Aj Levitib 13 - Quiché Bible

Ri caban che u josk'ixic ri chuwilaj ch'a'c

¹ Ri Ajawaxel xutzijobej ri Moises, xukuje' ri Aaron, xubij chque:

² “Aretak jun winak c'o sipoj chrij ri u tz'umal, o pok', o sakrek', o ch'a'c ri cäjunamataj ruc' ri chuwilaj ch'a'c, rajawaxic cäc'am ulok chuwäch ri Aaron ri cojol tabal tok'ob o chuwäch jun chque ri e cojol tabal tok'ob ri e rija'lil ri Aaron.

³ Ri cojol tabal tok'ob cunic'oj ri ch'a'c ri c'o chrij ri u tz'umal, we sakarinak ri rismal ri c'o pa ri ch'a'c, we mecmobinak ri ch'a'c pa ri u tz'umal, jic chi chuwilaj ch'a'c wa'. Aretak nic'otajinak chic we winak ri' rumal ri cojol tabal tok'ob, cuk'alajisaj chi c'o chuwilaj ch'a'c chrij.

⁴ We c'o sakrek' chrij ri u tz'umal, man mecmobinak ta c'u chuxe' ri u tz'umal mawi sakarinak ri rismal, ri cojol tabal tok'ob wukub k'ij cutz'apij na ri ch'aquirinak pa jun ja.

⁵ Aretak cätz'akat wukub k'ij cunic'oj na ri cojol tabal tok'ob; we xak je wi u banom ri ch'a'c, man u jabum ta rib chrij ri u tz'umal, cätz'apix chi na wukub k'ij rumal ri cojol tabal tok'ob.

⁶ Aretak cätz'akat ri wukub k'ij cänic'ox chi jumul rumal ri cojol tabal tok'ob; we c'u cätajin cäsach ri ch'a'c, man c'u u jabum ta rib chrij ri u tz'umal ri winak, Ri cojol tabal tok'ob cuk'alajisaj chi man c'o ta chuwilaj ch'a'c chrij xak pok' wa' ri xq'uiy che ri u tz'umal. Ri yawab quebuch'aj ri ratz'iak, cäcanaj c'u ch'ajch'oj.

⁷ We c'u cujabuj rib ri pok' chrij ri u tz'umal aretak nic'om chic ri yawab, xukuje' k'alajisam chic rumal ri cojol tabal tok'ob chi man c'o ta u yab; rajawaxic cäbe chi na jumul ruc' ri cojol tabal tok'ob, rech cänic'ox rumal.

⁸ We c'u aretak cänic'otaj ri yawab rumal ri cojol tabal tok'ob, caril c'ut chi u jabum rib ri pok' chrij ri u tz'umal, cuk'alajisaj na chi tz'il; yawab c'o chuwilaj ch'a'c chrij.

⁹ Aretak jun winak c'o u ch'aquil chuwilaj ch'a'c chrij, rajawaxic cäc'am bic chuwäch ri cojol tabal tok'ob.

¹⁰ Cänic'ox rumal ri cojol tabal tok'ob, we c'u sak ri sipoj ri c'o che ri u tz'umal u banom c'ut chi ri rismal cätajin cäsakaric, we c'u quilitaj ri quiäkalaj ti'j pa ri sipoj,

¹¹ chuwilaj ch'a'c wa' ri u ruxubem ri u tz'umal. Ri cojol tabal tok'ob rajawaxic cuk'alajisaj chi tz'il we winak ri', man rajawaxic ta chic cutz'apij, tz'ilotajinak chic.

¹² We c'u cänimataj ri chuwilaj ch'a'c ruc' aninakil, chi quebuch'uk ri rakan xukuje' ri u jolom ri yawab c'ä jawije' ri cacuin wi ri cojol tabal tok'ob che rilic,

¹³ ri cojol tabal tok'ob cunic'oj na; we c'u ch'ukutajinak ronojel ri u cuerp rumal ri ch'a'c ri cojol tabal tok'ob cuk'alajisaj chi man c'o ta u yab, sakarinak c'u ri ch'a'c canajinak ch'ajch'oj.

¹⁴ Apachique c'u k'ij, ri cäc'utun ri quiäk ti'j, cäcanaj tz'il.

¹⁵ Cunic'oj c'u ri cojol tabal tok'ob ri quiäk ti'j, cuk'alajisaj chi c'o u yab ri winak. Ri quiäk ti'j u tz'ilol chuwilaj ch'a'c wa'.

¹⁶ We c'u ne cuq'uex rib ri quiäk ti'j, cäsakar chi jumul, ri yawab rajawaxic cuc'utu chi na rib chuwäch ri cojol tabal tok'ob

¹⁷ rech cunic'oj, we c'u carilo chi ri ch'a'c sakarinak chi jumul, cuk'alajisaj chi man c'o ta u yab we winak ri', canajinak c'u ch'ajch'oj.

¹⁸ Aretak c'o jachin jun c'o jun chuwilaj ch'a'c chrij ri u tz'umal cäcunataj c'ut,

¹⁹ cäcanaj c'u can jun sak sipoj pa ri u c'olbal, o jun quiäk sakrek', rajawaxic cuc'utu' rib chuwäch ri cojol tabal tok'ob.

²⁰ We ri cojol tabal tok'ob; carilo chi ri u rikom wi ri c'axc'obic mecmobinak pa ri u tz'umal, sakarinak c'u ri rismal, ri cojol tabal tok'ob cuk'alajisaj chi tz'il we winak ri', u ch'aquil chuwilaj ch'a'c wa' ri c'o che.

²¹ We carilo chi ri xc'oji' wi ri chuwilaj ch'a'c man c'o ta rismal ri sakarinak chupam, mawi mecmobinak pa ri u tz'umal, xane' xa benak rutziric, wukub k'ij cutz'apij na we winak ri' pa jun ja.

²² We c'u cätajin cujabuj rib ri yabil chrij ri u tz'umal, ri cojol tabal tok'ob cuk'alajisaj chi c'o u yab we winak ri', u ch'aquil chuwilaj ch'a'c wa' ri c'o chrij.

²³ We c'u ri xc'oji' wi ri chuwilaj ch'a'c man u jabum ta rib, xak u yuquil ri ch'a'c wa', ri cojol tabal tok'ob cuk'alajisaj chi man c'o ta u yab we winak ri'.

²⁴ Aretak c'o jun c'atic chrij ri u tz'umal jun winak, we c'u c'o jun sakrek', o sak chuwäch ri quiäk ti'j,

²⁵ cunic'oj na ri cojol tabal tok'ob; we c'u sakarinak ri rismal pa ri c'atic, mecmobinak c'u pa ri u tz'umal, chuwilaj ch'a'c wa' ri xq'uiy ulok pa ri c'atic; ri cojol tabal tok'ob cuk'alajisaj chi tz'il u ch'aquil chuwilaj ch'a'c c'ut ri c'o chrij.

²⁶ We c'u aretak cunic'oj ri cojol tabal tok'ob ri c'atic, carilo chi man c'o ta jun sak rismal pa ri c'atic mawi mecmobinak pa ri u tz'umal, xane' benak rutziric wukub k'ij cutz'apij na pa jun ja,

²⁷ aretak catz'akat ri wukub k'ij cänic'ox rumal ri cojol tabal tok'ob; we c'u u jabum rib ri yabil chrij ri u tz'umal, cuk'alajisaj chi tz'il we winak ri', u ch'aquil chuwilaj ch'a'c wa' ri c'o chrij.

²⁸ We c'u ri c'atic man cujabuj ta rib chrij ri u tz'umal, xane' benak rutziric, xa u sipoj ri c'atic wa' ri xcanajic, xa jeri', ri cojol tabal tok'ob cuk'alajisaj chi ch'ajch'oj ri yawab, xa c'u u yuquil ri c'atic.

²⁹ We jun achi o jun ixok c'o jun ch'a'c che ri u jolom o che ri u cacate',

³⁰ ri cojol tabal tok'ob cunic'oj ri ch'a'c, we ri ch'a'c mecmobinak pa ri u tz'umal, k'anarinak c'u ri rismal xukuje' xak cäwalalic, ri cojol tabal tok'ob cuk'alajisaj chi tz'il we winak ri', c'o quiäkchi'n che, ri u bixic ch'a'c re jolomaj xukuje' re cacate'.

³¹ We c'u aretak cänic'ox ri ch'a'c ri quiäkchi'n rumal ri cojol tabal tok'ob, carilo chi we man mecmobinak ta pa ri u tz'umal, mawi c'o k'ek rismal, cutz'apij na wukub k'ij we winak ri' chupam jun ja.

³² Aretak catz'akat wukub k'ij cänic'ox ri ch'a'c rumal ri cojol tabal tok'ob; we c'u man u jabum rib ri quiäkchi'n mawi mecmobinak pa ri u tz'umal, mawi k'anarinak ri rismal.

³³ Ri cojol tabal tok'ob cubij che ri winak ri yawab chi cäsocax ri u wi', man cäsocax ta c'u ri c'o wi ri quiäkchi'n ch'a'c cutz'apij chi na wukub k'ij pa jun ja.

³⁴ Aretak cätz'akat wukub k'ij, ri cojol tabal tok'ob cunic'oj chi na ri ch'a'c jumul, we c'u man u jubum rib ri quiäkchi'n mawi mecmobinak pa ri u tz'umal, ri cojol tabal tok'ob cuk'alajisaj chi ch'ajch'oj we ri winak ri', quebuch'aj ri ratz'iak, cäcanaj c'u ch'ajch'oj.

³⁵ We c'u ri quiäkchi'n cujabuj rib chrij ri u tz'umal, aretak k'alajisam chic, chi ch'ajch'oj.

³⁶ Ri cojol tabal tok'ob cunic'oj chi jumul ri winak ri yawab, we c'u u jabum rib ri quiäkchi'n chrij ri u tz'umal, man rajawaxic ta chic cutzucuj ri wi'aj ri k'ank'oj, tz'il wa'.

³⁷ We c'u caril ri cojol tabal tok'ob chi ri quiäkchi'n man u jabum ta rib, q'uiyinak c'u ulok ri k'ek ismal chupam, cunatajinak chic ri quiäkchi'n, ri winak ch'ajch'oj. Are c'u ri cojol tabal tok'ob cuk'alajisaj na chi ch'ajch'oj.

³⁸ We jun achi we jun ixok e c'o sakrek' chrij ri u tz'umal,

³⁹ ri cojol tabal tok'ob, cunic'oj ri u tz'umal, we carilo chi c'o etal saksoj we sak macalic pa ri sakrek'; xak apachique sipoj wa' ri q'uiyinak chrij ri u tz'umal; ch'ajch'oj we winak ri'.

⁴⁰ We jun winak cätzak ri u wi', cäcanaj c'u ch'a'n, ch'ajch'oj wa'.

⁴¹ We ri u wi' ri c'o chuwäch cäk'ulk'ubic cach'anar c'u chuwäch, xukuje' ch'ajch'oj.

⁴² We c'u cäc'utun jun ch'a'c ri sak quiäk cäca'yic pa tak ri c'olbal ri e ch'anach'oj, we chrij u wi' we chuwäch, xa cätajin caq'uiy ulok chuwilaj ch'a'c chila'.

⁴³ Cunic'oj c'u ri cojol tabal tok'ob, we c'u ri sipoj re ri ch'a'c ri c'o pa tak ri ch'ajch'oj sak quiäk cäca'yic, je jas ri rilic ri chuwilaj ch'a'c che ri u tz'umal ri cuerp.

⁴⁴ We winak ri' yawab che chuwilaj chac', ch'acarinak ri u jolom. Jun winak wa' ri tz'il, je u k'alajisaxic cuban na ri cojol tabal tok'ob.

⁴⁵ Ri winak ri ch'aquirinak che chuwilaj ch'a'c, jisjobinak tak atz'iak cucojo xukuje' man cuch'uk ta ri u jolom, ch'ukutal jubik' ri u palaj curak u chi', cubij: ‘¡In tz'il! ¡In tz'il!’

⁴⁶ Joropa' k'ij cäc'oji' ri chuwilaj ch'a'c chrij, cachomaxic chi tz'il, cutuquela'j rib chrij ri tinimit.

⁴⁷ Aretak cac'utun jun tz'aj che jun atz'iak, we re rismal chij o re lino,

⁴⁸ o che jun quem, re lino o re rismal chij, o che jun tz'um, o che apachique jasach re tz'um

⁴⁹ we ri tz'aj ri c'o chque we jastak ri' räxroj o quiäkcoj, ri tz'aj ri' chuwilaj ch'a'c wa', takal u c'utic chuwäch ri cojol tabal tok'ob.

⁵⁰ Ri cojol tabal tok'ob cunic'oj na ri tz'aj, cutz'apij c'u na wukub k'ij ri jasach ri tz'ajtajinak.

⁵¹ Aretak catz'akat wukub k'ij cunic'oj ri tz'aj; we u jabum rib chrij ri atz'iak, chrij ri rakan quem o u wa' quem, o che ri tz'um o jun jasach re tz'um, ri tz'aj chuwilaj ch'a'c wa' e are tak c'ut ri jastak e tz'il wa'.

⁵² Je c'u ri' apachique jasach ri c'o we tz'aj ri' che chuwilaj ch'a'c wa', rajawaxic u poroxic ronojel, chuwilaj ch'a'c wa'.

⁵³ We c'u cunic'oj ri cojol tabal tok'ob, cäriktaj c'ut chi man u jabum ta rib, ri tz'aj,

⁵⁴ cuya' takanic chi cäch'aj ri tz'aj cätz'apix chi na wukub k'ij ri jasach ri' pa jun ja.

⁵⁵ Aretak ch'ajtajinak chic ri tz'aj cunic'oj ri cojol tabal tok'ob. We c'u cärilo chi ri tz'aj man sachinak taj, tz'aj, ri jasach takal u poroxic, pune' ri tz'aj man u jabum ta rib, xa benak chupam, we chupam c'o wi xukuje' we chrij c'o wi.

⁵⁶ We c'u aretak cunic'oj ri cojol tabal tok'ob, cärilo chi ri tz'aj sachinak aretak ch'ajom chic, cukupij apam we ch'akap ri' che ri atz'iak, che ri tz'um o che ri quem.

⁵⁷ We c'u cuc'ut chi rib jumul chrij ri atz'iak, o chrij ri quem o chrij apachique jasach re tz'um, cäporox we jasach ri' ri tz'ajtajinak.

⁵⁸ Are c'u ri atz'iak, ri quem, o apachique jasach re tz'um, ri quel wi ri tz'aj aretak cäch'ajic, cäcamulix u ch'ajic cäcanaj c'u can ch'ajch'oj.”

⁵⁹ Aretak wa' ri pixab chquij ri tz'aj re chuwilaj ch'a'c chque tak ri atz'iak re rismal chij o re lino, o chque quem, o chque jastak re tz'um, rech cuya' quek'alajisaxic chi e ch'ajch'oj o e tz'il.