Aj Levitib 23 - Quiché Bible

Ri nimak'ij tak re k'ijilanic

¹ Ri Ajawaxel xutzijobej ri Moises, xubij che:

² “Chabij chque ri aj israelib, ri quinbij chawe: E are tak k'ijol wa' ri nimak qui k'ij ri quebiya' che ri Ajawaxel, ri quebicoj na tastalicalaj tak mulin ib che qui bi'.

³ Wakib k'ij catchacun, are c'u ri uwuk k'ij; man ya'tal taj jun chac, are jun k'ij ri nim u banic re uxlanem c'o c'u na jun mulin ib. We k'ij ri cux na k'ij re uxlanem che u ya'ic u k'ij ri Ajawaxel.

⁴ E are' tak rajilabal k'ij wa' ri nimak qui k'ij che coc'owisaxic ri tastalicalaj tak mulin ib che u ya'ic u k'ij ri Ajawaxel, e are c'u tak k'ij wa' ri rajawaxic qui mulij iwib:

⁵ Pa ri nabe ic', pa ri ucajlajuj rajilabal ri ic', aretak cakaj ri k'ij, coc'owisax ri oc'owem che u ya'ic u k'ij ri Ajawaxel.

⁶ Pa ri olajuj rajilabal we ic' ri' coc'owisax ri nimak'ij re ri qui tijic ri caxlanwa ri man caya' ta ch'am cuc', wukub k'ij quitij ri caxlanwa ri man cäya' ta ch'am cuc'.

⁷ Pa ri nabe k'ij quiwoc'owisaj jun tastalicalaj mulin ib. Miban jun chac re patanijic.

⁸ Pa ri wukub k'ij rajawaxic quebiporoj sipanic che ri Ajawaxel, pa ri uwuk k'ij quiwoc'owisaj jun tastalicalaj mulin ib. Man c'o ta jun u wäch chac qui bano.”

Ri nimak'ij re ri nabe tak u wächinic ri ulew

⁹ Ri Ajawaxel xutzijobej ri Moises, xubij c'u che:

¹⁰ “Chabij chque ri aj israelib ri quinbij chawe: Aretak ix oquinak chic pa ri ulew ri quenya' chiwe, i k'atom chi c'ut ri trico, quic'am ulok chuwäch ri cojol tabal tok'ob ri nabe ya'taj re ri u wächinic ri iwulew.

¹¹ Chucab k'ij re ri k'ij re uxlanem, ri cojol tabal tok'ob cujach chuwäch ri Ajawaxel jacha' sipanic ri nim u banic, rech quec'amar chque.

¹² Kas pa ri k'ij aretak quichi'j ri ya'taj, quichi'j xukuje' jun alaj ama' chij ri man c'o ta u yab re jun u junab che tabal tok'ob ri cächajirisaxic che u ya'ic u k'ij ri Ajawaxel.

¹³ Quic'am na ulok xukuje' lajuj libra c'oc'alaj c'äj, yok'om aseit ruc', sipanic wa' ri cäc'oc'atic ri cäporox chuwäch ri Ajawaxel, cärachilaj jun litro u wa'l uva ri cäjamix puwi'.

¹⁴ C'ä pa ri k'ij aretak ri qui c'am na bic ri i sipanic che ri Ajawaxel, mitij ta na caxlanwa mawi q'uilim trico o iq'uel. Jun pixab wa' ri coc'ow cuc' ri tataxelab cäk'ax c'u cuc' ri c'ojolaxelab apawije' ta ne ri quixjeki' wi.

¹⁵ Cachaptaj bic pa ri k'ij aretak quic'am ulok ri joyataj trico che sipanic ri nim u banic, ri u bixic, cachaptaj bic chucab k'ij che ri k'ij re uxlanem, rajawaxic quiwajilaj wukub wukutak k'ij tz'akat.

¹⁶ Ruc' c'ut ri ucab k'ij chque ri wukub k'ij, k'ij rech ri uxlanem, quetz'akat ri cawinak lajuj k'ij. Chi c'ut quic'am ulok ri i sipanic chuwäch ri Ajawaxel re c'ac' trico.

¹⁷ Quic'am c'u na ulok cho tak iwachoch cacab caxlanwa re c'oc'alaj c'äj ri e chak'ajisam ri yo'm ch'am cuc' re belejeb libra c'äj chquijujunal, jacha' sipanic ri nim u banic quech ri nabe tak wächinic che ri Ajawaxel.

¹⁸ Aretak quichi'j ri caxlanwa xukuje' quichi'j wukub ama'ib alaj tak chij jujun qui junab ri man c'o ta qui yab, jun alaj ama' wacax, xukuje' quieb ama'ib tak chij ri quiya' che tabal tok'ob ri quechajirisax chuwäch ri Ajawaxel, rachil ri sipanic xukuje' tak ri cäjam puwi', c'oc'alaj sipanic wa' ri cänicowisaxic ri cäkaj chuwäch ri Ajawaxel.

¹⁹ Quichi'j c'u na xukuje' jun ama' q'uisic' che u josk'ixic ri macaj, xukuje' quieb alaj tak chij ama'ib jujun qui junab che tabal tok'ob re utzirisan ib.

²⁰ Ri cojol tabal tok'ob quebuchi'j ri awaj jacha' che sipanic ri nim u banic chuwäch ri Ajawaxel, cärachilaj ri caxlanwa que ri nabe tak wächinic xukuje' ri quieb alaj ama'ib tak chij. Quetas che u k'ijilaxic ri Ajawaxel, quecanaj c'u che ri cojol tabal tok'ob.

²¹ Quiban jun tastalicalaj mulin ib che roc'owisaxic we k'ij ri', man c'o ta jun chac re patanijic quibano. Jun pixab wa' ri caquitz'akatisaj ri tataxelab xukuje' ri c'ojolaxelab apawije' ta ne ri quixjeki' wi.

²² Aretak quiyac u wäch ri iwulew, nimol ri c'o pa ri q'uisbal u jutz'il, mipich'olij ri iwulew ri yactajinak chi u wäch; chiya' can che ri meba' xukuje' che ri man i winakil taj. In ri' ri Ajawaxel ri i Dios.”

Ri nimak'ij que ri trompet

²³ Ri Ajawaxel xutzijobej ri Moises, xubij c'u che:

²⁴ “Chebach'abej ri aj israelib, chabij c'u chque: Ri nabe k'ij re ri uwuk ic', nimalaj k'ij wa' chiwe re uxlanem, jun natabal wa' ri coc'owisax ruc' ri cok'ibal ri e trompet xukuje' ruc' jun tastalicalaj mulin ib.

²⁵ Mawi jun chac re patanijic quibano, quichi'j c'u sipanic ri cänicowisax chuwäch ri Ajawaxel.”

Ri k'ij re sachbal macaj

²⁶ “Ri Ajawaxel xutzijobej ri Moises, xubij c'u che:

²⁷ Kas pa ri lajuj rajilabal we uwuk ic' ri' are K'ij wa' re Sachbal Mac, quiban jun tastalicalaj mulin ib, quicoj c'ut we k'ij ri che ri man u tijic ta wa xukuje' quichi'j sipanic ri queporoxic che u ya'ic u k'ij ri Ajawaxel.

²⁸ Mawi jun chac quiban pa we k'ij ri', rumal rech chi are K'ij wa' ri Casach ri Macaj, ri quirik wi na ri sachbal i mac chuwäch ri Ajawaxel ri i Dios.

²⁹ Jachin c'ut ri man cucoj taj we k'ij che ri man u tijic ta wa, quesax na bic chquixo'l ri u winakil apachin ta ne.

³⁰ Are' c'ut ri cuban jun chac pa we k'ij ri', ri in quinsach na u wäch we winak ri' chquixo'l ri u winakil apachin ta ne.

³¹ Mawi jun chac quibano; pixab wa' ri caquitz'akatisaj ri tataxelab xukuje' ri c'ojolaxelab pa apachique c'olbal ri quixjeki' wi.

³² Cux na jun k'ij re uxlanem chiwe, ri quicoj na che man u tijic ta wa, quichaplej na pa ri benak k'ij re ri k'ij ubelej rajilabal ri ic', c'ä pa ri benak tak k'ij rech ri jun k'ij chic.”

Ri nimak'ij quech ri cäbal

³³ “Ri Ajawaxel xutzijobej ri Moises, xubij c'u che:

³⁴ Chabij chque ri aj israelib, chi pa ri olajuj rajilabal ri uwuk ic', cächapletaj roc'owisaxic ri nimak'ij chuwäch ri Ajawaxel quech ri cäbal, wukub k'ij cäbeytaj wa'.

³⁵ Pa ri nabe k'ij cäban jun tastalicalaj mulin ib, mawi jun chac re patanijic quibano.

³⁶ Wukub k'ij quichi'j sipanic ri cänicowisax chuwäch ri Ajawaxel, chuwajxak k'ij quiban jun tastalicalaj mulin ib, xukuje' quichi'j sipanic ri cänicowisax chuwäch ri Ajawaxel; nimak'ij wa', miban jun chac re patanijic.

³⁷ Are tak nimak'ij wa' ri quiwoc'owisaj chuwäch ri Ajawaxel, ri quiban tastalicalaj tak mulin ib che u chi'xic sipanic ri cänicowisax chuwäch ri Ajawaxel, tabal tok'ob ri cächajirisaxic, sipanic, quech tak c'äj, tabal tak tok'ob xukuje' tak sipanic re ri u wa'l uva, pa ri k'ij ri ya'tal qui cojic,

³⁸ quebiwoc'owisaj wa' quebichajij tak ri k'ij re uxlanem chuwäch ri Ajawaxel, quebiya' sipanic, quebiban chi'nic xukuje' tak ri i sipanic ri cäpe pa ri iwanima' ri i nak'atisam u ya'ic chuwäch ri Ajawaxel.

³⁹ Chuo'lajuj rajilabal ri uwuk ic', aretak i yacom chi ri u wäch ri iwulew, quiban wukub k'ij nimak'ij chuwäch ri Ajawaxel; ri nabe k'ij, k'ij re uxlanem wa', xukuje' ri uwajxak k'ij.

⁴⁰ Chupam ri nabe k'ij quebic'am na ri utzalaj tak qui wächinic ri e utzalaj tak che', e qui xak tak tut xukuje' e qui k'ab ta che' ri e c'o q'ui qui xak xukuje' tak sak lemob ri e c'o chquichi' tak ri nima', wukub k'ij c'ut quixquicot chuwäch ri Ajawaxel ri i Dios.

⁴¹ Chi junab quiban wukub k'ij nimak'ij chuwäch ri Ajawaxel; jun pixab wa' ri cäjekic ri caquiban ri tataxelab xukuje' ri c'ojolaxelab.

⁴² Wukub k'ij quixc'oji' na pa tak cäbal; conojel ri aj tinimit aj israelib quec'oji' na pa tak cäbal,

⁴³ rech conojel ri e awija'lil caquetamaj chi, aretak ri in xebenwesaj ulok ri aj israelib pa Ejipt, xinban chque chi xejeki' pa tak cäbal. In ri' ri Ajawaxel ri qui Dios.

⁴⁴ Jewa' xuban ri Moises che qui tzijobexic ri aj israelib chrij ri coc'owisaxic ri nimak tak nimak'ij chuwäch ri Ajawaxel.”