Ajilanic 6 - Quiché Bible

Ri rajawaxic u banic cumal ri nazarey

¹ Ri Ajawaxel xutzijobej ri Moises xubij c'u che:

² “Chabij wa' chque ri aj israelib: We jun achi o jun ixok cuban ri chi'nic che u tasic rib che u ternexic ri Ajawaxel jacha' jun nazarey,

³ man cuya' ta caruq'uiaj u wa'l uva mawi jun uq'uia' ri k'obisam, mawi ch'amalaj u wa'l uva o uq'uia' tak ri e ch'amarisam, mawi u wa'l uva; mawi cuya' cutij ta uva mawi tak pasa.

⁴ Joropa' k'ij cäbeytaj ri u chi'nic man cuya' taj c'o ta jas cutij ta che ri cuya' ri u che'al uva, apachique ta ne.

⁵ Mawi cuya' cukopij ta ri u wi', xane' cuya' be che chi caq'uiyic c'ä quetz'akat na ri k'ij ri u k'atom che ri u chi'nic, rajawaxic c'ut cutakej u tasic rib che u ternexic ri Ajawaxel.

⁶ Pa ri u beytajic we k'ijol ri' mawi cuya' cakeb ruc' jun cäminak,

⁷ mawi ne aretak cäcäm ri u tat, ri u nan, jun rachalal achi o ixok, rech man cäcanaj ta tz'il, yo'm c'ut che chi cäcanaj tastalic che u ternexic ri Ajawaxel.

⁸ Ronojel ri k'ijol ri cäbeytaj ri u chi'nic cäcanaj tastalic che u ternexic ri Ajawaxel Dios.

⁹ We c'o jachin jun xak c'ätetal cäcäm pa u xcut cux c'u tz'il ri u wi', ri u tasom che u ternexic ri Ajawaxel, rajawaxic cutolorisaj ri u jolom aretak quel wukub k'ij, ri u bixic, ri k'ij ri c'utum che ri u ch'ajch'ojisaxic rib.

¹⁰ Aretak quebel wajxakib k'ij cuc'am bic che ri cojol tabal tok'ob quieb palomax o quieb tucumux, chuchi' ri oquibal rech ri Lic'om Rachoch Dios re rikoj ib.

¹¹ Ri cojol tabal tok'ob cuchi'j na jun chque jacha' che tabal tok'ob che u josk'ixic ri macaj ri jun chic jacha' che tabal tok'ob ri cächajirisaxic, cuban c'u na ri nak'atisabal che u rikic ri sachbal macaj u mac ri macunic ri bantajinak aretak xuchap ri cäminak, pa ri k'ij ri' cutas chi na ri u wi' che ri Ajawaxel,

¹² cuchaplej chi c'u na jun c'ac' k'ijol re tastajem che ri Ajawaxel, ri k'ijol ri oc'owinak man coc ta pa ajilabal, rumal rech chi ri wi'aj ri u tasom xcanaj tz'il. Xukuje' rajawaxic cuc'am bic che ri Ajawaxel jun ama' chij ri c'o chic jun u junab jacha' che' tabal tok'ob u mac ri macunic.

¹³ Aretak caq'uis ri k'ijol che ri u tasic rib, ri Nazarey rajawaxic cäbe chuchi' ri oquibal chupam ri Lic'om Rachoch Dios re rikoj ib

¹⁴ cuchi'j c'u che ri Ajawaxel jun alaj chij re jun u junab ri man c'o ta jun u yab jacha' che tabal tok'ob ri cächajirisaxic, jun ati't chij re jun u junab ri ma ta c'o jun u yab jacha' che tabal tok'ob u mac ri macaj, xukuje' jun ama' chij ri ma ta c'o jun u yab jacha' che tabal tok'ob re utzirisan ib.

¹⁵ Xukuje' rajawaxic cuchi'j jun alaj chicäch caxlanwa ri re utzalaj c'äj ri cojom che qui banic, man cäya' ta ch'am cuc' ri cäyok' aseit cuc'; watz'otz' ri man cäya' ta ch'am cuc' chicom aseit, chque quecachilaj c'u tak ri e qui sipanic que c'äj xukuje' ri re u wa'l uva.

¹⁶ Ri cojol tabal tok'ob cuchi'j na chuwäch ri Ajawaxel, ri tabal tok'ob u mac rech ri macaj xukuje' ri tabal tok'ob ri cächajirisaxic,

¹⁷ xukuje' cuchi'j na ri ama' chij jacha' che tabal tok'ob re utzirisan ib, cärachilaj ri alaj chicäch caxlanwa ri man cäya' ta ch'am cuc', cuban c'ut ri sipanic que c'äj xukuje' ri re u wa'l uva.

¹⁸ Ri aj nazarey cuban na to'l che ri u jolom chuchi' ri oquibal chupam ri Lic'om Rachoch Dios re rikoj ib, cuc'am c'u na ri wi'aj ri u tasom, cuq'uiak c'u na pa ri k'ak' ri canicow chuxe' ri tabal tok'ob re utzirisan ib.

¹⁹ Ri cojol tabal tok'ob cuc'am na ri uwo rachak ri ama' chij, ri chak' chic, jun caxlanwa ri man cäya' ta ch'am ruc' ri c'o pa ri alaj chicäch xukuje' jun watz'otz' ri man cäya' ta ch'am ruc', ronojel c'ut cuya' pa u k'ab ri aj nazarey, aretak u banom chi tol che ri u jolom.

²⁰ Are c'u ri cojol tabal tok'ob cuban na ri nak'atisabal re yanic chuwäch ri Ajawaxel. Ri uwo u c'u'x ri awaj ri cäbanbex ri nak'atisabal che ri yanic xukuje' ri u ch'o a'aj ri cäya' jacha' che cuchuj che ri Ajawaxel, e jastak ri e tastalic ri e rech ri cojol tabal tok'ob. Aretak c'u cabantaj wa', ri aj nazarey cuya' cäruq'uiaj u wa'l uva.

²¹ Are' pixab wa' che ri cuban chi'nic che u tasic rib che u ternexic ri Ajawaxel jacha' che aj nazarey, e are tak c'u sipanic wa' ri rajawaxic quebel u ya', man coc ta c'u pa ajilabal apachique jun jasach chic ri cacuin ta che u chi'xic. Rajawaxic cutz'akatisaj ri chi'm, je c'u chubana' wa'.”

Ri tewichi'nic cumal ri cojol tabal tak tok'ob

²² Ri Ajawaxel xutzijobej ri Moises xubij c'u che:

²³ “Chabij che ri Aaron xukuje' chque ri e u c'ojol chi aretak que qui tewichi'j ri aj israelib je u banic wa' chquibana':

²⁴ ‘Are' ri Ajawaxel chatutewichi'j xukuje' chatuc'uxlaj,

²⁵ chatkaj chuwäch ri Ajawaxel, chuc'utu' c'ut ri rutzil chawäch;

²⁶ chatuca'yej c'ut ri Ajawaxel ruc' lok'ok'ebal c'uxaj chuya' c'ut ri jamaril chawe.’

²⁷ Jeri' ri e are' caquinataj na ri nu bi' paquiwi' ri aj israelib, quebentewichi'j c'u na.”