Aj Levitib 18 - Quiché Bible

Uc'am tak ib ri man ya'tal taj

¹ Ri Ajawaxel xutzijobej ri Moises, xubij c'u che:

² “Chabij chque ri aj israelib ri quinbij chawe: In ri' ri Ajawaxel ri i Dios.

³ Miban iwe jacha' ri qui nak'atisabal ri aj ejiptib, ri xixc'oji' wi na; mawi mebitakej ri nak'atisabal aj Canaan, ulew ri quixinc'am wi bic, mawi mebitakej, ri qui pixab.

⁴ Chinimaj qui banic ri nu takomal, chixoc il che qui banic ri nu pixab, chitakej qui banic. In ri' ri Ajawaxel ri i Dios.

⁵ Rumal ri' chi nimaj ri caquibij tak ri e nu takomal, xukuje' ri e nu pixab ri e tz'ibatalic. Ri winak ri quebutz'akatisaj, cäc'asi na. In ri' ri Ajawaxel.

⁶ C'o jun achi makeb ruc' jun ixok ri kas rachalaxic che ruc'axic rib ruc'. In ri' ri Ajawaxel.

⁷ Mawesaj u q'uixbal ri a tat, mawuc'aj awib ruc' ri a nan, are' c'u ne a nan, man caban taj.

⁸ Mawesaj u q'uixbal ri a tat, mawuc'aj ri rixokil.

⁹ Mawuc'aj ri awana'b. We re a tat o re a nan; we alam cho ja o naj alam wi, mawuc'aj awib ruc'.

¹⁰ Mawesaj a q'uixbal chbil awib mawuc'aj ri u wi' a mam, we u mia'l ri a c'ojol, ral ri a mia'l. Mawuc'aj awib ruc'.

¹¹ Mawuc'aj awib ruc' ri ali ri ral ri rixokil ri a tat. Alc'ualam c'u rumal ri a tat, awana'b c'ut. Mawuc'aj awib ruc'.

¹² Mawuc'aj awib ruc' ri rana'b ri a tat; xak c'u junam u quiq'uel ruc' ri a tat.

¹³ Mawuc'aj awib ruc' ri rachalal ri a nan; xak c'u junam u quiq'uel ruc' ri a nan.

¹⁴ Mawesaj u q'uixbal ri rachalal ri a tat; mawuc'aj ri rixokil; rixokil c'ut ri rachalal ri a tat.

¹⁵ Mawuc'aj awib ruc' ri awalib; rixokil c'ut ri a c'ojol; mawuc'aj awib ruc'.

¹⁶ Mawesaj u q'uixbal ri awachalal; mawuc'aj awib ruc' ri rixokil.

¹⁷ Mawuc'aj awib ruc' jun ixok xukuje' ri ral ali, mawi mawuc'aj awib ruc' ri u wi' a mam, we u mia'l ri a c'ojol o ral ri a mia'l. Jun c'aslemal wa' ri man utz taj, xak c'u junam qui quiq'uel.

¹⁸ Matc'uli' cuc' quieb ixokib ri cachalal quib, mawuc'aj aretak c'ä c'asal ri awixokil, rech man cäwinikar ta ch'o'j chquixo'l.

¹⁹ Mawuc'aj awib ruc' jun ixok aretak cätajin cäyabin chi ic'.

²⁰ Matk'oyi ruc' ri rixokil ri awajil a tz'akat, mawuc'aj awib ruc' rech matz'iloj c'u awib rumal.

²¹ Majach jun chque ri a c'ojol che sipanic che ri dios Moloc; matz'iloj ri u bi' ri a Dios. In ri' ri Ajawaxel.

²² Matk'oyi ruc' jun a wäch achi, jacha' ta ne chi catk'oyi ruc' jun ixok. Jun tzijol wa' ri sibalaj itzel.

²³ Mawuc'aj awib ruc' apachique awaj, rech matux tz'il rumal wa'. Mawi ri ixok maruc'aj rib ruc' jun awaj, jun itzel yok'bal wa'.

²⁴ Mitz'iloj ba iwib cuc' jun chque we jastak ri'. Cuc' c'u we jastak ri' quitz'ilom wi quib ri tinimit ri quebenwesaj bic chiwäch ix.

²⁵ Ri winak xquitz'iloj c'u ri culew; xinc'am c'u ulok ri c'äjisabal wächaj paquiwi'; u mac ri quetzelal, ri ulew xebuq'uiak bic ri e u winak tak pa re wi.

²⁶ Are c'u ri ix ri ix aj israelib, xukuje' ri man e i winakil taj ri e c'o chixo'l, chebinimaj ri nu pixab xukuje' ri nu takomal, miban jun chque we jastak ri' ri quequic'am ulok yok'obal.

²⁷ Conojel c'ut we etzelal ri' xequiban ri xec'oji' can chupam we ulew ri' c'ä majok chixopanok ix, rumal ri' ri ulew nojinak che tz'ilol.

²⁸ ¡Mixuq'uiak c'u bic ri ulew pa re wi, u mac rech chi qui tz'iloj, jacha' xebuq'uiak c'u bic ri winak ri xejeki' can nabe chupam chiwäch ix!

²⁹ Apachin ta c'u ne ri cuban jun chque we jastak ri' ri e ya'l yok'obal, quesax na chquixo'l ri u winakil.

³⁰ Chebinimaj ba' tak ri nu takanic, mixkaj chupam ri qui banic tak ri jastak ri e ya'l tak yok'obal ri xeban nabe chiwäch ix, mawi mebitz'iloj tak iwib ix cuc'. In ri' ri Ajawaxel ri i Dios.”