Aj Levitib 22 - Quiché Bible

Ri caquic'am que ri sipanic ri cäya' che ri Ajawaxel

¹ Ri Ajawaxel xutzijobej ri Moises, xubij che:

² “Chabij che ri Aaron xukuje' chque ri e rija'lil chi nim chequila' wi ri jastak ri e tastalic ri quequitas ri aj israelib chwe, rech man cäcawasij ta ri tastalicalaj nu bi'. In ri' ri Ajawaxel.

³ Chabij chque chi, camic xukuje' ri k'ij ri quepe na, apachin ta ne chque ri quija'lil we tz'il chuban ta ri quicojic ri tastalicalaj tak jastak ri quequitas ri aj israelib che ri Ajawaxel, quesax na bic chnuwäch. In ri' ri Ajawaxel.

⁴ Man c'o ta jun chque ri e rija'lil ri Aaron ri c'o ta ch'a'c che o puj ri cabelelic, cutij ta rech chque ri jastak ri e tastalic c'ä cäjosk'itaj na. Ri cuchap jun jasach tz'il u mac rech jun cäminak, o cuchap jun ri cabelel ri u pam ri achi wi,

⁵ o ri cutz'iloj rib rumal ri u nakic jun chicop ri cujururej rib, o jun achi ri tz'ilotajinak cuban c'u tz'il che ri canakowic,

⁶ we winak ri' cäcanaj tz'il c'ä coc na ri ak'ab, man cuya' taj cutij re chque ri jastak ri e tastalic we man nabe cuch'aj rib ruc' ja'.

⁷ Cäjosk'itaj c'ut aretak cäkaj ri k'ij; cuya' chic cutij rech chque ri jastak ri tastalic, are c'u tzukbal re wa'.

⁸ Mutij u ti'jal jun cäminak awaj mawi ri ch'akatim rumal jun juyubal awaj, rech man cutz'iloj ta rib rumal, In ri' ri Ajawaxel.

⁹ Chabij chque chi chquitz'akatisaj ri nu pixab ri tz'ibatalic rech man quekaj ta pa jun mac, rumal rech chi man queniman ta che, we je caquiban wa' man quecäm ta na. In ri' ri Ajawaxel ri e nu tasom che nu patanixic.

¹⁰ Man c'o ta jun ri ma ta rachalaxic ri cojol tabal tok'ob cuya' cutij ta re ri tastalic. Mawi ri xa rokxanim rib pa rachoch ri cojol tabal tok'ob, mawi ri rajchac cuya' cutij ta re chque ri jastak ri e tasom.

¹¹ We ri cojol tabal tok'ob culok' jun pataninel ruc' ri u rajil, ri u pataninel cuya' cutij re ri tastalic, xukuje' ri e alam pa rachoch ri cojol tabal tok'ob, cuya' cäquitij quech ri cutijo.

¹² We ri u mia'l ri cojol tabal tok'ob c'ulan ruc' jun apachique ala, man cuya' taj cutij re chque ri jastak ri e tastalic ri yo'm che sipanic chque ri e cojol tabal tok'ob.

¹³ We c'u cämalcanir can ri u mia'l ri cojol tabal tok'ob o cäjach canok, man c'o ta c'u ral cätzelej c'u cho rachoch ri u tat jacha' aretak ri man c'ulan taj, cuya' cutij re ri cutij ri u tat; man c'o ta c'u jun ri man rachalaxic taj ri cojol tabal tok'ob cutij ta rech che.

¹⁴ We c'o jun winak man xuch'ob taj xutij re chque ri jastak ri e tastajinak, cutzelej na u q'uexel che ri cojol tabal tok'ob ri xutijo, cuya' chi c'u na jun u ro'il;

¹⁵ ri e cojol tabal tok'ob mäquiya' be chque ri aj israelib chi cäcawasij ri jastak ri e tastajinak ri quechi'x che ri Ajawaxel;

¹⁶ maquikajbej c'ut ri etzelal re ri qui mac u mac rech ri qui tijic ri jastak ri e tastajinak. In ri' ri Ajawaxel, ri e nu tasom.”

Ri qui cholajil ri awaj ri quechi'xic

¹⁷ Ri Ajawaxel xutzijobej ri Moises, xubij c'u che:

¹⁸ “Chattzijon ruc' ri Aaron xukuje' cuc' ri e u c'ojol, xukuje' cuc' conojel ri aj israelib, chabij chque: We c'o jun aj israel, o jun ri man aj israel taj ri jekel chquixo'l, ri cuya' jun awaj chuwäch ri Ajawaxel che tabal tok'ob ri cächajirisaxic, we che u tojic jun chi'nic o jacha' sipanic ri xak pa ech wi.

¹⁹ Rech cäc'amar ri u sipanic, rajawaxic cuya' jun ama' awaj ri man c'o ta u yab, cuya' jun ama' wacax, jun ama' chij, o jun q'uisic'.

²⁰ Muchi'j jun awaj ri c'o u yab, man cäc'am ta c'u na.

²¹ Apachin ta ne ri cuya' jun tabal tok'ob re utzirisan ib, o che u tojic jun chi'nic o jacha' che jun sipanic ri xak pa ech wi, rajawaxic cuya' jun ama' wacax o ama' chij ri man c'o ta u yab rech cac'amar che.

²² Mebuya', awaj che tabal tok'ob chuwäch ri Ajawaxel, ri e moyab, o e socotajinak, o e k'ajinak, o e pixnac' quij, o e joxoc' quij, o e ch'a'c quij, mawi mebuya' rech caporox chuwäch ri Ajawaxel.

²³ Jacha' che sipanic ri xak pa ech wi cuya' cächi'j jun ama' wacax o jun ama' chij pune' cutucak cakan, we c'u che u tz'akatisaxic jun chi'nic man cäc'amar ta na.

²⁴ Mawi meya' awaj chuwäch ri Ajawaxel ri socotajinak ri qui cowil, ri quirikom c'ax, o e t'okopitajinak o e k'atk'obinak. Mebinak'atisaj qui banic we jastak ri' pa ri i tinimit.

²⁵ Mawi mebic'am we awaj tak ri' pa qui k'ab ri man e i winakil taj, che u chi'xic jacha' ta ne che k'obibal che ri i Dios, e awaj wa' ri c'o qui yab, man quec'amar ta wa' chque.”

Ri u cholajil ri qui pilic ri awaj ri queya' che tabal tok'ob

²⁶ Ri Ajawaxel xutzijobej ri Moises, xubij che:

²⁷ “Aretak calax jun ama' wacax, o jun ama' chij, o jun ama' q'uisic' rajawaxic cäcanaj wukub k'ij ruc' ri u nan; aretak cuchap ri uwajxak k'ij cuya' chic cäya' che sipanic re tabal tok'ob ri cäporox chuwäch ri Ajawaxel.

²⁸ Xa pa jun k'ij mapil ri ati't chij o ati't wacax ruc' ri ral.

²⁹ Aretak caya' tabal tok'ob re maltioxinic chuwäch ri Ajawaxel, utz u ya'ic cabano rech cäc'amaric.

³⁰ Xukuje' chatija' kas pa ri k'ij ri caya' ri sipanic, man c'o ta cätas can che re ri ucab k'ij. In ri' ri Ajawaxel.

³¹ Chebinimaj ri e nu takomal, chibana' jas ri cäquibij. In ri' ri Ajawaxel.

³² Miwawasij ri tastalicalaj nu bi', rech cäya' nu k'ij chquixo'l ri aj israelib. In ri' ri Ajawaxel ri ix tasowinak che nu patanixic.

³³ E wesam c'u ulok pa Ejipt, rech quinux qui Dios. In ri' ri Ajawaxel.”