Aj Levitib 21 - Quiché Bible

Ri rajawaxic chque ri e cojol tabal tok'ob

¹ Ri Ajawaxel xubij che ri Moises: “Chattzijon cuc' ri e cojol tabal tok'ob, ri e u c'ojol ri Aaron, chabij chque: chi mäquitz'iloj quib rumal jun cächalaxic ri cäcämic.

² Xuwi we are' jun achalaxic re nakaj, jacha' ri u nan, ri u tat, ri u c'ojol o ri u mia'l, ri rachalal

³ o rana'b ri c'o pa rachoch ri man c'ulan taj, cumal wa' cuya' cutz'iloj rib.

⁴ Man cuya' ta c'ut cutz'iloj rib mawi cutz'aj rib rumal jun rachalaxic ri c'ulanic.

⁵ Mäquiban tol che ri qui jolom, mawi cäquijos ri quismachi', mawi cäquisoc ri qui cuerp,

⁶ xane' kas chi quitasa' quib che u patanixic ri qui Dios, maquiban c'u che ri u bi' chi man nim ta cäquil wi, rumal rech chi e are' quejachow ri sipanic ri cäporox che ri Ajawaxel, xukuje' e are' quejachow ri wa chuwäch ri Dios, amak'el c'ut checanaj tastalic che patanijic.

⁷ Mec'uli' ruc' jun ixok ri nim ch'utin, mawi ruc' jun ixok ri c'olinak chi achi ruc' o jachom can rumal ri rachajil; rumal rech chi ri e cojol tabal tok'ob e tastal che u k'ijilaxic ri qui Dios.

⁸ Chebatasa' che ronojel wa', rumal rech chi e are' ri quechi'n ri wa che ri a Dios. E tastal c'u chawe, rumal rech chi ri in, ri Ajawaxel, in tastalic, man quinban ta etzelal, in c'ut ri quinbanowic chi quetastaj chwe.

⁹ We ri u mia'l jun cojol tabal tok'ob caretzelaj rib cux c'u re nim ch'utin, caresaj u q'uixbal ri u tat, rajawaxic c'aslic cäporox pa k'ak'.

¹⁰ Ri qui nimal ri e cojol tabal tok'ob yo'm takanic che chi cucoj ri tastalicalaj atz'iak ri xtastaj rumal ri aseit ri catasanic xcoj puwi' ri u jolom. Rumal c'u ri' muquiyiba' ri u wi' mawi mujis ri ratz'iak che u c'utic bis.

¹¹ Man ya'tal ta che coc pa jun ja ri lia'n wi jun cäminak; mawi rumal rech chi are' ta u tat, mawi rumal rech chi are ta u nan, cutz'iloj ta rib.

¹² Mel chupam ri cak'ijilax wi ri u Dios, mawi marawasij ri k'ijilabal, rumal rech chi puwi' cojom wi ri aseit re ri u tastajic rumal ri u Dios. In ri' ri Ajawaxel.

¹³ Che rixokil cuc'am na jun k'apoj ali.

¹⁴ Mawi jubik' mac'uli' ruc' jun ixok malca'n, o jachom, nakom o jun nim ch'utin, rajawaxic k'apoj ri rixokil cuc'amo xukuje' u k'ab rächalaxic,

¹⁵ rech muyuj ri u quiq'uel cuc' apachique winak pa ri u tinimit; in c'ut ri Ajawaxel nu tasom che nu patanixic.”

Ri cäk'atin ri u cojic ri tabal tok'ob

¹⁶ Ri Ajawaxel xutzijobej ri Moises, xubij che:

¹⁷ “Chabij che ri Aaron chi kas camic cächaptaj bic, man c'o ta jun chque ri e rija'lil ri c'o jas jun yabil che ri u cuerp cäya' ta che chi cuchi'j ri wa chuwäch ri a Dios.

¹⁸ Kastzij ri quinbij, man c'o ta jun achi ri c'o ta jun u yab ri ya'tal ta che cakeb ta che u banic: we moy, we ch'oco'j, o jech' u tza'm o u xiquin,

¹⁹ cäkeb ta chuwäch ri Dios, o k'ajinak u ch'ec o u k'ab,

²⁰ o wuk'uwic rij, o benebic, o c'o sak pa u bak'wäch, o c'o ta joxoc' chrij, o e c'o ta pok' chrij, o u rikom ta c'ax ri u cowil.

²¹ Man c'o ta jun rija'lil ri cojol tabal tok'ob Aaron ri c'o ta jun u yab ri chebucoj ta chuwäch ri Ajawaxel ri sipanic tak ri queporoxic; c'o ta jun u yab, rumal ri' man cuya' taj cucoj ta ri sipanic re wa re ri u Dios.

²² Cuya' cutij rech we wa ri' xukuje' ri jastak ri e tastalic xukuje' ri sibalaj e tastalic.

²³ Man cuya' ta c'ut cäk'ax ta chrij ri ch'ukubal, mawi cakeb ta ruc' ri porobal, rech man cärawasij ta ri k'ijilabal rumal ri u yab. In ri' ri Ajawaxel ri ix nu tasom che nu patanixic.”

²⁴ Ri Moises xubij wa' che ri Aaron, xukuje' chque ri e u c'ojol, xukuje' chque conojel ri aj israelib.