Aj Levitib 20 - Quiché Bible

C'äjisabal wächaj che ri man nimanic taj

¹ Ri Ajawaxel xutzijobej ri Moises, xubij che:

² “Chabij chque ri aj israelib ri quinbij chawe: Apachin ta ne ri aj israel, we ne jun chque ri man i winakil taj ri e jekel pa Israel, ri cujach jun chque ri u c'ojol che ri Moloc, rajawaxic cäcämisax na, ri aj tinimit e are' quecämisan na, ruc' abaj.

³ Quinkasaj ri woyowal puwi' ri achi ri', quinwesaj ri u bi' chquixo'l ri u winakil u tz'ilom ri quink'ijilax wi rawasim ri tastalicalaj nu bi'. Rumal ri u ya'ic ri u c'ojol che ri Moloc.

⁴ We ri winak re ri ulew man caquik'at ta tzij puwi' we achi ri' ri xuya' jun chque ri u c'ojol che ri Moloc, man c'u cuc'okoj taj che cämical,

⁵ quinkasaj ri woyowal puwi' ri achi ri', xukuje' paquiwi' ri e c'o pa ri rachoch, quinwesaj c'u ri u bi' chquixo'l ri u winakil, xukuje' je quinban chque ri xemacun junam ruc', xquik'ijilaj c'u ri Moloc.

⁶ We c'o c'u jachin jun que cuc' cacojon chque ri uxlabalib xukuje' tak ri ch'obonelab, cutz'iloj c'u rib rumal qui ternexic, quinkasaj na ri woyowal puwi' ri winak ri', xukuje' quinwesaj na ri u bi' chquixo'l ri u winakil.

⁷ Kas ba' chitasa' iwib chwe, chixux ba tastalic, rumal rech chi in ri' ri Ajawaxel ri i Dios.

⁸ Chebinimaj tak ri nu pixab, chibana' jas ri cäquibij. In ri' ri Ajawaxel ri quixintas chwe.

⁹ Apachin ta ne ri cuc'okoj ri u nan o ri u tat, kastzij cäcämisax na; u nan o u tat c'u ri' ri xuc'okoj, are ajchak'mac che ri u cämical.

¹⁰ We c'o jachin jun achi cäkaj pa mac ruc' ri rixokil ri rajil u tz'akat, ri achi xukuje' ri ixok qui cabichal quec'okox na che cämical.

¹¹ We c'o jachin cäwar ruc' ri rixokil ri u tat, xresaj u q'uixbal ri u tat. Rumal ri' cäcämisax na ri achi xukuje' ri ixok, e are ajchak'mac che ri qui cämical.

¹² We c'o jachin cäk'oyi ruc' ri rixokil ri u c'ojol, e quieb quecämisax na, nimalaj etzelal c'u ri' ri qui banom, e are ajchak'mac che ri qui cämical.

¹³ We c'o jun achi cäk'oyi ruc' jun achi jacha' ri cäk'oyi ruc' jun ixok, e quieb quecämisax na; q'uixbal c'u ri' ri qui banom e are ajchak'maquib che ri qui cämical.

¹⁴ We c'o jachin jun cuc'am jun ixok che rixokil xukuje' ri u nan we ixok ri', u banom jun il mac. Ri are' xukuje' ri ixokib e c'asc'oj queporox pa k'ak'. Jeri' ma ta cheban tak we il mac ri' chixo'l.

¹⁵ We c'o jun achi cäruc'aj rib ruc' jun awaj, cac'okox na che cämical. Xukuje' chcämisax ri awaj.

¹⁶ We c'o jun ixok cäruc'aj rib ruc' jun awaj, cäcämisax ri ixok xukuje' ri awaj; man c'o ta qui to'tajic, ya'talic chi quecämisaxic.

¹⁷ We c'o jachin jun cuc'am ri rana'b che rixokil, u mia'l ri u tat o ral ri u nan, cacuc'aj c'u quib, e quieb quecämisax na chquiwäch ri qui winakil; ri caruc'aj rib ruc' ri kas rana'b are jun banoj wa' ri sibalaj q'uixbal, ri cäbanowic cakaj ri u mac puwi'.

¹⁸ We c'o jun cak'oyi' ruc' jun ixok ri cätajin cäyabinic chi ic', caresaj c'u u q'uixbal, ri ixok xukuje' ri achi quesax ri qui bi' chquixo'l ri qui winakil.

¹⁹ Mawuc'aj awib ruc' ri rachalal ri a nan, mawi ri rana'b ri a tat; uc'anic wa' ruc' jun achalaxic re nakaj, e quieb cäbe ri qui mac paquiwi'.

²⁰ We c'o jun cak'oyi' ruc' ri rixokil ri rican cäresaj u q'uixbal ri rican; e quieb quekajebex na rumal ri qui mac, quicabichal quecäm na, man c'o ta calc'ual quequiya' canok.

²¹ We c'o jun ruc' chuk'ab cak'oyi' ruc' ri rixokil ri rachalal, caresaj u q'uixbal ri rachalal, nimalaj mac wa' ri qui banom, man cäch'ijtaj taj, quicabichal quecäm na, man c'o ta calc'ual quequiya' canok.

²² Chebibana' ri cäquibij ri nu pixab xukuje' tak ri nu takanic, chebitz'akatisaj conojel. We je quiban wa' man quixuq'uiak ta na ulok ri ulew ri quixinc'am wi na bic rech quixejekel chupam.

²³ Miban iwe ri cäquiban tak ri winak ri quebenwesaj na bic chiwäch; ri e are xequiban conojel we itzel tak jastak ri', rumal ri' man xinch'ij ta qui coch'ic.

²⁴ Quinchi'j chiwe: Chi ix quixechben na ri culew we winak ri'; quinjach na pa i k'ab rech cäcanaj che iwechbal, ulew wa' ri cabelel wi leche xukuje' juyubal räx cab jacha' ri ja'. In ri' ri Ajawaxel ri i Dios, ri in banowinak chiwe chi man ix junam ta cuc' ri niq'uiaj chic tinimit.

²⁵ Rumal ri' xukuje' ri ix, rajawaxic quiwetamaj qui wäch ri awaj ri ya'tal quitijic xukuje' ri man ya'tal ta qui tijic, xukuje' ri chicop ri e c'o qui xic' ri ya'tal qui tijic, xukuje' ri man ya'tal ta qui tijic; mitz'iloj ba' iwib cumal tak ri awaj, chicop ri e c'o qui xic' xukuje' tak ri caquijuruj quib ri e nu c'utum chi e awaj ri e tz'il.

²⁶ Ri ix rajawaxic quixux tastalic chwe, in c'ut ri Ajawaxel, in tastalic, man quinban ta etzelal, in c'ut nu banom chiwe chi man ix ta junam cuc' ri niq'uiaj chic tinimit rech quixux wech.

²⁷ Ri achi ri ixok ri c'o jun uxlabal ruc' ri cuban ch'obonic, cäcämisax na; abaj cacämisabex rech, are' ajchak'mac che ri u cämical.”