Aj Levitib 15 - Quiché Bible

Pixbenic tak paquiwi' jujun u tz'ilol ri achi

¹ Ri Ajawaxel xutzijobej ri Moises rachil ri Aaron, xubij c'u chque:

² “Chibij chque ri aj israelib ri quinbij chiwe: Aretak jun achi cabelel ri u pam ri achi wi, tz'il wa' we achi ri'.

³ Ri tz'ilol u mac rech ri u belelem ri u pam achi wi we ri achi wi tz'apitajinak rumal ri u pam. Kas tz'il wi amak'el.

⁴ Apachique c'olbal ri cäk'oyi' wi ri achi ri', ri cäcanaj wi can ri u tz'ilol cäcanaj tz'il. Xukuje' apachique jasach ri cut'uyulej cäcanaj tz'il.

⁵ Apachin ta ne ri cäc'oji' pa ri c'olbal ri xk'oyi' wi ri achi ri', rajawaxic quebuch'aj ri ratz'iak; xukuje' catinic, cäcanaj c'u tz'il c'ä coc na ri ak'ab.

⁶ Apachin ta ne ri cät'uyi puwi' ri jasach ri xut'uyulej ri achi ri', rajawaxic quebuch'aj ri ratz'iak, xukuje' catinic, cäcanaj c'u tz'il c'ä coc na ri ak'ab.

⁷ Apachin ta ne ri canakow ri achi ri c'o we yabil ri' che, rajawaxic quebuch'aj ri ratz'iak, xukuje' catinic, cäcanaj c'u tz'il c'ä coc na ri ak'ab.

⁸ We ri c'o we yabil ri' che cächuban chrij jun winak ri man tz'il taj, we winak ri' rajawaxic quebuch'aj ri ratz'iak, xukuje' catinic, cäcanaj c'u tz'il c'ä coc na ri ak'ab.

⁹ Apachique quiejebal ri cuquijebej ri achi ri c'o we yabil ri' che, cäcanaj tz'il.

¹⁰ Apachin ta ne ri cänakow ri xt'uyi wi ri c'o we yabil ri' che, cäcanaj tz'il c'ä coc na ri ak'ab; apachin ta ne ri cäc'amow bic, jun chque ri jastak ri', rajawaxic quebuch'aj ri ratz'iak, xukuje' catinic, cäcanaj c'u tz'il c'ä coc na ri ak'ab.

¹¹ Apachin ta ne ri cunak ri c'o we yabil ri' che, rajawaxic utzalaj u ch'ajic ri u k'ab cuban we winak ri' ri xnakic, quebuch'aj na ri ratz'iak xukuje' catin na, cäcanaj c'u tz'il c'ä coc na ri ak'ab.

¹² Ri bo'j ri cunak ri c'o we yabil ri' che, rajawaxic cäpaxixic, ri jastak ri e re che', rajawaxic quech'ajic.

¹³ We cäcunataj we achi ri' ri c'o we yabil ri' che, rajawaxic querajilaj wukub k'ij che ri u josk'itajic, rajawaxic quebuch'aj ri ratz'iak, xukuje' catin chupam jun sakalaj ja', cäcanaj c'u ch'ajch'oj.

¹⁴ Aretak cätz'akat wajxakib k'ij, quebuc'am ulok quieb tucumux o quieb palomax, cäbe chuchi' ri Lic'om Rachoch Dios re rikoj ib, quebujach pa u k'ab ri cojol tabal tok'ob chuwäch ri Ajawaxel;

¹⁵ ri cojol tabal tok'ob cuchi'j jun chque jacha' che tabal tok'ob u mac rech ri macaj, ri jun chic che tabal tok'ob ri cächajirisaxic; jewa' cuban ri cojol tabal tok'ob che u josk'ixic ri achi ri c'o we yabil ri' che, chuwäch ri Ajawaxel.

¹⁶ Aretak jun achi cabelel ri u pam ri achi wi, rajawaxic catinic, cäcanaj c'u tz'il c'ä coc na ri ak'ab.

¹⁷ Apachique atz'iak, o tz'um ri cabelel wi can jubik' ri u pam ri achi wi, rajawaxic cach'ajic cäcanaj c'u tz'il c'ä coc na ri ak'ab.

¹⁸ We jun achi cäwar ruc' jun ixok, e quieb rajawaxic quebatinic, quecanaj c'u tz'il c'ä coc na ri ak'ab.”

Pixab chque jujun u tz'ilol ri ixok

¹⁹ “Aretak cäyawaj jun ixok chi ic', wukub k'ij cäcanaj tz'il apachin ta ne ri cächapowic, cäcanaj tz'il c'ä coc na ri ak'ab.

²⁰ Apachique jasach ri cuk'oylej aretak cäyawaj chi ic' cäcanaj tz'il, apachique jasach ri cut'uyulej, cäcanaj tz'il.

²¹ Apachin ta ne ri cächapow ri c'olbal ri k'oyolinak wi ri ixok, rajawaxic quebuch'aj ri ratz'iak, xukuje' catinic, cäcanaj c'u tz'il c'ä coc na ri ak'ab.

²² Apachin ta ne ri cunak jun chque ri jastak ri t'uyulinak wi ri ixok, rajawaxic quebuch'aj ri ratz'iak; xukuje' catinic, cäcanaj c'u tz'il c'ä coc na ri ak'ab.

²³ We cuchap ri c'olbal ri t'uyulinak wi we k'oyolinak wi ri ixok, cäcanaj tz'il c'ä coc na ri ak'ab.

²⁴ We c'o jun achi cäwar ruc' ri ixok, cuc'am re ri u tz'ilol, cäcanaj tz'il wukub k'ij, xukuje' cäcanaj tz'il ri c'olbal ri cäk'oyi wi ri achi.

²⁵ We c'u ne c'o jun ixok ri cätorotaj ri u yab chi ic', ri man je taj jas ri u nak'atisabal, cäbeytaj c'u q'ui k'ij ri u yabilal cäcanaj tz'il joropa' k'ij ri c'o ri u yabilal, je ta ne ri cätajin cäyabin chi ic'.

²⁶ Apachique c'olbal ri cäwar wi ri ixok, xukuje' apachique jasach ri cut'uyulej aretak cätajin cäyabinic, cäcanaj tz'il jacha' ri cätajin cäyabin chi ic'.

²⁷ Apachin ta ne ri cänakow we jastak ri', cäcanaj tz'il; rajawaxic quebuch'aj ri ratz'iak xukuje' catinic, cäcanaj c'u tz'il c'ä coc na ri ak'ab.

²⁸ Aretak cätani' ri u yab, carajilaj na wukub k'ij, c'äte ri cäcanaj ch'ajch'oj.

²⁹ Aretak cätz'akat wajxakib k'ij, quebuc'am ulok quieb tucumux we ne quieb palomax, quebujach che ri cojol tabal tok'ob, chuchi' ri roquibal ri Lic'om Rachoch Dios re rikoj ib.

³⁰ Ri cojol tabal tok'ob cuchi'j jun chque che tabal tok'ob che u mac rech ri macaj, ri jun chic che tabal tok'ob ri cächajirisaxic; jewa' cuban ri cojol tabal tok'ob che u josk'ixic ri u tz'ilol ri ixok, chuwäch ri Ajawaxel.

³¹ Jewa' caquiban ri aj israelib che u josk'ixic quib che ri qui tz'ilol, rech man quecäm taj aretak caquitz'iloj ri c'olbal ri in jekel wi chquixo'l rumal ri qui tz'ilol.”

³² Are tak pixab wa' chque ri achijab ri c'o ri yabil chque re ri u belelem ri u pam ri achijab wi, ri xukuje' xa jutak mul cuc'ut rib we yabil ri' chque, quecanaj c'u can tz'il rumal wa';

³³ xukuje' chque ri ixokib ri queyabin chi ic', xukuje' chque ri ixokib ri cäjalc'at ri u kajic ri qui yab chi ic'. Conojel we pixab ri' quecoj chque ri achijab, ri ixokib ri c'o we yabil ri chque, xukuje' che ri achi ri cäwar ruc' jun ixok ri cätajin cayabin chi ic'.