Aj Levitib 19 - Quiché Bible

Pixab che ri tastajic xukuje' ri suq'uilal

¹ Ri Ajawaxel xutzijobej ri Moises, xubij c'u che:

² “Chabij chque conojel ri aj israelib ri quinbij chawe: Chixux tastalic, ri in c'ut ri Ajawaxel ri i Dios, in tastalic, man quinban ta etzelal.

³ Chijujunal nim chebiwila' wi ri i tat xukuje' ri i nan. Nim chebiwila' wi tak ri e nu k'ij re uxlanem. In ri' ri Ajawaxel ri i Dios.

⁴ Mat cojon chque tak ri diosib, xukuje' mebiban i diosib re ch'ich' ri e suc'umam pa k'ak'. In ri' ri Ajawaxel ri i Dios.

⁵ Aretak quebiya' chuwäch ri Ajawaxel tabal tok'ob re utzirisan ib, je u banic wa' chibana' rech cuc'am ri Dios chiwe.

⁶ Ri awaj ri qui c'am ulok che tabal tok'ob rajawaxic chi kas pa ri k'ij catijic, xukuje' cuya' cätij chucab k'ij, are c'u ri cäto'taj can che ri urox k'ij rajawaxic caporoxic.

⁷ We cätij ri sipanic churox k'ij, cux na muluwibal c'uxaj, ri Dios man cuc'amowaj ta na;

⁸ ri cätijowic cäkaj ri etzelal puwi' quesax c'u na pa ri u tinimit u mac rech chi xrawasij ri tastal che ri Ajawaxel.

⁹ Aretak cayac u wäch ri awulew, mamol ri cätzak canok, mawi mebamol ri e u jolom tak trico ri e canajinak canok.

¹⁰ Mamololej qui wäch ri juwi' tak uva, mawi mebasic' ri tzaknak chuxe'; chebaya' can chque ri mebayib, xukuje' chque ri man awinakil taj. In ri' ri Ajawaxel, ri i Dios.

¹¹ Mixeläk'ic, miban banoj tak tzij, c'o jun musub ri rajil u tz'akat.

¹² Mebaban tak chi'nic ri xak e cawäch pa ri nu bi', cawawasij c'u ri u bi' ri a Dios. In ri' ri Ajawaxel.

¹³ Macoj ri tokinic che ri awajil a tz'akat, mawi c'o mawelk'aj che. Mäcanaj na jun ak'ab awuc' ri tojbal re ri awajchac.

¹⁴ Mac'okoj ri man catantaj. Maya' jun tzakibal pa u be ri moy, chac'utu' chi nim cawil wi ri Dios. In ri' ri Ajawaxel.

¹⁵ Maban ri man suq'uilal taj aretak caban ri a k'atan tzij: mawi mato' u wi' ri tukar, mac'ayij a wib pa u k'ab ri c'o u cuinem. Are kas chabana' ri suq'uilal aretak caban ri k'atan tzij.

¹⁶ Mawalijisaj tzijtal chquixo'l ri awinakil. Matuxic jun che u cämisaxic ri awajil a tz'akat. In ri' ri Ajawaxel.

¹⁷ Mac'u ri retzelaxic u wäch ri awachalal chupam ri awanima'. Chak'ila' ri awajil a tz'akat aretak rajawaxic u k'ilic. Mach'uk u wi' ri mac ri cubano.

¹⁸ Maya' rajil u q'uexel ri c'ax ri cuban ri awajil a tz'akat chawe, mawi c'ax mana' che. Lok' chawila' ri awajil a tz'akat jacha' ri at chbil awib. In ri' ri Ajawaxel.

¹⁹ Chatoc il che qui banic ri cubij ri nu pixab. Mabano chi quebetz'en ri awawaj cuc' tak awaj ri e jule' chic quija'lil. Matic jalan tak ija' chupam ri awulew ri cuyuj ta rib. Macoj jun awatz'iak ri jalan tak bätz' e cojom che u quemic.

²⁰ We c'o jun achi cäwar ruc' jun pataninel ali ri c'o chi jun achi ajchak'e ri maja' cälok'ic, mawi tzokopim cutoj na ri rajil, man c'u quecämisax taj rumal rech chi man tzokopim taj.

²¹ Ri achi cuchacaba' na chuwäch ri Ajawaxel jun ama' chij jacha' che tabal tok'ob che u josk'ixic ri chak'maquil, ri rajawaxic cuc'am na bic c'ä chuchi' ri Lic'om Rachoch Dios re rikoj ib.

²² Ruc' we ama' chij ri' ri jacha' che tabal tok'ob che u josk'ixic ri chak'maquil, ri cojol tabal tok'ob cutz'onoj tok'ob che ri Ajawaxel chi cusach u mac we achi ri', casachtaj c'u na ri u mac,

²³ aretak quixoc pa ri ulew, quebitic c'u ronojel qui wäch che' ri quewächinic; oxib junab man quebich'up ta na ri qui wäch mawi quebitij ri qui wäch.

²⁴ Chucaj junab conojel ri e qui wächinic tak ri e i tico'n quetas che ri Ajawaxel pa jun nimak'ijanic.

²⁵ Aretak cätz'akat job junab cuya' chic quitij ri qui wäch. Xa jeri' ri che' sibalaj quewächin na. In ri' ri Ajawaxel.

²⁶ Mitij jun ti'j ri c'o quic' che. Mitijoj iwib che ch'obonic. Miban subunic che u k'alajisaxic ri c'ä maja' cäc'ulmatajic.

²⁷ Michetij ri i wi', mawi michetij ri u tza'm ri iwismachi'.

²⁸ Misoc ri i cuerp rumal u bisoxic jun cäminak, mawi mebit'ik etal che ri i cuerp. In ri' ri Ajawaxel.

²⁹ Mawuc'aj awib ruc' ri a mia'l rumal c'u awech cutakej ri u chac jun nim ch'utin, mawetzelaj ri tinimit canojisaj c'u che etzelal.

³⁰ Nim chebiwila' wi tak ri nu k'ij re uxlanem xukuje' nim chiwila' wi ri quink'ijilax wi. In ri' ri Ajawaxel.

³¹ Mixbe cuc' ri ajk'ijab, mawi cuc' ri ch'obonelab mitz'onoj i no'j chque, quitz'iloj c'u iwib ri' cuc'. In ri' ri Ajawaxel.

³² Chatwalij che u to'ic ri sak u jolom, nim chebawila' wi ri nimak tak winak, amak'el chana' awib chuwäch ri a Dios. In ri' ri Ajawaxel.

³³ Maban c'ax che ri man i winakil taj ri jekel chixo'l pa ri iwulew.

³⁴ Je chibana' che ri man i winakil taj jacha' ri quiban che ri i winakil; chilok'ok'ej, xäk c'u junam iwuc', je c'u ne xiban ix xa xiwokxanij na iwib pa Ejipt. In ri' ri Ajawaxel ri i Dios.

³⁵ Miban ri man suc' taj aretak quik'at tzij, xukuje' aretak quijach ri ulew, aretak quipaj ri i c'ay, o aretak quicoj apachique etabal.

³⁶ Tz'akat tak pajbal, tz'akat tak pajanic, xukuje' tz'akat tak etabal quicojo. In ri' ri Ajawaxel ri i Dios, ri xixinwesaj ulok pa Ejipt.

³⁷ Chebinimaj ba' conojel tak ri nu pixab xukuje' conojel tak ri nu takanic, chibana' jas ri cäquibij. In ri' ri Ajawaxel.”