Aj Levitib 11 - Quiché Bible

Awajib ri e ch'ajch'oj xukuje' ri e tz'il

¹ Ri Ajawaxel xutzijobej ri Moises, rachil ri Aaron, xubij c'u chque:

² “Chibij chque ri aj israelib chi, e are' tak wa' ri awaj ri ya'talic quequitijo, chquixo'l conojel ri awaj ri e c'o cho ri ulew. Cuya' quequitij ri awaj

³ ri quieb u banom quixq'uiak, xukuje' quecoq'uisanic,

⁴ man cuya' ta c'ut quebitij we awaj ri' pune' ta quecoq'uisanic o quieb ta u banom ri quixq'uiak: ri camey, rumal rech chi cäcoq'uisanic man u banom ta c'u quieb ri rixq'uiak, tz'ilalaj awaj wa' chiwe.

⁵ Ri u tzi' ja', rumal rech chi cäcoq'uisanic, man u banom ta c'u quieb ri rixq'uiak, tz'ilalaj awaj wa' chiwe.

⁶ Ri imul pune' cäcoq'uisanic, man u banom ta c'u quieb ri rixq'uiak, tz'ilalaj awaj wa' chiwe.

⁷ Ri ak, pune' u banom quieb ri rixq'uiak, man c'u cäcoq'uisan taj, tz'ilalaj awaj wa' chiwe.

⁸ Man quitij ta ri qui ti'jal we awaj ri', mawi michap ri cäminak u ti'jal. E tz'ilalaj tak awaj wa'.

⁹ Chquixo'l ri awaj ri e c'o pa ri ja' we re plo o e re nima', xuwi cuya' quebitij ri c'o alaj tak qui xic' xukuje' ri c'o u solotil ri quij.

¹⁰ Conojel c'u ri man c'o ta alaj tak qui xic', mawi c'o ta u solotil ri quij, e awaj wa' ri etzelam qui wäch pune' e re plo o e re nima', xak e junam ri ch'utik tak awaj cuc' ri e nimak.

¹¹ Mebitij ri qui ti'jal, are' e awaj wa' ri etzelam qui wäch, xukuje' quiwetzelaj na qui wäch ri cäminak qui ti'jal.

¹² Conojel ri awaj ri e c'o pa tak ri ja' ri man c'o ta alaj tak qui xic' xukuje' ri man c'o ta u solotil ri quij, etzelam qui wäch.

¹³ Man quetijow ta tak wa' we aj xic'ab tak chicop ri', xane' e awaj wa' ri e etzelam qui wäch: ri cot, ri xulbak, ri cot re plo,

¹⁴ ri milano, xukuje' ronojel qui wäch alcon,

¹⁵ ronojel qui wäch joj;

¹⁶ ri abestrus, ri xoch', ri xic aj plo, ronojel qui wäch xic,

¹⁷ ri tucur, ri joj aj plo, ri ibis,

¹⁸ ri sisne, ri pelican, ri c'uch,

¹⁹ ri siguenya, ronojel qui wäch garz, ri abubiy, ri sotz'.

²⁰ Ronojel chicop ri cärapapic xukuje' cawac'aq'uic, etzelam qui wäch wa'.

²¹ Cuya' c'ut quebitij wa', pune' querapinic xukuje' quewac'aq'uic, xukuje' e qui rikom tak quib ri ca' cuc' ri cakan ri caquich'opinabej cho ri ulew.

²² Ri cuya' quebitij chquixo'l e are wa' ronojel qui wäch sac', nimak tak sac', xi'r xukuje' ri quech'opinic.

²³ Ronojel c'u qui wäch chicop ri querapinic xukuje' cäwac'lajic, etzelam qui wäch wa'.

²⁴ Cumal we jastak ri' quixcanaj tz'il: apachin ri cächapowic ri cäminak qui ti'jal we awaj ri' cäcanaj tz'il c'ä coc na ri ak'ab.

²⁵ Apachin ri cäwalijisan jun chque we cäminak tak awaj ri', quebuch'aj ri ratz'iak, cäcanaj c'u na tz'il c'ä coc na ri ak'ab.

²⁶ Ronojel awaj ri c'o rixq'uiak, ri man u banom ta quieb mawi cäcoq'uisanic, tz'ilalaj awaj wa' chiwe; apachin ri canakowic xukuje' cäcanaj tz'il.

²⁷ Apachique awaj ri c'o quiejeb rakan ri cäbin paquiwi' ri quiejeb rakan, tz'ilalaj awaj wa' chiwe, xukuje' apachin ri canakowic aretak cäminak chic, cäcanaj tz'il c'ä coc na ri ak'ab.

²⁸ Apachin ri cäwalijisan jun chque we cäminak tak awaj ri', quebuch'aj ri ratz'iak, cäcanaj c'u tz'il c'ä coc na ri ak'ab, e tz'il c'u tak wa' we awaj ri' chiwe.

²⁹ Chquixo'l ri awaj ri caquijururej quib cho ri ulew e are tak wa' ri e tz'il chiwe: ri sakbin, ri ch'o, xukuje' ronojel qui wäch ri caquijuruj quib:

³⁰ jacha' ri oo'n, ri ayin re plo xukuje' ri ayin re chaki'j ulew, ri xpa'ch, xukuje' tak ri xcu'tz.

³¹ E are wa' ri e tz'il chiwe chquixo'l conojel ri chicop xukuje' apachin ri quenakowic aretak e cäminak chic, cäcanaj tz'il c'ä coc na ri ak'ab.

³² Xukuje' cäcanaj tz'il apachique jasach ri cukajbej jun chque we awaj ri' aretak cäminak chic. We jun jasach re che', we jun atz'iak, o jun jasach re tz'um, o c'ul o apachique chacubal, rajawaxic cänim na pa ja', cäcanaj tz'il c'ä coc na ri ak'ab; c'äte ri' cäcanaj ch'ajch'oj.

³³ We jun chque we cäminak tak awaj ri' cätzak pa jun bo'j, cäcanaj tz'il xukuje' ri c'o chupam, cäpaxix na we bo'j ri'.

³⁴ Ronojel ri tijic rij, ri cäkaj wi ri ja' ri cäch'ajbex re we bo'j ri', xukuje' ronojel ri ruq'uiaxic rij ri c'o chupam ri bo'j, cäcanaj tz'il.

³⁵ Apachique jasach ri cukajbej jun chque we awaj ri' aretak cäminak chic, cäcanaj tz'il; we jun nim jorno, o jun alaj jorno: rajawaxic cäwulixic; e tz'il c'u wa' chiwe.

³⁶ Are c'u, ri u q'uiyibal ja' o c'ua' ri cäc'am wi ja', kas ch'ajch'oj wi; are c'u ri cächapow ri cäminak awaj, cäcanaj tz'il.

³⁷ We cäcäm jun chque we awaj ri', cäkaj c'u ri u ch'akapil puwi' jun ija' ri tiquic rij; kas ch'ajch'oj wi, ri ija'.

³⁸ We c'u mubam chic ri ija' cäkaj c'u jun chque we cäminak tak awaj ri puwi', we ija' ri' cux tz'il.

³⁹ We c'u ne cäcäm jun chque ri iwawaj ri tijic rij iwumal, ri canakow we cäminak awaj ri' cäcanaj tz'il c'ä coc na ri ak'ab;

⁴⁰ ri cutij re ri u ti'jal ri cäminak awaj, rajawaxic quebuch'aj ri ratz'iak, cäcanaj tz'il c'ä coc na ri ak'ab; ri quebesan bic we cäminak tak awaj ri' rajawaxic quebe qui ch'aj ri catz'iak, quecanaj tz'il c'ä coc na ri ak'ab.

⁴¹ Mitij jun chicop ri cujururej rib cho ri ulew; awaj wa' ri etzelam u wäch.

⁴² Conojel chicop ri cäquijururej quib cho ri ulew, mitij jun chque, we cubinibej ri qui pam, o cubinibej ri quiejeb rakan, o cubinibej sibalaj q'ui rakan, e awaj wa' ri etzelam qui wäch.

⁴³ Mitz'iloj iwib ruc' jun chque we chicop ri' ri cäquijururej quib.”

Ri Dios tastalic ri man cuban ta etzelal

⁴⁴ “In c'ut ri Ajawaxel ri i Dios, ri ix rajawaxic chi kas quitas iwib, chixux c'u tastalic, in c'u in tastalic, man quinban ta etzelal. Mitz'iloj ba iwib ruc' apachique chicop ri cujururej rib cho ri ulew.

⁴⁵ In ri' ri Ajawaxel ri xixinwesaj ulok pa Ejipt rech quinux i Dios: rumal ri' rajawaxic quixux tastalic, ri in man quinban ta etzelal, in c'u tastalic in.”

⁴⁶ E are pixab wa' chquij ri awaj, xukuje' ri chicop ri c'o qui xic', xukuje' conojel ri c'o qui c'aslemal ri queslab pa tak ri ja', xukuje' chque conojel ri awaj ri caquijururej quib cho ri ulew,

⁴⁷ rech cäc'utun ri u jalbem rib ri tz'il ruc' ri ch'ajch'oj xukuje' chquixo'l ri awaj ri takal qui tijic cuc' ri awaj ri man takal ta qui tijic.