Aj Levitib 25 - Quiché Bible

Ri junab re uxlanem xukuje' junab re tzokopijem

¹ Ri Ajawaxel xutzijobej ri Moises puwi' ri juyub Sinai, xubij c'u che:

² “Chabij chque ri aj israelib, ri quinbij chawe: Aretak ix oquinak chic pa ri ulew ri quinya' na chiwe, ri ulew cuxlan na chuwäch ri Ajawaxel.

³ Wakib junab catic u wäch ri awulew, xukuje' wakib junab quebajosk'ij tak ri a uva, quebayac c'u ri qui wächinic.

⁴ Pa ri uwuk junab c'ut cuxlan na ri ulew, uxlanem wa' chuwäch ri Ajawaxel; matic u wäch ri awulew mawi quebajosk'ij tak ri a uva.

⁵ Ri u tuquiel cäq'uiy ulok cho ri awulew ri a yacom chi u wäch, mawi mebamol tak ri uva che ri u c'amal ri man josk'im taj; junab wa' re uxlanem che ri awulew.

⁶ Are c'u ri ruxlanem ri ulew cuya' na ri tzukbal awe, ri tzukbal re ri pataninel awe chi achi chi ixok, ri awajchac xukuje' ri man awinakil taj ri jekel awuc';

⁷ ri e awawaj, xukuje' ri e juyubal tak awaj ri e c'o pa ri awulew, ronojel ri u wäch ri ulew ya'tal chque cäquitijo.

⁸ Rajawaxic quiwajilaj wukub wukutak k'ij junab, ri u bixic wa' wukub mul wukutak junab, ri ajilabal ri quel chi nimalaj ronojel, cawinak belejeb (49) junab.

⁹ Caban c'u na chi cok' ri trompet pa ri lajuj rajilabal ri uwuk ic', pa ri k'ij re sachbal macaj quiwok'isaj ri trompet pa ronojel ri iwulew.

¹⁰ Ri junab cawinak lajuj (50) quik'alajisaj na ix chi junab tastalic: are jun junab re toronem, chque conojel ri e jekel chupam ri ulew. Ronojel winak cätzelej na cuc' ri rachalaxic xukuje' chupam ri rulew ri rechbem can nabe.

¹¹ Ri junab cawinak lajuj (50) cux na chiwe junab re tzokopitajem, chupam we junab ri' man cuya' taj quixticonijic, mawi quik'at ta ri trico ri xak caq'uiy ulok pa rech wi, mawi quebijosk'ij tak ri juwi' tak i uva mawi quebimol tak ri e qui uva.

¹² Rumal rech chi are jun tastalic junab re tzokopitajem chiwe ix. Quitij na xuwi ri cuq'uiyisaj ri ulew pa rech wi.

¹³ Pa we junab ri', quixtzelej chijujunal pa tak ri iwechbal.

¹⁴ Aretak c'o jas quic'ayij che ri iwajil i tz'akat, o c'o jas quilok' che ri iwajil i tz'akat, c'o jun musub ri rachalal.

¹⁵ Joropa' junab craj na ri tzokopitajem, are junab wa' catlok'om che ri awajil a tz'akat, joropa' junab ri u wächinic ri ulew are wa' cuc'ayij wi chawe.

¹⁶ Joropa' ri u q'uial ri junab, je u q'uial ri rajil catoj na, we man q'ui ri junab cak'ip na ri rajil; joropa' c'u junab ri u wächinic ri ulew are wa' cuc'ayij wi chawe.

¹⁷ C'o c'u jun musub ri rajil u tz'akat, xane' china' iwib chuwäch ri Dios; in c'u ri' ri Ajawaxel ri i Dios.

¹⁸ Chixoc ba che qui banic ri e nu pixab xukuje' chebinimaj ri nu takomal, chebibana' ri cäquibij, we je quiban wa' man c'o ta c'u jachin quixslaben cho ri ulew;

¹⁹ ri ulew cuya' na ri u wächinic, quixwa' c'ut c'ä quixnoj na, man c'o ta jachin quixesan chuwäch.

²⁰ We c'u ne quibij: ¿Jas cäkatij pa ri uwuk junab, we man cujticonijic mawi cäkamol qui wäch ri kulew?

²¹ Ri in quintak na ulok ri nu tewichibal piwi' pa ri uwak junab, cuya' na ri u wächinic ri ulew re oxib junab;

²² quixticonij na c'ä pa ri uwajxak junab, are quitij na ri chaki'j tak wächinic; c'ä chubelej junab, c'ä cäpe na ri c'ac' tak wächinic quitanaba' qui tijic ri chaki'j tak wächinic.

²³ Ri ulew man cuya' taj chi kas ta cac'ayixic, rumal rech chi wech in ri ulew; ri ix c'ut, xa ix kajanelab, ix okxanel tak iwib ix c'o pa ri wulew.

²⁴ Rumal ri' apachique ulew ri i banom iwech che, rajawaxic quiya' k'ijol chque ri e nabe tak ajchak'e chi cuya' caquitoro.

²⁵ We cämebayir ri awachalal, cuc'ayij ta c'u jubik' ri rechbal, ri ratz o ri u chak' cuya' cutor ri u c'ayim.

²⁶ We c'u ne c'o jachin jun ri man c'o ta jun rija'lil ri cacuin ta che u toric ri rechbal, we c'u cacuin ri kas are' che u mulixic ri rajawaxic che u toric,

²⁷ crajilaj joropa' junab u c'ayim chi ri rulew, cutoj c'u ri u c'as ri c'ä c'o na pa u k'ab ri achi, carechbej chi c'u na jumul ri rulew.

²⁸ We c'u man cäcuin che u molic ri puak rech catzelex che, ri u c'ayim cäcanaj na pa u k'ab ri lok'owinak c'ä copan na ri junab rech ri tzokopitajem, chupam c'ut we junab ri' catorotaj na ri echbal, are' c'u ri xc'ayinic cärechbej chi na jumul.

²⁹ Apachin ri cuc'ayij rachoch ri c'o pa jun tinimit ri c'o tapia chrij, cäya' jun junab che u toric cajilax ri k'ij aretak xuc'ayij; jun junab caya' che rech cutoro.

³⁰ We man cätor pa ri jun junab, ri ja ri c'o pa ri tinimit ri c'o tapia chrij, xa jumul cäcanaj can pa u k'ab ri xlok'owic, xukuje' chque ri rija'lil. Man cätorotaj ta pa ri junab re tzokopitajem.

³¹ E are c'u ri ja ri e c'o pa tak ri alaj tak tinimit ri man c'o ta tapia chquij, je cäban chque jacha' ri ulew pa tak ri juyub; cuya' quetoric, catzokopitaj na pa ri junab re tzokopitajem.

³² Ri aj levitib yo'm pa qui k'ab amak'el chi cuya' quequilok' chi jumul tak ri ja ri e c'o chupam tak ri qui tinimit.

³³ We ri calok'ow chi jumul are' jun aj levi, rajawaxic cujam ri ja pa ri junab re ri tzokopitajem cäbe c'ut chupam ri tinimit jawije' c'o wi ri rechbal, ri quechbal c'ut ri aj levitib ri c'o chquixo'l ri aj israelib are ri ja ri c'o chupam ri qui tinimit.

³⁴ Are c'u ri rulewal ri qui tinimit tak ri aj levitib, mawi jubik' cuya' quec'ayixic, quechbal c'u wa' re chbe k'ij sak.

³⁵ We ri awachalal cämebayiric, cuto' c'u rib awuc', chaya' rokxanibal; jacha' ri caban che jun ri man awinakil taj ri xa cärokxanila' rib, cäjeki' na awuc'.

³⁶ Matok'ij ral puak che mawi maban ch'äcoj chrij, xane' chac'utu' chi cana' awib chuwäch ri Dios, cäjeki' c'u ri awachalal pa ri awachoch.

³⁷ Matok'ij ral ri a rajil ri caya' che pa kajomal, mapakba' rajil ri wa ja' ri caya' che pa tijic.

³⁸ In ri' ri Ajawaxel ri i Dios, ri xixinwesaj ulok pa Ejipt, che u ya'ic ri ulew re Canaan chiwe xukuje' rech c'u quinux i Dios.

³⁹ We cämebayir ri awachalal ri c'o awuc', cuc'ayij ta c'u rib chawe, maban che chi cäpatanijic jacha' jun lok'om pataninel.

⁴⁰ Chabana' che jacha' jun ajchac, o jacha' ri xa rokxanim rib awuc'; c'ä pa ri junab re ri tzokopitajem catupatanij na.

⁴¹ Cätzokopitaj c'u bic, quel bic pa ri awachoch e rachil ri ralc'ual, cätzelej cuc' ri rachalaxic, cätzelej pa ri culew ri u tat u nan, curik chi c'u na utzil.

⁴² E pataninel c'u tak wech xebenwesaj ulok pa Ejipt; man cuya' taj quec'ayixic e jacha' ta ne lok'om pataninelab.

⁴³ Mattakan puwi' ruc' c'anal, xane' chana' awib chuwäch ri Dios.

⁴⁴ We cawaj quec'oji' a lok'om pataninelab, achijab o ixokib, chebalok'o chque ri jule' nimak tak tinimit chic ri e a c'ulja.

⁴⁵ Xukuje' cuya' quebalok' ri e calc'ual ri man e a winakil taj ri xak e c'o chixo'l, xukuje' ri calc'ual ri quecalaj ri e c'o chupam ri iwulew; e are wa' cuya' quebilok'o rech quiban c'u iwech chque.

⁴⁶ Cuya' quebiya' can che quechbal ri e i c'ojol aretak quixcämic; jacha' jun echbal re chbe k'ij sak; are c'u tak ri e iwachalal aj israelib, mixtakan paquiwi' ruc' c'anal.

⁴⁷ We ri man awinakil taj ri jekel chupam ri awulew cux k'inom, are c'u ri awachalal ri c'o che u c'ulja cämebayiric, cuc'ayij ta c'u rib che ri man awinakil taj o che jun ta chic man awinakil taj;

⁴⁸ ya'tal che chi cälok' ri u tzokopitajic pune' u c'ayim chi rib. Cuya' cälok' rumal jun chque ri rachalal.

⁴⁹ Xukuje' cuya' cätor rumal jun rican o ri u c'ojol ri rican, o rumal jun apachique rachalaxic, ri kas c'o cux che, o we cacuinic cuya' cutor rib u tuquiel.

⁵⁰ Crajilaj ruc' ri xlok'owic joropa' junab u c'ayim chi rib pa u k'ab, majok churika' ri junab rech ri tzokopitajem; cäjilax c'u na ri puak ri u c'ayibem rib, junam c'u cätojic jacha' ri cuch'äc jun ajchac.

⁵¹ We c'u q'ui junab craj na, jewa' ri puak ri cutzelej na che ri torbal rib.

⁵² We c'u xa quieb oxib junab chic cäraj ri junab re tzokopitajem, carajilaj ruc' ri xlok'owic, cuya' c'u na ri puak jacha' ri junab ri craj na che ri u torotajic.

⁵³ Je cäban che jacha' ri cäban che jun ajchac ri cätoj chi junab; xak mawilo chi cäban c'ax che chawäch.

⁵⁴ We man cutor rib pa apachique junab, aretak copan ri junab re ri tzokopitajem, cätzokopitaj na pa ri k'ij rech ri torotajem, e rachil ri ralc'ual.

⁵⁵ E pataninel tak wech c'ut ri aj israelib, e pataninel tak wech ri xebenwesaj ulok pa Ejipt. In ri' ri Ajawaxel ri qui Dios.”