Aj Levitib 7 - Quiché Bible

Pixab che qui ya'ic ri tabal tok'ob re ri macunic

¹ “Ri tabal tak tok'ob ri queya'ic u mac rech ri chak'maquil, e jun jasach wa' ri sibalaj e tastalic. E are tak pixab wa' chque:

² Ri awaj ri chi'm u mac ri macunic rajawaxic cätok' u kul pa ri c'olbal jawije' ri quepil wi ri awaj ri quechi'xic rech queporoxic are c'u ri u quiq'uel rajawaxic cachicox puwi' xukuje' chrij ri porobal.

³ Cächi'x ronojel ri u xepoyil ri awaj: ri c'o che ri u je' xukuje' ri xepo ri c'o chquij tak ri ti'j chupam,

⁴ ri quieb u quinak', ri xepo ri c'o chquij, xukuje' ri c'o chquij ri uwo rachak; ri xepo ri c'o chrij ri seseb ri junam quesax cuc' ri quieb u quinak'.

⁵ Ronojel wa' cuporoj ri cojol tabal tok'ob puwi' ri porobal, jacha' sipanic che u ya'ic u k'ij ri Ajawaxel. Jun tabal tok'ob wa' u mac ri chak'maquil.

⁶ Conojel ri e cojol tabal tok'ob cuya' cäquitij que, cäquitij c'u na pa jun c'olbal ri tastalic, jun jasach wa' ri sibalaj tastalic.

⁷ Ri tabal tok'ob ri u mac rech ri chak'maquil xak junam ruc' ri tabal tok'ob ri u mac rech ri macunic, e are tak c'ut ri pixab xak e junam chque qui cabichal: ri chi'm cux na rech ri cojol tabal tok'ob ri cäpatanij che u rikic ri sachbal macaj.

⁸ Junam xukuje', ri cojol tabal tok'ob ri capilow ri awaj ri cächajirisaxic re jachin jun, ri u tz'umal ri awaj cäcanaj can che ri are'.

⁹ Xukuje' ronojel sipanic ri cächak'ajisax chupam ri jorno, xukuje' ronojel ri cachak'ajisax pa t'uy o pa xarten, cäcanaj che ri cojol tabal tok'ob ri cäjachow ri sipanic.

¹⁰ Je c'ut ronojel sipanic rech c'äj ri yok'om aseit ruc' o chaki'j, cäcanaj chque ri e u c'ojol ri Aaron, junam cäban che u jachic chquiwäch.”

Pixab che qui ya'ic ri tabal tok'ob re utzirisan ib

¹¹ “Are tak wa' ri pixab che qui ya'ic ri tabal tak tok'ob re utzirisan ib chuwäch ri Ajawaxel:

¹² We ri tabal tok'ob rech u ya'ic maltioxinic, caxlanwa cächi'x na man cäya' ta ch'am ruc' yok'om aseit ruc', watz'otz'arisam man cäya' ta ch'am ruc' ri chicom aseit puwi', xukuje' caxlanwa re utzalaj c'äj ri yok'om aseit ruc';

¹³ junam c'ut ruc' ri tabal tok'ob re maltioxinic xukuje' re utzirisan ib, queya' caxlanwa ri man cäya' ch'am cuc'.

¹⁴ Cätas c'u na jun u tz'akatil che jujun u wäch sipanic ri tasom che ri Ajawaxel cäyataj c'u che ri cojol tabal tok'ob ri cajamin ri u quiq'uel ri tabal tok'ob re utzirisan ib.

¹⁵ Ri u ti'jal ri awaj ri cächi'x che u ya'ic maltioxinic xukuje' re utzirisan ib, rajawaxic cätij pa ri k'ij aretak cajach ri awaj, man c'o ta jun ch'akap cätas can che re ri ucab k'ij.

¹⁶ We c'u ne cächi'x ri awaj che u tz'akatisaxic jun chi'nic, o jun sipanic ri caq'uiy pa anima'aj, rajawaxic u tijic kas pa ri k'ij aretak cäpil ri cächi'xic, ri cäto'taj canok cuya' cätij chucab k'ij;

¹⁷ we c'u cäcanaj can niq'uiaj che, ri u ti'jal ri awaj pa ri urox k'ij, rajawaxic cäporox ronojel.

¹⁸ We c'o jun cätijow ri u ti'jal ri awaj re utzirisan ib che ri urox k'ij, man cäc'amar ta we tabal tok'ob ri' rumal ri Ajawaxel; man c'o ta cupatanij che ri xyo'wic ri cätijowic we ti'j ri' cäbe ri mac chrij.

¹⁹ Ri ti'j ri cuchap apachique jasach ri tz'il, man cätij taj, xa cäporox pa k'ak'. Conojel ri e ch'ajch'oj cuya' cäquitij que ri ti'j.

²⁰ Ri winak ri tz'ilobinak ri cutij ri ti'j re ri tabal tok'ob re utzirisan ib, ri jachom che ri Ajawaxel, we winak ri' quesax na chquixo'l ri u winakil.

²¹ Ri winak ri cuchap apachique jasach ri tz'il we u tz'ilol winak, o u tz'ilol awaj o apachique tz'il ri cuya' muluwibal c'u'x, cutij c'u re ri ti'j re ri tabal tok'ob re ri utzirisan ib ri jachom che ri Ajawaxel, we winak ri' quesax na chquixo'l ri u winakil.”

Pixab che ri cäban che ri xepo xukuje' ri quic'

²² Ri Ajawaxel xutzijobej ri Moises, xubij che:

²³ “Chabij chque ri aj israelib ri quinbij chawe: c'o xepo re ama' wacax mitijo, mawi re ama' chij, o re ati't q'uisic'.

²⁴ Ri u xepoyil ri cäminak awaj o ri cach'akatix cumal juyubal tak awaj, quiwilo jawije' quicoj wi, mitijo.

²⁵ Apachin c'ut ri cätijow ri u xepoyil ri awaj ri cäporox che sipanic chuwäch ri Ajawaxel, ri cätijowic quesax na chquixo'l ri u winakil.

²⁶ Apawije' ta ne ri ix jekel wi, c'o jubik' qui quiq'uel ri chicop ri c'o u xic' mitijo, mawi qui quiq'uel tak awaj.

²⁷ Ri winak ri cutij u quiq'uel apachique awaj, quesax na chquixo'l ri u winakil.”

Ri ti'j ri caya' che ri cojol tabal tok'ob

²⁸ Ri Ajawaxel xutzijobej ri Moises, xubij che:

²⁹ “Chabij chque ri aj israelib: chi jachin ri cuya' tabal tok'ob re utzirisan ib, rajawaxic cuc'am bic chuwäch ri Ajawaxel.

³⁰ Cuc' ri kas e u k'ab cuc'am ulok chuwäch ri Ajawaxel ri sipanic ri cäporoxic: ri xepo ri c'o che ri uwo c'uxaj; ri kas uwo c'uxaj che u banic chuwäch ri Ajawaxel jas ri nak'atal u banic che u jachic.

³¹ Ri xepo cäporox rumal ri cojol tabal tok'ob puwi' ri porobal, are c'u ri uwo c'uxaj cäcanaj che ri Aaron xukuje' chque ri e rija'lil.

³² Ri ca' ri awaj ri re ri quiquiak'ab ri queya' che tabal tok'ob re utzirisan ib queya' che ri cojol tabal tok'ob jacha' che cuchuj.

³³ Ri ra' ri awaj re ri riquiak'ab, rech ri cojol tabal tok'ob ri cächi'n ri u xepoyil xukuje' ri u quiq'uel ri awaj re ri tabal tok'ob re utzirisan ib,

³⁴ chque c'ut ri qui tabal tok'ob re utzirisan ib ri aj israelib, ri caquiban chwe nu c'amom ri uwo c'uxaj jacha' sipanic ri nim u k'ij xukuje' ri ra' ri awaj ri tasom, e nu yo'm c'u che ri cojol tabal tok'ob ri Aaron, xukuje' chque ri e rija'lil are wa' ri cäya' chque amak'el ri quesax chque ri qui sipanic ri aj israelib.

³⁵ Are wa' ri cärechbej ri Aaron xukuje' ri cäquechbej ri e rija'lil, ri quesax chque tak ri sipanic ri queporox chuwäch ri Ajawaxel, cachapletaj bic pa ri k'ij aretak quetas che cojol tabal tok'ob chuwäch ri Ajawaxel,

³⁶ ri Ajawaxel xtakanic chi ri aj israelib caquiya' chque, kas pa ri k'ij aretak xebutaso, pixab wa' ri caquitz'akatisaj ri ri tataxelab xukuje' ri e qui c'ojol.

³⁷ Are pixab wa' che qui ya'ic ri tabal tok'ob ri quechajirisaxic, ri sipanic tak re c'äj, ri tabal tak tok'ob u mac rech ri mac, ri tabal tak tok'ob u mac rech ri chak'maquil, ri sipanic tak re tastajic ri tabal tak tok'ob re utzirisan ib;

³⁸ are wa' ri takanic ri xuya' ri Ajawaxel che ri Moises puwi' ri juyub Sinai, aretak xubij chque ri aj israelib pa ri chaki'j uwo sak aj Sinai chi cäquiya' sipanic che.”