri kas cäban na chuwäch ri c'asal amak'el chbe k'ij sak, ri e u banom ri caj ri ulew xukuje' ri jastak ri e c'o chquiwäch, ri plo xukuje' conojel ri jastak ri e c'o chupam. Xubij: “Man c'o ta chi cäkeyej na.

⁷ Xane' pa tak ri k'ij aretak cäch'aw ri uwuk tako'n aj caj, aretak xa co'l man cärok'esaj ri u trompet, cätz'akatisax na u banic ri u chomanic ri Dios ri man etamatal ta can nabe, jas ri xutzijoj chque ri pataninelab, ri e k'axal tak u tzij.”

⁸ Ri ch'abal ri xinta' chicaj, xch'aw chi jumul wuc', xubij: “Jät, chac'ama' ri wuj ri jakal pa u k'ab ri tako'n aj caj ri tac'al puwi' ri plo xukuje' puwi' ri ulew.”

⁹ Xinbe c'u ruc' ri tako'n aj caj, xinbij che chi chuya' ri alaj wuj chwe. Ri are' xubij chwe: “Chac'ama', chatija'. Cuc'ayirisaj na ri a pam. Qui' c'u cuban na pa ri a chi' je jas ri juyubal räx cab.”

¹⁰ Xinc'am ri alaj wuj pa u k'ab ri tako'n aj caj, xinbik' bic. Qui' xuban pa nu chi' je jas ri juyubal räx cab. Aretak c'u nu tijom chic, xuc'ayirisaj ri nu pam.

¹¹ Xbix c'u chwe: “Rajawaxic chi catzijoj chi jumul ri u tzij ri Dios chque e q'ui winak, xukuje' chque e q'ui nimak tak tinimit, xukuje' chque e q'ui ch'abal, xukuje' chque e q'ui ajawinelab.”